Pagtanyag sa Maayong Balita—Itanyag ang mga Pagtuon sa Bibliya sa Balay
1 Ang Agosto 1991 nga suplemento sa Atong Ministeryo sa Gingharian nagpahinumdom kanato sa atong kaakohan sa pagtanom ug pagbisibis diha sa paagi sa paghimog mga tinun-an ni Kristo. Kana nagpakita kanatong kinahanglang mapalihok sa pagdumalag mga pagtuon sa Bibliya tungod sa atong gugma sa katawhan ug sa pagtuman sa atong buluhaton sa paghimog mga tinun-an.—Mat. 28:19, 20.
2 Maayong tan-awon nga daghan kanato ang misugod sa pagpadapat sa maayo kaayong pagpalig-on nga gihatag. Ang gidaghanon sa mga pagtuon sa Bibliya nga gitaho sa Pilipinas miuswag ug 12 porsiyento sa 1991 kay sa 1990 nga tuig sa pag-alagad. Tino nga kadtong misugod sa pagdumalag mga pagtuon sa unang higayon nagakalipay sa pakig-ambit nga ilang gihimo diha sa buluhatong paghimog mga tinun-an. Pero sa unsang paagi ang mas pa makaambit niining magantihong bahin sa atong ministeryo?
3 Gamita ang Tanyag sa Bulan: Ang Enero mao ang tukmang bulan sa pagtinguhang makasugod sa bag-ong mga pagtuon sa Bibliya. Atong itanyag ang daandaang mga basahon, nga kadaghanan niini adunay mga pangutana sa ubos sa mga parapo nga magamit sa pagpasundyag sa usa ka pagtuon sa Bibliya. Ang maayong paagi sa pag-ugmad sa interes sa tagbalay mao ang paggamit sa mga sugyot nga anaa sa librong Nangatarongan.
4 Atong ikapasiugda ang ulohan sa kalinaw sa kalibotan pinaagig paggamit sa mga pasiuna nga gisugyot sa panid 14 sa librong Nangatarongan ubos sa “Gubat/Kalinaw.” Adunay tulo ka lainlaing paaging gitala sa pagsugod ug panaghisgot niining ulohana. Ang pagdasig sa mga tawo sa pagpangita sa tubag sa Bibliya sa pangutanang “Kalinaw sa Kalibotan—Haduol Na ba Kini?” hayan magbukas sa dalan alang sa pagtuon sa Bibliya.
5 Ubos sa sub-ulohang “Pagtuon sa Bibliya sa Balay” sa panid 12 sa maong librong Nangatarongan, adunay duha ka sugyot nga mapuslanon sa pagtultol sa pagtagad ngadto sa basahong gitanyag. Kon gamiton mo ang laktod nga paagi sa pagsugod ug pagtuon sa Bibliya, imong masundog ang maayo kaayong mga sugyot nga anaa sa Oktubre 1991 nga Atong Ministeryo sa Gingharian.
6 Salig Kang Jehova: Aron magmalamposon sa buluhatong pagtuon sa Bibliya, ato gayong hinumdoman nga ang kalamposan makab-ot lamang uban sa tabang ni Jehova. Siya ang may yawing papel nga gidula diha sa atong mga panlimbasog sa pagbulig sa katawhan. (1 Cor. 3:6) Busa, kinahanglan kitang mag-ampo dili lamang bahin sa pagkakaplag sa tawo nga matun-an kondili maylabot sa progreso nga nahimo sa mga interesado nga atong nakaplagan. (Juan 16:23) Kinahanglang atong hinumdoman nga kita “mga isigkamamumuo sa Diyos.”—1 Cor. 3:9.