Pagsugod ug mga Pagtuon sa Bibliya sa Balay
1 Usa sa labing matagbawon nga mga kasinatian sa matuod nga mga Kristohanon mao ang pagtudlo sa usa sa kamatuoran pinaagig usa ka pagtuon sa Bibliya sa balay. Bisan pa niana, ang pipila mahimong wala magakalipay niining bahina sa ministeryo tungod kay ilang gibati nga sila dili makahimo sa pagsugod ug pagdumalag usa ka pagtuon sa Bibliya. Daghang magmamantala ug payunir mibati niana kaniadto. Hinuon, pinaagig pagsalig kang Jehova ug pinaagig pagpadapat sa mga sugyot gikan sa Atong Ministeryo sa Gingharian, ilang nakat-onan kon unsaon pagsugod ug pagdumalag mga pagtuon sa Bibliya. Mahimo mo ang samang tumong.
2 Paggamit sa Diretsong Paagi ug Tracts: Usa sa labing sayon nga mga paagi sa pagsugod ug usa ka pagtuon maoy pinaagig diretsong paagi. Ang gikinahanglan lang sa pipila ka tawo mao ang usa ka mainitong pagdapit sa pagtuon sa Bibliya. Kini mahimo pinaagig yanong pagsukna sa tagbalay: “Buot ba nimong may personal nga pagtuon sa Bibliya sa balay ug mopauswag sa imong kahibalo sa Bibliya ug sa katuyoan sa Diyos sa yuta?” O makasulti ka sa tagbalay nga malipay ka nga ipasundayag ang paagi nga dumalahon ang usa ka pagtuon sa Bibliya sa balay. Hunahunaa ang imong kalipay sa pagkaplag ug usa nga modawat niana!
3 Ang laing paagi sa pagsugod ug pagtuon sa Bibliya maoy pinaagig paggamit sa usa sa atong tracts. Sa unsang paagi ang pagtuon masugdan pinaagig tract? Pinaagig yano lamang nga paghatag sa tagbalay ug usa ka tract nga imong gituohang makapainteres kaniya. Unya, dapita ang tagbalay sa pagbasa sa unang parapo uban kanimo. Tan-awa ang mga kasulatang gisitar, ug hisgoti kon sa unsang paagi kana mapadapat nganha sa materyal. Sa unang duaw, mahimong tagdon lamang nimo ang usa o duha ka parapo. Sa dihang magapabili na ang tagbalay sa iyang nakat-onan, mapauswag na nimo ang panahon nga imong gigugol sa inyong mga panaghisgot.
4 Paggamit Lamang sa Bibliya: Usahay ang usa ka tawo mouyon sa panaghisgot sa Bibliya apan maorag magpanukong modawat ug usa ka pormal nga pagtuon o gamiton ang usa sa atong mga basahon. Makasugod gihapon ka ug makadumalag pagtuon sa Bibliya pinaagig pag-andam ug makaiikag nga Kasulatanhong mga panaghisgot nga gipasukad sa mga bahin sa librong Mabuhing Walay Kataposan o sa librong Nangatarongan apan maggamit lamang sa Bibliya sa dihang nagaduaw sa interesadong tawo. Ang maong mga panaghisgot mahimong molungtad ug 15 o 20 minutos, o mas dugay pa, depende sa mga kahimtang. Kon makanunayong gihimo ug uban sa mauswagong paagi sa pagtudlog mga kamatuoran sa Bibliya, ikaw nakasugod na ug usa ka pagtuon sa Bibliya, ug mahimo na kanang ikataho. Sa dihang tukma na ang panahon, ipaila ang librong Mabuhing Walay Kataposan, ug dumalaha ang pormal nga pagtuon diha niana.
5 Dugang pa sa pagpangitag mga kahigayonan diha sa ministeryo sa kanataran, naningkamot ka ba sa pagsugod ug mga pagtuon sa Bibliya uban sa mga silingan, mga kaubanan, o mga membro sa pamilya? Kana ba dugaydugay nang miagi? Gisulayan ba nimo pag-usab di pa dugay? Kon ang usa ka paagi wala mosaler, gihunahuna ba nimong mosulay ug lain?
6 Magmalamposon ka sa pagsugod ug mga pagtuon kon imong ipadapat ang gihatag nga mga sugyot, ug mosalig kang Jehova alang sa iyang panalangin. Hinaot nga imong mapauswag ang imong kalipay pinaagig pagsugod ug pagdumalag mga pagtuon sa Bibliya sa balay.