Pagtanom ug Pagbisibis—Mga Tikang Ngadto sa Paghimog mga Tinun-an
1 “Ako ang nagtanom, si Apolos ang nagbisibis, apan ang Diyos mao ang nagapadayon sa pagpatubo niini.” (1 Cor. 3:6) Sa ingon gipaila ni apostol Pablo ang tulo ka sukaranang mga lakang diha sa pamaagi sa paghimog mga tinun-an ni Kristo. Ang unang duha ka tikang, ang pagtanom ug pagbisibis, naglakip sa usa ka pribilehiyo ug kaakohan nga nahiluna diha sa dedikado, bawtismadong mga alagad sa Diyos.
2 Kini nanginahanglan alang sa publikong pagwali ug diha sa pamabalaybalay, sa impormal, ug sa ubang mga paagi. Nalakip usab niini ang mauswagong pagtudlo sa katawhan nga motuman sa tanang mga butang nga gisugo ni Jesus. (Mat. 28:19, 20) Kining ulahing lakang matuman lamang pinaagig paghimog balikduaw niadtong nagapakitag interes, paglangkit nila diha sa panaghisgot sa Bibliya, ug pagdumalag mga pagtuon sa Bibliya nganha kanila. Gipamatud-an ba nimo ang imong kaugalingon ingon nga maunongong isigka-magbubuhat, nga nakigtambayayong kang Jehova diha sa pagtanom sa mga binhi sa kamatuoran ug unya nagapadayon sa gikinahanglang pagbisibis ug pag-ugmad?—1 Cor. 3:9.
ILHA ANG PUROHAN UG PANGINAHANGLAN
3 Sa Pilipinas sulod sa 1990 tuig sa pag-alagad, atong napanagtag ang hapit 900,000 ka libro ug pulyeto ug duolan sa 4.7 milyon nga mga magasin! Nabatonan usab nato ang kapin sa 317,000 ka tawong nanambong sa Memoryal, nga milabaw kaayo sa 100,571 nga aberids sa magmamantala sa maong tuig. Ang pag-apod-apod sa literatura maoy usa ka hinungdanong bahin sa atong buluhaton nga pagtanom. Busa ang mga binhi sa kamatuoran nga napugas nagahupot ug dakong purohan sa pagpatunghag bag-ong mga tinun-an, apan kita ba, ingon nga isigka-magbubuhat sa Diyos, mapalihok nga mohimog balikduaw nianang mga tawhana ug ugmaron ang ilang mga interes sa mga topiko sa Bibliya? Ang mga magmamantala sa kongregasyon sa Pilipinas karon naga-aberids ug 0.3 ka pagtuon sa Bibliya. Kita masaligon nga kining maong aberids mouswag kon ang matag magmamantala mohatag ug tininuod pa nga pagpabili sa iyang personal nga responsabilidad sa pagpadayon nga saylo pa kay sa unang lakang nga pagpugas lamang sa mga binhi sa kamatuoran ug magapangab-ot nga makadumala ug mauswagong mga pagtuon sa Bibliya sa balay. Bisan pa nga ang pipila, tungod sa nagkalainlaing limitasyon, tingali dili makadumalag usa o labaw pang mga pagtuon sa Bibliya sa balay, maoy maayo alang sa matag usa nga repasohon ang iyang personal nga mga kahimtang.
4 Makapaikag ang paglantaw kon unsay nagakahitabo sa pipila ka bahin. Ang mga kongregasyon adunay mabungahong teritoryo ug nagtahog aberids nga gikan sa usa ngadto sa duha ka pagtuon sa Bibliya sa kada magmamantala. Ang pag-uswag sa bag-ong mga tinun-an nahiangay sa gidaghanon sa mga pagtuon sa Bibliya nga ginadumala. Kini makita pinaagig pagtandi sa aberids nga gidaghanon sa mga magmamantala ug sa gidaghanon sa mga pagtuon sa Bibliya diha sa nagkalainlaing mga nasod ingon sa gitaho sa 1991 Yearbook.
5 Ang mopalihok nato sa pagdumalag mga panagtuon sa Bibliya kinahanglan nga mao gayod ang atong gugma sa katawhan kinsa mosanong sa mensahe sa Gingharian nga atong gisangyaw. Kinahanglan nga sinsero tang moambit sa mahigugmaong kahingawa ni Jehova sa katawhan ug magpabili nga ang ilang kaluwasan nalangkit sa espirituwal nga pagtubo. (1 Ped. 2:2) Sama sa literal nga mga tanom nga nagkinahanglag tubig aron pag-amoma sa ilang paglambo, ang mga tawo nga nagpakitag pasiunang interes sa mensahe sa Gingharian dili kasagaran mosugod dayon sa pagtambong sa mga tigom gawas kon pinaagig mga pagtuon sa Bibliya sa balay sila regular nga gitultolan ngadto sa kapunongan sa Diyos.
6 Ang pagkamasinugtanon sa atong bahin mosulod usab diha sa hulagway. Si Jesus miingon nga kadtong dapig sa kamatuoran nagapatalinghog sa iyang tingog. (Juan 18:37) Iyang gisugo ang iyang mga tinun-an sa pagwali ug pagpanudlo, ug siya nagsangkap nila aron makatuman sa maong buluhaton. Pinaagi sa iyang talagsaong panig-ingnan ingon nga magtutudlo ug pinaagi sa iyang lalom nga kabalaka sa katawhan, si Jesus nagpahilunag sumbanan nga atong sundon diha sa pagtabang sa uban. (Luc. 6:40; Juan 13:13; 14:12) Ang atong mga paningkamot makaamot ngadto sa kaluwasan sa atong kaugalingon ug kanilang atong gitudloan.—1 Tim. 4:16.
MGA TABANG SA PAGSUGOD UG MGA PAGTUON SA BIBLIYA
7 Aron paghingpit sa iyang trabaho, ang usa ka hanas nga magbubuhat mopilig iyang mga galamiton diha sa nagkalainlaing mga kasangkapan nga anaa sa iyang pagbuot. Ingon nga mga magtutudlo, anaa sa atong pagpaigo ang daghang publikasyon, lakip na ang mga brosyur ug tracts, nga gidesinyo ingon nga galamiton sa pagbulig nato nga maabot ang kasingkasing sa katawhan diha sa nagkadaiyang kagikan ug pagpanglantaw.
8 Ang pipila ka magmamantala nakasinatig mga maayong sangpotanan diha sa paggamit sa ‘tracts’ ug mga brosyur aron makasugod ug mga panaghisgot sa Bibliya. Pananglitan, ang tract nga Kinabuhi sa Malinawong Bag-ong Kalibotan nagsitar o nagkutlo sa kapin sa 20 ka nagkalainlaing teksto sa paglaraw niining katingalahang paglaom. Kining mga kasulatana magamit aron pagtagik ug ubay-ubay nga makapasibot nga panaghisgot sa Bibliya. Ang atong mga brosyur, diha sa makadani-sa-mata ug yanong paagi, makapasinati usab sa katawhan sa pasukaranang kamatuoran sa Bibliya ug makadasig nilang mosusig dugang.
9 Aduna ka bay nailhan nga limitadog edukasyon o may suliran nga panan-aw? Nasulayan ba nimo ang paggamit sa brosyur nga Tagamtama ang Kinabuhi sa Yuta sa Walay Kataposan! sa pagtukod ug mauswagong panaghisgot sa Bibliya sa maong tawo? Ang “Tan-awa!” nga brosyur maoy laing maayong galamiton nga may pang-abling mga parapo nga mahanasong nagalakip sa tagbalay sa pagkat-on mahitungod sa mga saad sa Diyos sa umalabot. Ug tino nga ang librong Ikaw Mabuhing Walay Kataposan sa Paraiso sa Yuta, nga giluwatan niadtong 1982, epektibo sa pagbulig sa dakong porsiyento sa kapin sa 1,700,000 nga nabawtismohan na sukad sa maong panahon.
NAGALIHOK NGA RESPONSABLE NGADTO SA MGA INTERESADO
10 Makaplagan nimong mapuslanon ang pagsusi sa imong ‘Congregation’s Publisher Record card’ ug matikdi ang gidaghanon sa mga libro, pulyeto (lakip na ang mga brosyur), ug mga magasin nga imong napahimutang sa milabay nga 12 ka bulan. Diha ra ba kutob kanang mga basahona nga napahimutang? O nagpadayon ka ba saylo pa sa lakang sa pagtanom? Niadtong mga tawo nga nagpakitag igong interes sa pagkuha ug pipila sa atong literatura, pila man kanila ang imo dayong gipakigkitaan pag-usab? Mibalik ka ba aron pagsusi kon miturok ba ang binhi nga imong gipugas? Ikaw ba nagpadayon sa gikinghanglang pagbisibis ug unya nagaampo kang Jehova nga patuboon kana?—Itandi ang Buhat 16:14 ug 2 Tesalonica 3:1.
11 Tingali wala ka maghimog balikduaw o magdumalag pagtuon sa Bibliya tungod kay gibati mong nakulangan. Malagmit, ang labawng hinungdan niini mao ang imong tinamdan inay sa kakulang sa katakos. Si Jehova wala magpadala sa iyang katawhan aron mohimog buluhaton nga walay igong pagsangkap ug pagpatakos kanila. Pinaagi sa iyang balaang Pulong ug organisasyon, siya nagapaandam nato sa “tanang maayong buluhaton.” (2 Tim. 3:16, 17; 2 Cor. 3:5, 6) Pinaagig balaang espiritu, pinatik nga panid, ug binabang instruksiyon ug mga pasundayag diha sa plataporma, wala pa mahisgoti ang buhing mga ehemplo sa hanas ug debotadong mga alagad nga andam motabang nato, Siya nagahatag nato sa atong gikinahanglan. Dili na nato kinahanglan ang mas taas pa nga edukasyon sa kalibotan aron makadumalag usa ka pagtuon sa Bibliya. Gikinahanglan ta gayod nga mosanong sa superyor espirituwal nga edukasyon nga gihatag pinaagi sa organisasyon ni Jehova.—Itanding Buhat 4:13.
12 Ang personal nga pagpadapat sa gitagana diha sa Atong Ministeryo sa Gingharian, sa Teokratikanhong Ministeryong Tunghaan, mga Tigom sa Pag-alagad, ug uban pang mga paagi sa pahimangno gikinahanglan. Si apostol Pablo madayganong miingon ngadto sa Hebreohanong mga Kristohanon: “Kay samtang niining panahona karon angayan na unta kamo nga mahimong mga magtutudlo, nanginahanglan man gihapon nga adunay motudlo kaninyo gikan sa sinugdan sa nahaunang mga butang sa balaang kapahayagan sa Diyos.” (Heb. 5:12) Ang usa ka tawo nga nagatrabaho sa usa ka matang sa buluhaton sulod sa ubay-ubay nang katuigan gidahom nga nakaangkon na ug igong kahanas sa paggamit sa iyang mga herimenta. Ang kauswagan sa pagkat-on kon unsaon pagdumala ug mga panaghisgot sa Bibliya madayag sa dihang gipakita nato ang sinserong kaikag ug mohimog makugihong paningkamot.—Prov. 12:24; 22:29.
13 Ang pagbalikduaw ug dugang pakighisgot sa mga topiko sa Bibliya niadtong nagapakitag interes sa mensahe sa Gingharian nagakinahanglan gayod ug panahon ug panikaysikay. Apan angay natong pabilhan nga ang atong pagkaanaa sa kamatuoran maoy kapahayagan sa gugma ug di-takos nga kalulot ni Jehova. Kini gipahayag kanato pinaagi sa usa nga migugol ug daghang mga oras sa mapailubong pagtudlo nato sa kamatuoran. Sa susama, ang gugma kinahanglang motukmod nato nga mopahimulos sa gikinahanglang panahon ug ideboto kana sa mas importanteng buluhaton sa paghimog tinun-an.—2 Cor. 5:14, 15; Efe. 5:15, 16.
14 Daghang kongregasyon misunod sa sugyot sa Sosyedad nga mohimog mga kahikayan alang sa magabiing pagpanaksi. Ang sayong mga oras sa gabii kasagaran maayong panahon sa pagbalikduaw niadtong nagpakitag interes. Ang balay-balay nga talaan, nga nagtaganag nahiangay nga impormasyon bahin sa mga tawong nasangyawan, hinungdanon sa paghimog epektibong mga balikduaw ug pagsugod ug mga panaghisgot sa Bibliya. Ayawg isilip-it kanang maong talaan sa libro o sa Bibliya ug dayon kalimtan kana. Ang dili paghinumdom nga mohimog balikduaw hangtod mga semana na sa ulahi sa dihang anaa ka sa kasilinganan nagatugyan sa maong tawo nga bukas sa mga pagduaw sa mga ahente ni Satanas, kinsa malipay nga mosakmit kon unsay napugas diha sa kasingkasing sa tawo. (Luc. 8:12) Mapakgang ba nimo ang mga taktika ni Satanas pinaagig pagbalikduaw dayon? Kon giila mo ang imong kaakohan ug mipabili sa imong pribilehiyo, mobalik ka gayod dayon, sa dihang kana posible.—1 Cor. 9:16, 23.
KON UNSAON PAGSUGOD ANG USA KA PAGTUON SA BIBLIYA
15 Ang pagsugod ug pagtuon sa Bibliya wala maglakip sa malisod, komplikado nga pamaagi. Ang pipila ka tawo mahimong daling modawat sa imong diretsong tanyag nga modumalag pagtuon sa Bibliya sa panimalay uban nila. Hinuon, daghang magmamantala mopalabi nga dili mohisgot ug pagtuon apan idiretso na lamang ang panaghisgot sa Bibliya ngadto sa maong tumong.
16 Ang gugma sa katawhan ug ang sinserong tinguha nga motabang nila gikinahanglan. Ang maayong pagpangandam kinahanglan usab. Kini angayng mag-apil sa pagrepaso sa mga nota nga imong nahimo sa nahisgotan na nimo uban sa maong tawo ug pagdesider diha sa paagi nga imong himoon alang sa dugang panaghisgot sa Bibliya. Batoni ang kinatibuk-ang tumong sa imong mga komento diha sa hunahuna. Mopili ka ba ug dugang pipila ka teksto sa ulohan nga inyong nahisgotan sa miagi? O mapakli ba nimo ang ‘tract’ o libro nga anaa sa tawo ug tagdon ang pipila unang mga parapo uban kaniya? Mahimong pilion nimo ang ulohan nga mipadayag siyag interes. Sa sinugdan, gugola lamang ang 10 o 15 ka minuto. Ang panahon mahimong inanayng patas-on, depende sa kalalom sa interes nga gipakita. Ang imong maayong panghukom makatabang gayod kanimo sa pagsabot kon unsaon sa pagpadayon ug kon unsa ka dugay nga magpabilin.
17 Latas sa mga katuigan gihatag na ang dagaya makatabang nga mga sugyot sa pag-abag kanimo ngadto sa mauswagong mga tikang sa paghimog mga tinun-an. Ingon nga bahin sa usa ka serye, ang Nobyembre ug Disyembre 1990 nga mga isyu sa Atong Ministeryo sa Gingharian nagdalag makabulig nga mga artikulo nga nag-ulohang “Abota ang mga Kasingkasing Pinaagig Epektibong mga Pagtuon sa Bibliya” ug “Pagtultol sa mga Estudyante sa Bibliya Ngadto sa Kapunongan ni Jehova.” Ang Atong Ministeryo sa Gingharian sa Abril 1987 nasudlan sa artikulong “Pagpangandam ug Pagdumalag mga Pagtuon sa Bibliya sa Balay.” Ang daling pagsusi sa Index ubos sa “Bible Studies” magatultol nimo sa dugang makabulig nga impormasyon.
18 Ingon nga sumbanan kon unsaon pagdumalag pagtuon, tagda kon unsay ginahimo diha sa Pagtuon sa Libro sa Kongregasyon. Siyempre, diha sa pagtuon sa Bibliya sa balay, walay tinudlo-daan nga gidak-on sa materyal nga imong kobrehan. Busa kinahanglang imong inunot ang imong pagkobre sa materyal sumala sa katakos ug panginahanglan sa estudyante. Dugang pa, ang magtatan-aw sa pag-alagad ug ubang eksperiyensiyadong mga magmamantala ug mga payunir malipay gayod nga mokuyog nimo ug motanyag sa mapuslanong mga sugyot sa pagdumalag epektibong pagtuon sa Bibliya.
19 Tungod kay nakaamgo nga si Jehova nagadulag yawing papel sa atong panikaysikay sa pagtabang sa katawhan, kita mag-ampo gayod dili lamang bahin sa pagkaplag ug usang atong matun-an kondili mahitungod usab sa pag-uswag sa mga interesado nga atong nakaplagan. Ang atong tinamdan ug pagbati angay nga mahisama nianang kang apostol Pablo sa dihang nagpamatuod ngadto kang Haring Agripa: “Ako nagapangamuyo sa Diyos nga sa madali o madugay dili lamang ikaw ra kondili usab ang tanang nakadungog kanako karong adlawa mahimo untang ingon kanako.” (Buh. 26:29) Buot ni Pablo nga ang iyang mamiminaw mahimong lunsay nga mga tinun-an ni Kristo, bisan kon kini nagkinahanglag hamubo nga panahon o mas lugway nga panahon sa personal nga pag-abag.
20 Ang pagdumalag mga pagtuon sa Bibliya makapaarang nato ngadto sa “bug-os nga pagpamatuod sa maayong balita sa di-takos nga kalulot sa Diyos.” (Buh. 20:24) Ang di-maihap nga gidaghanon mahimo pang mapaliso gikan sa kangitngit ngadto sa kahayag ug gikan sa pagbulot-an ni Satanas ngadto sa Diyos. (Buh. 26:18) Ikaw, ang indibiduwal nga dedikado, bawtismadong alagad ni Jehova, kinahanglang mobuhat sa imong bahin sa pagtanom sa mga binhi sa kamatuoran ug unya padayonon kana uban sa gikinahanglang pagbisibis pinaagi sa mga panaghisgot sa Bibliya ug makanunayong mga pagtuon sa Bibliya sa balay. Sa ingon makaplagan mo ang dakong kalipay sa paglantaw sa katawhan nga mahimong mga tinun-an ug moduyog kanimo sa pagbulig sa uban pa nga mahimong mga disipulo ni Kristo Jesus.