Ang Hagit sa Paghimog mga Balikduaw

¹ Ingon nga mga ministro sa maayong balita, kita gisugo sa paghimog mga tinun-an. (Mat. 28:19, 20) Kini nagaapil sa paghimog mga balikduaw. Ang pagkahanas diha sa paghimog mga balikduaw mahimong usa ka maagdahong hagit.​—Prov. 22:29.

² Ang matag dedikadong Kristohanon kinahanglang mobating usa ka kaakohan ang pagpakig-ambit sa paghimog tinun-an nga buluhaton. Mahimong kini nagakinahanglan nga atong isakripisyo ang pipila personal nga kaharuhay aron ikapaambit ang paglaom sa Gingharian ngadto sa uban.

³ Paloapa ang Tanang Interes: Ang mga balikduaw kinahanglang himoon ngadto sa tanang nagapahayag ug interes sa mensahe sa Gingharian, bisan pag midumili sila sa atong mga basahon. Si Jesus ug ang iyang mga apostol nagapakita kon sa unsang paagi ang interes sa mensahe sa Gingharian maugmad pinaagig paglangkit sa katawhan diha sa madayganon Kasulatanhong panaghisgot.​—Mar. 10:21; Buh. 2:37-41.

⁴ Ang atong katuyoan sa pagbalikduaw mao gayod ang pagsugod ug usa ka pagtuon sa Bibliya. Makahimo ta sa pagpasundayag ngadto sa tagbalay kon sa unsang paagi dumalahon ang usa ka pagtuon sa Bibliya sa balay. Mapaneguro mo nga si Jehova mosanong sa imong pag-ampo alang sa tabang sa pagkaplag ug usa ka mabuot-kasingkasing nga tawo aron tudloan. Nganong dili mangayog tabang ni Jehova ug himoong tumong nga makasugod ug usa ka pagtuon sa Bibliya?

⁵ Gamita Pag-ayo ang Tracts: Ang tracts epektibong magamit sa pagsugod ug mga pagtuon sa Bibliya. Daghan ang nakahimo sa pagsugod ug usa ka panag-estoryahay pinaagi lamang sa paghisgot sa hulagway diha sa hapin. Basaha ang usa ka parapo sa usa ka panahon uban sa tagbalay. Sa dihang isukna ang usa ka pangutana, hunong ug dapita ang tagbalay nga mopahayag sa iyang kaugalingon. Tan-awa ang mga kasulatan ug ipakita kon sa unsang paagi kana mapadapat. Ang panaghisgot ikatultol dayon ngadto sa basahon nga mahimong madumala ang pagtuon.

⁶ Gamita ang Librong Nangatarongan: Ang epektibong mga balikduaw mahimo pinaagig librong Nangatarongan. Ang pagrepaso sa pangunang mga ulohan o sa indise makabulig kanimo sa pagpilig mga puntos nga ikahisgot. Ang seksiyon nga “Mga Kasulatang Sagad Sayop nga Gipadapat” mapuslanon sa pag-atubang sa mga pagsupak nga motungha. Ang mga payunir mitahog kalamposan sa pagsugod ug mga pagtuon sa Bibliya pinaagig paggamit sa mga puntos sa librong Nangatarongan sa panid 378 (p. 204 sa Ingles) ubos sa “Sa unsang paagi ang mga Saksi ni Jehova nakakab-ot sa ilang pagpatin-aw sa Bibliya?” Ilang gipakita sa interesadong tawo kon sa unsang paagi atong gitugotan ang Bibliya nga motagana sa iyang kaugalingong pagpatin-aw. Kini misangpot sa pagsugod ug ubay-ubay nga mga pagtuon sa Bibliya.

⁷ Sama kang Jesus ug sa iyang mga apostol, gikinahanglan tang magapasundayag sa sinserong interes sa mga karnero ni Jehova. (Luc. 9:11; 2 Cor. 2:17) Sa dihang atong ibutang ang mas dakong pagpasiugda sa paghatag sa atong kaugalingon alang sa espirituwal nga kaayohan sa uban, mahimo ta ang pag-atubang sa hagit sa paghimog mga balikduaw.