Usa ka Linaing Adlaw sa Pagtanyag ug mga Pagtuon sa Bibliya
1 Sugod sa Enero, ang tanang kongregasyon mogahin ug usa ka hinapos sa semana matag bulan, tingali sa unang semana, aron sa pagtanyag ug mga pagtuon sa Bibliya. Kini mahimong adlawng Sabado o Dominggo, depende kon unsay mas haom sa inyong kongregasyon. Kon nianang adlawa dili dawaton sa tagbalay ang tanyag nga pagtuon, mahimong itanyag gihapon sa magmamantala ang librong Gitudlo sa Bibliya o ang kinabag-ohang mga magasin. Ang tanang ansiyano ug ministeryal kinahanglang maningkamot gayod nga makigbahin niini nga kalihokan ug tabangan ang mga magmamantala sa pagsugod ug mga pagtuon sa Bibliya.
2 Ang Komite sa Pag-alagad sa Kongregasyon maoy magtino kon unsa nga hinapos sa semana ug kon unsang adlawa ang igahin alang sa pagtanyag ug mga pagtuon sa Bibliya. Kinahanglang pahinumdoman matag karon ug unya ang mga magmamantala bahin niini aron sila makapangandam ug makahatag ug linaing pagtagad sa pagtanyag ug mga pagtuon sa Bibliya diha sa pagpamalaybalay ug sa pagduaw niadtong mga nagpakitag interes di pa dugay.
3 Kon Unsaon Pagpangandam: Ang mga sugyot kon unsaon pagsugod ug mga pagtuon sa Bibliya makaplagan diha sa Enero 2006 nga pasukip sa Atong Ministeryo sa Gingharian ug sa panid 12 sa librong Nangatarongan. Ang uban lagmit mogamit ug tract, sama sa Gusto Ka Bang Mahibalo sa Kamatuoran? Ang panid 4 sa Abril 2007 nga Atong Ministeryo sa Gingharian naghatag usab ug mga sugyot kon unsaon pagsugod ug mga pagtuon sa Bibliya sa dihang kita moduaw niadtong atong napahimutangan ug mga magasin. Ang mga ansiyano ug ministeryal iasayn sa pagdumalag mubong tigom sa dayon nang pagsangyaw, mga 10 hangtod 15 minutos, diin hisgotan o ipasundayag ang usa o duha ka praktikal nga mga sugyot sa pagsugod ug mga pagtuon sa Bibliya.
4 Siyempre, dili tanan ang modawat ug pagtuon sa Bibliya o molahutay sa pagtuon. Dili kini angayng mopugong kanato sa pagbuhat niana tungod kay si Jehova mao ang nagkabig sa mga tawong karnerohon ngadto sa iyang organisasyon. (Juan 6:44) Ang atong responsibilidad dili lamang mao ang pagpugas ug mga binhi sa kamatuoran kondili ang pag-ugmad ug pagbisibis usab niadtong nakagamot na, ug kana naglakip sa pagdumalag pagtuon sa Bibliya niadtong mga tawong interesado. Sa pagbuhat niana, kita mahimong mga isigkamagbubuhat sa Diyos.—1 Cor. 3:9.