Pagpayunir—Buluhaton nga Magpatunghag Dagayang mga Ganti
1 Si Jehova gustong kita managmaya ug makasud-ong nga maayo sa tanan natong paghago. (Eccl. 5:18) Ang labing importanteng buluhaton nga kita mapalangkit mao ang buluhatong pagsangyaw sa Gingharian ug paghimog tinun-an. Si Pablo mitambag kang Timoteo: “Buhata ang buluhaton sa ebanghelista, sa bug-os tumana ang imong ministeryo.” (2 Tim. 4:5) Alang sa pipila, ang bug-os nga pagtuman sa ilang ministeryo mahimong magkahulogan sa pag-alagad ingong regular payunir. Nganong di sa mainampoon tagdon ang imong mga kahimtang kon kana magpaarang ba kanimo sa pagsulod sa bug-os-panahong ministeryo?
2 Positibong Aksiyon Gikinahanglan: Aron makasulod sa buluhatong payunir gikinahanglan ang paghimog malig-ong mga tikang uyon sa atong mga pag-ampo. Ugmara ang kinasingkasing nga tinguha alang sa buluhaton ni Jehova, uban sa gugma alang sa katawhan. Pauswaga ang imong kalihokan sa kanataran, nga nagatukod ug mga balikduaw ug mga pagtuon sa Bibliya. Hagoi ang paghimog mapuslanong eskedyol. Pangayoa ang mga sugyot gikan sa mga ansiyano ug mga payunir. Motapot sa regular nga naandan para sa pakig-ambit sa buluhatong pagsangyaw. Gikinahanglan ang disiplina-kaugalingon ug determinasyon. (1 Cor. 9:23, 25, 27) Mao kini ang lakip sa positibong mga tikang nga gihuptan niadtong nagpatala sa di pa dugayng mga bulan.
3 Ang pagpahimutag tinong mga tumong ug makugihong pagbuhat niana magpaarang kanato sa pagkahimong mauswagon sa atong pagsangyaw. Ato bang mapauswag ang atong mga pasiuna o ang paagi sa atong pagdumala sa mga pagsupak? Kita ba nagadumalag mauswagong pagtuon sa Bibliya? Kita ba makasugod na karon sa katabang nga pagpayunir uban sa panghunahuna sa regular nga pagpayunir sa ulahi? Ang mga tumong kinahanglang mapuslanon ug ipahimutang sumala sa atong maarangan sa pagpalampos.—1 Tim. 4:15, 16.
4 Usa ka Magantihong Paagi sa Kinabuhi: Ang pagpayunir uban sa hustong motibo magpatunghag daghang kaayohan. Atong maugmad ang mas malig-ong pagsalig kang Jehova. Atong maugmad ang mas dakong kahanas sa pagdumala sa Pulong sa Diyos. Ang maayong impluwensiya mahimo diha sa kongregasyon, ug ang uban mahimong mapalig-on sa pagbaton ug mas dakong pakig-ambit sa ministeryo tungod sa atong masibotong panig-ingnan. Ang pagpayunir makabulig kanato sa paghupot ug dugang espirituwal nga panglantaw sa kinabuhi ug makapanalipod kanato gikan sa kalibotanong mga ambisyon ug mga pakig-uban.
5 Si Jesus miingon sa iyang mga sumusunod: “Ang anihon maoy dako, apan diyutay ra ang mga mamumuo. Busa, pangamuyo sa Agalon sa anihon nga magpadalag mga mamumuo ngadto sa iyang anihon.” (Mat. 9:37, 38) Ang panginahanglan sa mga mamumuo mas dako pa gani karon kay sa adlaw ni Jesus. Ang pagpayunir magpaarang kanatog higayon sa pagbatog bug-os nga pakig-ambit niining dinalian, nagaluwas-kinabuhing buluhaton. Wala gayod ing makatupong sa pagkakontento ug katagbawan nga magaduyog sa paggamit sa usa sa iyang kinabuhi diha sa bug-os-panahong pag-alagad sa atong Dakong Maglalalang.—Prov. 10:22.