Gikinahanglan—Dugang mga Pagtuon sa Bibliya
1 Si Jehova nga Diyos nagapanalangin sa iyang yutan-ong organisasyon uban ang padayong pagtubo. Sa miaging tuig sa pag-alagad, 375,923 ang nabawtismohan sa tibuok kalibotan—usa ka aberids nga kapin sa 1,000 ka bag-ong tinun-an sa matag adlaw, o mga 43 kada oras! Sa nagkalainlaing bahin sa kalibotan, ang buluhaton sa Gingharian nagalambo ug nasinati ang dagkong mga pag-uswag, bisan pa sa mga dekada sa kalisod nga hayan giatubang sa atong mga igsoon. Makapadasig ang pagbasa sa pag-uswag nga ginahimo sa pagpakaylap sa maayong balita!
2 Sa sanga sa Pilipinas sa miaging tuig sa pag-alagad, kita usab nakakitag mga pag-uswag diha sa aberids nga total sa mga magmamantala ug mga oksilyare payunir, sa mga oras nga gigugol sa pagsangyaw, ug diha sa gidaghanon sa mga bokleta, mga brosyur, ug napahilunang mga magasin. Dihay pag-uswag sa gidaghanon nga nabawtismohan ug ang tanang-panahong kinatas-an nga mitambong sa Memoryal. Komosta ang kalihokang mga balikduaw ug pagtuon sa Bibliya? Mius-os kita sa gidaghanon sa gihimong mga balikduaw ug mga 5-porsiyentong pag-us-os sa mga pagtuon sa Bibliya. Ug ngani, kini nga mga bahin sa ministeryo maoy buot ipasabot sa buluhaton sa paghimog tinun-an. Unsay mahimo sa matag usa kanato sa pagbali niining paus-os nga hilig sa mga balikduaw ug mga pagtuon sa Bibliya?
3 Palig-ona ang Tinguha sa Pagdumalag Usa ka Pagtuon: Kita mismo kinahanglang magpunting sa kalig-on ug kaaktibo sa espirituwal. Ang tinuod nga mga sumusunod ni Kristo maoy mga “masiboton sa maayong mga buhat.” (Tito 2:14) Sa dihang atong sublion ang atong ministeryo, kita ba makaingon nga kita sa kamainiton andam sa pagbalik sa tanang napahilunang literatura sa kanataran? Kita ba masiboton bahin sa pagtanyag ug mga pagtuon sa Bibliya sa balay ngadto sa tanan kinsa nagapakitag interes? (Roma 12:11) O kita ba nanginahanglan sa pag-ugmad ug mas dakong tinguha sa paghimog mga balikduaw ug sa pagsugod ug mga pagtuon sa Bibliya sa balay?
4 Ang personal nga pagbasa sa Bibliya, regular nga pagtambong sa tigom, ug pagtuon sa mga publikasyon padayong magpahimo kanatong buhi sa espirituwal ug mapalig-on sa espiritu sa Diyos. (Efe. 3:16-19) Kini maglig-on sa atong pagtuo ug pagsalig kang Jehova ug sa atong gugma sa atong isigkatawo. Kita madasig sa pagtudlo sa kamatuoran ngadto sa uban, busa magahimo sa atong ministeryo nga makapainteres, malamposon, ug makapadasig. Oo, kita kinahanglang gustog dugang mga pagtuon sa Bibliya!
5 Pagtuon Uban sa Pamilya Pag-una: Ang Kristohanong mga ginikanan kinsa adunay mga anak nga nagapuyo sa balay angayng mabalaka sa ilang programa sa regular nga pagtuon sa Bibliya sa pamilya. (Deut. 31:12; Sal. 148:12, 13; Prov. 22:6) Mapuslanon kaayo alang sa mga ginikanan ang pagtuon sa Gikinahanglan nga brosyur ug dayon ang Kahibalo nga libro uban sa ilang mga anak sa pag-andam kanila sa kuwalipikasyon ingong di-bawtismadong mga magmamantala ug sa pahinungod ug bawtismo. Siyempre, ang dugang materyal mahimong tagdon, depende sa panginahanglan ug sa edad sa bata. Ang ginikanan nga magtuon sa di-bawtismadong bata mahimong magtaho sa pagtuon, oras, ug mga balikduaw, ingon sa gilaraw sa “Pangutana” sa Hunyo 1987 nga Atong Ministeryo sa Gingharian.
6 Pauswaga ang Personal nga Organisasyon: Sa pagtagad sa gidaghanon sa mga magasin, mga brosyur, ug mga librong napahiluna, walay duhaduha nga ang dakong gidaghanon sa binhi nasabwag. Kining mga binhia sa kamatuoran nga napugas adunay dakong potensiyal sa pagpatunghag bag-ong mga tinun-an. Apan ang usa ka magbabaol o hardinero matagbaw ba gayod kon siya padayong nagtanom ug, human sa iyang tanang paningkamot, wala gayod maggahin ug panahon sa pag-ani? Dili gayod. Sa susama, ang matiwason nga ministeryo kinahanglanon.
7 Regular ka bang nag-eskedyul ug panahon sa paghimog mga balikduaw? Balika dayon ang tanang nakaplagang interes. Paghimog mga balikduaw uban ang tumong sa pagsugod ug usa ka pagtuon sa Bibliya. Naghupot ka ba ug hinlo, nunot-panahon, ug organisado kaayong talaan sa imong mga balikduaw? Duyog sa ngalan ug adres sa tagbalay, tinoa ang pagtala sa petsa sa unang duaw, sa bisan unsang mga napahiluna, sa mubong saysay kon unsay nahisgotan, ug usa ka punto nga ugmaron sa sunod nga duaw. Bilinig lugar ang imong talaan alang sa dugang impormasyon nga ikadugang human sa matag balikduaw.
8 Analisaha ang Paagi sa Paghimog Balikduaw: Unsa ang pipila ka puntos nga hinumdoman sa dihang mobalikduaw sa usa ka interesadong tawo? (1) Magmainiton, mahigalaon, madasigon, ug inato. (2) Paghisgot ug mga ulohan o mga gumonhap nga makapainteres kaniya. (3) Hupti ang panaghisgot nga yano, makapainteres, ug Kasulatanhon. (4) Sa matag duaw, panlimbasog sa pagtudlo sa tagbalay ug butang nga iyang maila ingon nga hinungdanon kaniya sa personal. (5) Tukora ang kahinam sa ulohan nga hisgotan sa sunod nga duaw. (6) Ayaw kaayo pagdugay. (7) Ayaw pagsuknag mga pangutana nga makapaulaw sa tagbalay o magbutang kaniya sa lisod nga kahimtang. (8) Magmaalamon nga dili magkondenar sa sayop nga mga panglantaw o daotang mga batasan sa tagbalay antes maugmad ang apresasyon sa espirituwal.—Tan-awa ang pasukip sa Marso 1997 nga Atong Ministeryo sa Gingharian alang sa dugang tabang kon sa unsang paagi magmalamposon sa paghimog mga balikduaw ug pagsugod ug mga pagtuon sa Bibliya.
9 Susiha ang Matag Posibilidad: Sa usa ka kongregasyon, naposible ang pagkuha sa mga ngalan ug mga numero sa apartment sa tanang namuyo diha sa binantayan-pag-ayong pasilidad sa pamalay. Usa ka personal nga sulat ang gisulat ngadto sa matag usa ka molupyo, ug duha ka tract ang gisukip. Sa kataposan sa sulat, gitanyag ang usa ka pagtuon sa Bibliya sa balay ug ang lokal nga numero sa telepono gilakip aron ang makadawat makatawag. Sulod sa pipila ka adlaw, usa ka batan-ong lalaki mitawag nga naghangyog usa ka pagtuon. Gihimo ang balikduaw sa pagkasunod adlaw, ug ang usa ka pagtuon nasugdan diha sa Kahibalo nga libro. Nianang gabhiona mismo siya mitambong sa Pagtuon sa Libro sa Kongregasyon, ug siya nagpadayon sa pagtambong sa tanang tigom. Halos dihadiha, siya misugod sa regular nga pagbasa sa Bibliya kada adlaw. Matubayon ang iyang pag-uswag ngadto sa bawtismo.
10 Ang mga magmamantala sa usa ka grupo naghikay sa paghimog pipila ka balikduaw nga magkauban. Dihang usa ka sister mibalik sa usa sa iyang mga duawonon, ang tawo nga iyang gipangita wala sa balay, apan laing batan-ong babaye ang mitubag diha sa pultahan, nga miingon: “Dugay na akong naghulat kaninyo.” Ang tagbalay nakadawat na ug Kahibalo nga libro nga una pa niana gikan sa usa ka kaila. Sa panahong ang mga sister misangpit kaniya sa pultahan, kaduha na niya nahuman pagbasa ang libro ug nakadayeg pag-ayo sa impormasyon nga anaa niana. Siya miingon nga wala siya matingala sa pagkakita sa mga Saksi nga miduaw kaniya sa maong adlaw tungod kay siya kanunay nang nag-ampo nga sila moabot ug magtuon sa Bibliya uban kaniya. Ang pagtuon nasugdan, misugod siya sa pagtambong sa mga tigom sa kongregasyon, ug siya kusog nga miuswag.
11 Usa ka sister, nabawtismohan ug duolag 25 na ka tuig, di pa dugay mihatag sa iyang inahan ug usa ka Kahibalo nga libro. Ang iyang inahan, usa ka membro sa simbahan, misugod sa pagbasa sa libro. Human niya mabasa ang duha ka kapitulo, iyang gitawag ang iyang anak nga babaye ug, sa kakurat sa anak nga babaye, miingon: “Buot kong mahimong usa sa mga Saksi ni Jehova!” Ang inahan misugod sa pagtuon ug karon bawtismado na.
12 Sulayi Kining mga Sugyota: Nagamit mo na ba ang deretsong paagi sa pagsugod ug mga pagtuon? Ikaw yanong makaingon: “Kon buot ka ug usa ka libreng pagtuon sa Bibliya sa balay, akong ikapakita kanimo sa pipila ka gutlo kon unsaon kini pagbuhat. Kon makagusto ka niana, ikaw makapadayon.” Kon himoon nianang paagiha, daghang tawo dili magpanuko sa pagdawat sa tanyag ug maniid sa pagpasundayag sa usa ka pagtuon sa Bibliya.
13 Sa bag-o pang pagsugod sa pagtuon, ipakita sa estudyante kon sa unsang paagi mangandam nga abante pinaagi sa pagbasa sa gisitar nga mga kasulatan ug paglinya sa yawing mga pulong sa pagtubag sa pinatik nga mga pangutana. Tagda lamang ang pangunang mga puntos. Bisan tuod kinahanglan kitang magmapailin-ilinon sa unang pipila ka sesyon, hinungdanon nga ang pagtuon sa Bibliya himoon sa regular nga paagi. Ibutang sa hunahuna kon sa unsang paagi imong ikapaila ang pag-ampo ingon nga hinungdanong bahin sa pagtuon ug kon sa unsang paagi imong maandam sa Kasulatanhong paagi ang estudyante sa pagsupak. Sa walay sipyat, himoang buhi ang pagtuon.
14 Siyempre, dili tanang estudyante sa Bibliya mouswag sa samang gikusgon. Ang pipila dili mahiligon sa espirituwal sama sa uban ni ingon kadali sa pagsagop sa mga butang nga ginatudlo. Ang uban nagakinabuhing puliki ug tingali dili makadeboto sa panahong gikinahanglan sa pagkobre sa tibuok nga kapitulo sa matag semana. Busa, sa pipila ka kaso kinahanglanon ang pagdumalag kapin sa usa ka sesyon sa pagtuon aron sa pagkobre sa tinong mga kapitulo ug ubang dugang mga bulan aron sa paghuman sa libro. Sa pipila ka higayon ato tingaling tun-an una ang Gikinahanglan nga brosyur ug unya ipadayon sa Kahibalo nga libro; alang sa uban, human makompleto ang Kahibalo nga libro, tingali atong makitang maayo ang pagtuon sa Gikinahanglan nga brosyur. Kini, dugangan pa sa ilang pagtambong sa mga tigom sa kongregasyon, magtabang sa matag estudyante sa pagbaton ug solidong pundasyon sa kamatuoran.
15 Labaw sa tanan, pag-ampo alang sa usa ka pagtuon sa Bibliya! (1 Juan 3:22) Ang usa sa labing magantihong mga kasinatian alang sa usa ka Kristohanon mao ang pagkahimong magamit ni Jehova nga may matabangan nga mahimong tinun-an ni Jesu-Kristo. (Buh. 20:35; 1 Cor. 3:6-9; 1 Tes. 2:8) Karon na ang panahon sa pagpakita ug dakong kasibot sa buluhatong pagtuon sa Bibliya, nga bug-os masaligon sa dagayang panalangin ni Jehova sa atong mga panikaysikay sa pagsugod ug dugang mga pagtuon!
[Blurb sa panid 3]
Nag-ampo ka ba nga makasugod ug usa ka bag-ong pagtuon sa Bibliya?