Pagsugod ug Mga Pagtuon sa Bibliya—Karon Na ang Higayon
1 Sa 1987 ang gidaghanon sa mga pagtuon sa Bibliyang gidumala maoy hapit pariho sa kinatibuk-ang gidaghanon sa mga magmamantala sa tibuok kalibotan. Ikaw ba nakig-ambit niining maong bahin sa paghimog-tinun-an? Karon maoy higayon sa bug-os nga pagtagad sa pagsugod ug mga pagtuon.—Itandi ang 2 Corinto 6:2.
2 Ang librong Atong Ministeryo, mga panid 89-91, nagadasig kanato sa atong pribilehiyo sa pagtabang sa uban sa espirituwal pinaagi sa mga pagtuon sa Bibliya sa balay. Ang panid 91 nagaawhag: “Kutob sa maarangan, himoang tumong mo sa pagdumalag labing menos usa ka pagtuon sa Bibliya sa balay nga regular nga dugang pa sa bisan unsang pagtuon nga imong ginadumala uban sa mga anak sa imong pamilya.” Kini maoy usa ka maayong tumong nga tinguhaon sa matag usa kanato pinaagi sa pagtanyag ug pagtuon sa Bibliya sa matag higayon.
UBAN SA TABANG SA LIBRO NGA NANGATARONGAN
3 Nasulayan na ba nimong magtanyag ug pagtuon sa Bibliya sa unang pagduaw lamang? Sa panid 12 ubos sa “Pagtuon sa Bibliya sa Balay,” ang libro nga Nangatarongan nagasugyot ug duha ka introduksiyon sa paghimo niining laktod nga pagduol. Niini mahibalo ang tagbalay sa atong tuyo sa pagduaw nga mao ang pagtanyag ug libre nga pagtuon sa Bibliya sa balay. Walay sapayan kon unsang presentasyon ang atong gamiton, kita makatanyag sa pagpasundayag kon unsaon nato pagdumala ang pagtuon. Daghang mga tagbalay ang nakabaton na sa atong mga basahon nga mahimong gamiton. O usa ka tract ang mahimong gamiton sa pagsugod sa pagtuon. Kini mahimo bisan pa kon ang tanyag nga basahon gidumilian, kon ang tagbalay mauyonon. Pananglitan, kon sa pagtanyag sa libro nga Creation, ang indibiduwal magaingon nga dili siya interesado sa ebolusyon. Kita tingali makatanyag sa pagpakita kaniya kon unsaon nato pagdumala ang pagtuon sa Bibliya ginagamit ang kapitulo 19 sa librong Creation, sa “An Earthly Paradise Soon to Come.”
4 Lain pang metodo sa pagsugod ug mga pagtuon mao ang paggamit sa librong Nangatarongan sa mga balikduaw. Samtang ginahikay ang pagduaw pag-usab, isukna, “Ang planetang Yuta pagalaglagon ba sa usa ka nukleyar nga gubat?” Dayon imbes nga yanong moingon sa tagbalay nga imong ihatag ang tubag sa imong pagbalik, ipasulat kaniya ang tulo o upat ka teksto nga gikuha gikan sa panid 434 ug 435 sa librong Nangatarongan. Dapita ang tagbalay nga basahon kining maong mga teksto sa pagpangandam sa imong sunod nga pagduaw. Kutob sa maarangan balik dayon sa maong semana ug tan-awa ang mga teksto, nga duyog nga magahisgot niana. Dayon isukna ang laing pangutana nga pagatubagon sa sunod nimong pagduaw. Usab hatagi ang tagbalay ug pipila ka mga teksto nga iyang masusi una ka pa mobalik.
5 Segun sa imong makita, kining maong metodo epektibo bisan pa ang tagbalay wala sa sinugdan modawat ug basahon apan nagapakita ug kahangawa sa mga kahimtang sa kalibotan ug mahitungod sa umaabot.
6 Gusto ba nimong modumala ug pagtuon sa Bibliya? Bisan kon ikaw nagadumala na ug usa, ikaw ba aduna pay bakante sa imong eskedyol para sa usa o duha pa ka pagtuon? Himoa ang pagsugod ug pagtuon nga usa ka butang sa pag-ampo samtang ‘ginapalit mo ang panahon.’—Efe. 5:15, 16.