Ikaw ba Nagahimog mga Balikduaw?
1 Pagkamakapahinam nga report sa dinamikong kalihokan nga gipresentar diha sa 1989 Yearbook! Mga minilyon sa mga tawo ang nakadungog sa maayong balita ug mga minilyon sa literatura ang napahimutang. Ang taho nagbutyag nga aduna ing panginahanglan nga duawon pag-usab ang mga binhi sa kamatuoran nga napugas. (1 Cor. 3:6, 7) Ang dugang pag-atiman maoy hinungdanon. Tungod sa bug-os nga pakig-ambit niining buluhatona, ang katawhan ni Jehova nakahimog total nga 288,017,474 ka balikduaw sa miaging tuig.
KANUS-A?
2 Sa makaplagan mo ang interesadong mga tawo, nagahimo ka bag mga balikduaw sa dili pa mapalong ang unang interes? Ang pagbalikduaw sulod sa pipila ka adlaw sagad mopatunghag maayong mga resulta. Batoni ang kompletong rekord sa tanang napahimutang nga mga basahon ug ang interes nga imong nakaplagan. Sa regular sublia kining maong mga talaan aron tinoon nga mabalikduaw gilayon ang tanan niana. Ang imong kakugi ug pagkamapadayonon pagapanalanginan ni Jehova.
3 Nganong dili gugolon ang dugang panahon sa paghimog mga balikduaw ug sa pagsugod ug mga pagtuon sa Bibliya sa Abril? Aduna bay mga tawo nga regular nga magkuhaan sa mga magasin ug mahinangop sa pagtuon? Usa ka igsoong lalaki nakapahimutang ug duha ka magasin sa usa ka tawo pero wala balikduawa, nga naghunahuna nga dili gayod siya interesado. Ang maong tawo misulat ngadto sa kongregasyon, nga nangayo ug espirituwal nga tabang. Daghang payunir mitaho nga miresulta ang maayo kaayong mga pagtuon tungod sa pagbalikduaw sa napahimutang nga mga magasin. Aduna ba ing mga tawo nga nakatambong sa Memoryal o sa ubang mga tigom usahay kinsa buot sa pagtuon?
PAGSUGOD UG USA KA PAGTUON
4 Ang basahong Mabuhing Walay Kataposan maoy epektibong instrumento sa atong ministeryo. Kon makapahimutang ka ug usa, sa unang duaw ba o sa balikduaw, pangutan-a: “Imo na ba gayong napalandong ang pagkabuhi sa walay kataposan? [Tugoting motubag.] Siyempre, daghan ang dili gustong mag-antos sa walay kataposan sa kasakit, sa kabangis, ug gutom nga nagahampak sa daghan uyamot karon.” Samtang paklion ngadto sa mga panid 11-13, ikaw mosukna: “Apan ibutang ta nga ikaw mabuhi sa walay kataposan sa mga kahimtang nga sama niini. Dili ba kana makalilipay? [Tugoting motubag.] Ang pagkabuhi sa walay kataposan nagakinahanglan ug pipila ka tikang kanato. Matikdi ang giingon sa parapo 19. [Basaha.] Tugoting akong ipasundayag kon sa unsang paagi kining basahona makabulig kanimo sa pagbaton sa maong kahibalo.”
5 Ang mga magmamantala gidasig sa pagbilin ug ‘tracts’ uban kanilang dili mokuha sa regular nga tanyag o sa balay nga walay tawo. Kini magamit man sa mga balikduaw sa pagpasundayag sa atong paagi sa pagtuon. Ang matag tract nagahisgot sa duha o tulo ka puntos. Sa usa ka higayon basaha ang usa ka parapo uban sa tagbalay. Sa dihang may pangutana, hunong ug dapita ang tagbalay sa pagkomento. Tan-awa ug ipadapat ang mga teksto nga gisitar.
6 Ang kasinatian nagbutyag nga labing maayo nga igahin ang tinong mga panahon alang sa mga balikduaw ug sa pagdumalag mga pagtuon. Kini moabag kanato sa pagsundal gilayon sa interes. Tingali ikagahin ang panahon sa magabii, sa hinapos ang semana, o human sa buluhatong pamalaybalay. Tinoa kon unsa ang labing maayo alang kanimo ug pakig-ambit niining buluhatona nga makanunayon aron sa paghimog mga tinun-an.—Mat. 28:19, 20.