Pagbaton ug Kaisog sa Paghimog mga Balikduaw

¹ Nalipay ka ba sa paghimog mga balikduaw? Daghang magmamantala nalipay. Tingali nagpanuko ka sa sinugdan, ilabina sa pagbalik sa mga tagbalay nga nagpakita ug diyutay lamang nga interes sa dihang una silang giduaw. Apan sa dihang ikaw ‘nagbaton ug kaisog pinaagi sa atong Diyos nga ipamulong ang maayong balita’ diha sa paghimog mga balikduaw, lagmit natingala ka sa pagkakaplag kon unsa diay ka sayon ug magantihon kining buluhatona. (1 Tes. 2:2) Sa unsang paagi?

² Ang tinuod, adunay importanteng kalainan tali sa pagbalikduaw ug sa unang pagduaw. Ang pagbalikduaw ginahimo ngadto sa mga kaila, dili sa estranghero, ug sa katibuk-an mas sayon ang pagpakigsulti sa kaila kay sa usa ka estranghero. Ug bahin sa dagayang mga ganti nga moresulta gumikan sa pagpakig-ambit niining buluhatona, ang mga pagbalikduaw mahimong motultol ngadto sa mabungahong mga pagtuon sa Bibliya sa balay.

³ Sa dihang kita nagapamalaybalay, sublisubli natong ginaduaw ang mga tawo nga dili interesado sa dihang giduaw nato sila sa miagi. Apan, nganong kita padayong nagaduaw? Nasayod kitang ang mga kahimtang sa mga tawo mabag-o ug ang indibiduwal kinsa daw dili matinagdanon o kaha supak sa miaging pagduaw mahimong interesado sa sunod natong pagduaw. Uban niana sa hunahuna, mangandam kita sa atong pagbalikduaw ug mag-ampo alang sa panalangin ni Jehova aron ang butang nga atong isulti moresulta sa maayong pagsanong.

⁴ Kon, diha sa atong pamalaybalay nga buluhaton, kita andam nga mosangyaw sa mga tawo nga kanhi wala gayoy gipakitang interes, dili ba kita mas andam pa nga mobalik ngadto ni bisan kinsang nagpakitag diyutayng interes sa mensahe sa Gingharian?​—Buhat 10:34, 35.

⁵ Daghan kanato ang nakadangat sa kamatuoran karon tungod sa usa ka magmamantala nga mapailobong nagbalikduaw kanato. Kon ikaw usa niini, hayan mangutana ka sa imong kaugalingon: ‘Unsa ang akong unang impresyon sa maong magmamantala? Ako bang gisagop dayon ang mensahe sa Gingharian sa akong unang pagkadungog niana? Dili ba ako daw walay pagtagad?’ Hinunoa, kita malipay nga ang magmamantala kinsa mibalik kanato naghukom nga takos kita sa usa ka balikduaw ug ‘nagbaton ug kaisog pinaagi sa [iyang] Diyos,’ miduaw, ug mipadayon sa pagtudlo kanato sa kamatuoran. (1 Tes. 2:2) Apan unsa na man niadtong mga indibiduwal nga nagpakita ug diyutayng interes sa sinugdan apan sa ulahi daw nagalikay na kanato? Ang positibong tinamdan bililhon, ingon sa giilustrar sa mosunod nga kasinatian.

⁶ Samtang nagsangyaw sa kadalanan sayo sa usa ka buntag, duha ka magmamantala nakasugat ug batan-ong babaye nga nagtulod sa usa ka bata diha sa karang. Ang babaye midawat ug usa ka magasin ug nagdapit sa mga sister nga moadto sa iyang balay sa pagkasunod Dominggo. Miabot sila sa gitudlong panahon, apan ang tagbalay miingon kanila nga wala siyay panahon sa pagpakigsulti. Misaad siya, hinunoa, nga makapakigsulti siya sa sunod semana. Maduhaduhaon ang mga sister nga tumanon niya ang gikasabotan, apan ang babaye naghulat kanila sa dihang sila mibalik. Ang pagtuon nasugdan, ug ang pag-uswag sa babaye makapahingangha. Wala madugay, siya misugod sa pagtambong sa mga tigom nga makanunayon ug nagpakig-ambit sa pag-alagad sa kanataran. Siya karon bawtismado na.

⁷ Ipahiluna ang Sukaranan sa Unang Pagbuaw: Ang sukaranan sa malamposong balikduaw kasagarang gipahiluna sa unang pagduaw. Paminaw pag-ayo sa mga komento sa tagbalay. Unsay ilang ginasulti kanimo? Siya ba mahiligon sa relihiyon? Mabalak-on ba siya sa sosyal nga mga isyu? Interesado ba siya sa siyensiya? sa kasaysayan? sa palibot? Sa paniklop sa pagduaw, makasukna ka ug makapukaw-sa-hunahunang pangutana, ug saari nga hisgotan ang tubag sa Bibliya sa dihang ikaw mobalik.

⁸ Pananglitan, kon ang tagbalay mosanong sa saad sa Bibliya sa usa ka paraisong yuta, ang dugang panaghisgot sa ulohan mahimong tukma. Sa dili ka pa mobiya, ikaw tingali makasukna: “Unsaon man nato pagseguro nga tumanon sa Diyos kining saara?” Dayon dugangi: “Tingali makahapit ko sa dihang ang ubang membro sa pamilya ania sa balay, ug dayon ikapakita ko kanimo ang tubag sa Bibliya niining pangutanaha.”

⁹ Kon ang tagbalay wala magpakitag interes sa bisan haing partikular nga ulohan, makasukna ka ug usa sa mga pangutana nga gipakita sa mga presentasyon sa likod nga panid sa Atong Ministeryo sa Gingharian ug gamita kana ingong basehanan alang sa imong sunod nga panaghisgot.

¹⁰ Hupti ang Tukmang Sinulat nga mga Rekord: Ang imong rekord sa pamalaybalay kinahanglang tukma ug kompleto. Isulat dayon ang ngalan ug adres sa tagbalay sa dihang mobiya ka na sa balay. Ayaw taghapa ang numero sa balay o ang ngalan sa kalye​—susiha ang impormasyon sa pagtino nga kini tukma. Isulat kon unsang matanga sa tawo ang indibiduwal. Isulat ang ulohan nga imong gihisgotan, ang mga kasulatan nga imong gibasa, ang bisan unsang literatura nga imong napahiluna, ug ang pangutana nga imong tubagon sa dihang ikaw mobalik. Ilakip ang adlaw ug oras sa unang pagduaw ug sa dihang ikaw miingon nga ikaw mobalik. Karon nga kompleto na ang imong rekord, ayaw kanag walaa! Tagoi kana sa luwas nga dapit aron imong magamit kana sa ulahi. Padayong hunahunaa ang indibiduwal ug kon unsaon nimo pagdumala ang pagbalikduaw.

¹¹ Tinoa Kon Unsay Imong mga Tumong: Una, pinaagi sa kamainiton ug kamahigalaon, paningkamoti nga mobatig kasayon ang imong tagbalay. Ipakita nga interesado ka kaniya ingong usa ka tawo, nga dili sobra ka pamilyar. Sunod, pahinumdomi siya sa pangutana nga imong gipatungha sa miaging duaw. Paminaw pag-ayo sa iyang opinyon, ug ipahayag ang sinserong apresasyon sa iyang mga komento. Dayon, ipakita kon nganong praktikal ang panglantaw sa Bibliya. Kon posible, tultoli siya sa nalangkit nga punto diha sa libro nga Kahibalo nga Motultol sa Kinabuhing Walay Kataposan. Hinumdomi pag-ayo nga ang imong pangunang tumong sa mga pagbalikduaw mao ang pagsulay sa pagsugod ug usa ka pagtuon sa Bibliya.

¹² Ang pagkapintok nga gigamit sa Kahibalo nga libro nagdasig sa daghan kanato sa ‘pagbaton ug kaisog’ diha sa mga pagtuon sa Bibliya aron dasigon ang mga estudyante sa pagtambong sa mga tigom ug pagpakig-uban sa organisasyon ni Jehova. Sa miagi, kita naanad sa paghulat hangtod ang mga indibiduwal nakatuon na ug dugayng panahon una sila dapiton sa pagpakig-uban kanato. Karon, daghang estudyante ang nagtambongan sa mga tigom wala madugay sa dihang sila misugod sa pagtuon, ug mas kusog ang ilang pag-uswag ingong resulta.

¹³ Usa ka magtiayon nagsangyaw nga di-pormal ngadto sa isigkatrabahante. Sa dihang siya nagpahayag ug interes sa kamatuoran, ilang gidapit siya sa pagtuon sa Bibliya diha sa Kahibalo nga libro. Sa samang panahon, sila misulti kaniya nga siya kinahanglang motambong sa mga tigom, diin daghan sa iyang mga pangutana ang matubag. Ang lalaki andam dili lamang sa pagdawat sa ilang pagdapit sa pagtuon apan usab nagtuon kaduha sa usa ka semana ug misugod sa pagtambong nga regular sa mga tigom sa Kingdom Hall.

¹⁴ Gamita ang Brosyur nga Unsay Gikinahanglan sa Diyos Kanato?: Sa “Mga Mensahero sa Diyosnong Pakigdait” Distritong mga Kombensiyon, atong nadawat ang brosyur nga Unsay Gikinahanglan sa Diyos Kanato? Kini nga brosyur magamit sa pagsugod ug mga pagtuon sa Bibliya uban sa mahadlokon-sa-Diyos nga mga tawo bisan unsa pa sila ka edukado. Naundan kini sa linangkob nga kurso sa pagtuon, nga nagkobre sa pangunang mga pagtulon-an sa Bibliya. Ang publikasyon mahimong epektibo kaayong galamiton sa pagpaambit sa kahibalo sa Diyos. Nagasaysay kini sa kamatuoran nga tin-aw ug yano kaayo nga halos ang matag usa kanato makaarang sa paggamit niini sa pagtudlo sa uban sa mga kinahanglanon sa Diyos. Dayag, daghang magmamantala ang makapribilehiyo sa pagdumala ug usa ka pagtuon sa Bibliya niini nga brosyur.

¹⁵ Ang pipila ka indibiduwal nga mibating sila walay panahon sa pagtuon sa Kahibalo nga libro tingali andam sa paghimog mubong mga sesyon sa pagtuon sa Gikinahanglan nga brosyur. Mahinam sila kon unsay ilang makat-onan! Sa duha o tulo lamang ka panid, ilang makaplagan ang mga tubag sa mga pangutana nga gipamalandongan sa mga tawo sa daghang siglo: Kinsa ang Diyos? Kinsa ang Yawa? Unsay katuyoan sa Diyos alang sa yuta? Unsa ang Gingharian sa Diyos? Unsaon nimo pagkaplag ang matuod nga relihiyon? Bisan tuod ang brosyur nagpresentar sa kamatuoran sa simpleng mga termino, ang mensahe niini gamhanan kaayo. Nagkobre kini sa pangunang mga puntos nga sublion sa mga ansiyano uban sa mga kandidato sa bawtismo ug magsilbing tikanganan ngadto sa mas bug-os nga pagtuon sa Kahibalo nga libro.

¹⁶ Sa pagtanyag ug pagtuon diha sa pagbalikduaw, ikaw yanong makaingon: “Nasayod ka ba nga sulod lamang sa pipila ka minutos, mabatonan nimo ang tubag sa importanteng pangutana sa Bibliya?” Dayon, isukna ang pangutana nga makita sa sinugdan sa usa sa mga leksiyon diha sa brosyur. Pananglitan, kon moduaw ka sa usa ka tigulang, ikaw makaingon: “Nasayod kita nga sa miagi si Jesus nag-ayo sa mga tawo. Apan sa umaabot unsa may buhaton ni Jesus alang sa masakiton? sa tigulang? sa patay?” Ang mga tubag makaplagan sa leksiyon 5. Ang mahiligon sa relihiyong tawo mahimong mahagit sa pangutanang: “Maminaw ba ang Diyos sa tanang mga pag-ampo?” Gitubag kini sa leksiyon 7. Ang mga membro sa pamilya buot nga masayod: “Unsa may gikinahanglan sa Diyos sa mga ginikanan ug kabataan?” Makaplagan nila kana samtang ilang tun-an ang leksiyon 8. Ang ubang mga pangutana mao: “Makahimo ba sa pagdaot ang patay sa mga buhi?” gisaysay sa leksiyon 11; “Nganong adunay daghang relihiyon nga nag-angkong Kristohanon?” gihisgotan sa leksiyon 13; ug “Unsa may imong buhaton aron mahimong higala sa Diyos?” gikobrehan sa leksiyon 16.

¹⁷ Tabangi Kadtong Nagasultig Laing Pinulongan: Komosta ang mga tagbalay nga nagsultig laing pinulongan? Kon posible, kinahanglang matun-an sila sa pinulongan nga ilang nahibaloan pag-ayo. (1 Cor. 14:9) Kon adunay kongregasyon o grupo nga nagsulti sa maong pinulongan sa duol, ang ilang mga ngalan ikapadala sa mga ansiyano didto. Kon walay mga kongregasyon o mga grupo sa duol ug walay lokal nga mga magmamantala nga makasulti sa pinulongan sa tagbalay, ang magmamantala makasulay sa pagtuon uban sa tagbalay, ginamit ang Gikinahanglan nga brosyur sa duha ka pinulongan.

¹⁸ Usa ka Ingles-ug-sinultihang magmamantala misugod sa pagtuon uban sa usa ka lalaki nga nagsultig Vietnamese ug uban sa iyang asawa, nga nagsultig Thai. Ang mga publikasyon ug mga Bibliya sa Ingles, Vietnamese, ug Thai ang gigamit panahon sa pagtuon. Bisan tuod lisod kadto sa sinugdan, ang magmamantala misulat: “Ang espirituwal nga pagtubo sa magtiayon nakita dihadiha. Ilang nasabtan ang panginahanglan sa pagsugod ug tambong sa mga tigom uban sa ilang duha ka anak, ug sila nagabasa sa Bibliya sa matag gabii ingong usa ka pamilya. Ang ilang sayis anyos nga batang babaye adunay kaugalingong pagtuon sa Bibliya.”

¹⁹ Sa dihang magtuon uban sa mga tawo nga nagasultig laing pinulongan, sultig hinay, klaroha ang pulong, ug gamita ang simpleng mga pulong ug mga prase. Hinumdomi, hinunoa, nga ang mga tawo nga nagsultig laing pinulongan kinahanglang tagdon uban ang dignidad. Kinahanglang dili sila tagdon nga maorag sila mga masuso.

²⁰ Gamitag maayo ang matahom nga mga ilustrasyon sa Gikinahanglan nga brosyur. Dapita siya sa pagbasa sa mga kasulatan sa iyang kaugalingong Bibliya. Kon ang pagtuon madumala sa panahon nga ang usa ka membro sa pamilya makahimo sa paghubad, sa walay duhaduha kana makaayo.

²¹ Pagbalikduaw nga Walay Langan: Unsa ka dugay nga ikaw maghulat una pa himoon ang balikduaw? Pipila ka magmamantala mobalik sulod lamang sa usa ka adlaw o duha gikan sa unang pagduaw. Ang uban mobalik sa ulahi sa samang adlaw! Kana ba dali ra kaayo? Kasagaran, ang mga tagbalay daw dili ra mosupak. Kasagaran ang magmamantala nga nagaduaw mao ang kinahanglang mag-ugmad ug dugang positibong tinamdan, uban ang diyutayng kaisog. Matikdi ang mosunod nga mga kasinatian.

²² Usa ka 13-anyos nga magmamantala namalaybalay usa ka adlaw niana sa dihang iyang nakita ang duha ka babaye nga kuyog nga nanglakaw. Mahunahunaon sa pagdasig nga sangyawan ang mga tawo bisan asa nato sila makaplagan, iyang giduol ang mga babaye diha sa dalan. Nagpakita silag interes sa mensahe sa Gingharian ug ang matag usa midawat ug Kahibalo nga libro. Gikuha sa batan-ong igsoong lalaki ang ilang mga adres, mibalik duha ka adlaw sa ulahi, ug gisugdan ang pagtuon sa Bibliya sa matag usa kanila.

²³ Usa ka sister naghimog mga kahikayan sa pagbalik sa pagkasunod semana. Apan usa ka adlaw o duha human sa unang duaw siya mihapit aron hatagan ug magasin ang tagbalay sa ulohan nga ilang nahisgotan sa miagi. Iyang giingnan ang tagbalay: “Akong nakita kining artikuloha ug akong gihunahuna nga gusto nimo kining basahon. Dili ako makahunong sa pagpakig-estorya karon, apan mobalik ako sa Miyerkoles sa hapon sumala sa atong giplano. Okey lang ba gihapon ang maong panahon alang kanimo?”

²⁴ Sa dihang ang indibiduwal magpakitag interes sa kamatuoran, kita makaseguro nga siya makaatubang ug pagsupak sa lainlaing matang. Ang atong pagbalik dayon human sa unang pagduaw makapalig-on niyang mobarog sa bisan unsang pagsupak nga iyang maatubang gikan sa mga paryente, suod nga mga higala, ug sa uban.

²⁵ Ugmara ang Interes Niadtong Nakaplagan sa Publikong mga Dapit: Daghan kanato malipay sa pagsangyaw diha sa kadalanan, sa mga paradahan, sa publikong mga sakyanan, sa mga shopping center, mga parke, ug uban pa. Dugang pa sa pagpahilunag literatura, kinahanglang ugmaron nato ang interes. Nianang maong tumong, ang paningkamot kinahanglang himoon aron makuha ang ngalan, adres ug, kon posible, ang numero sa telepono sa matag interesadong tawo nga atong ikasugat. Ang pagkuha niining maong impormasyon dili ingon ka lisod sama sa imo tingaling gihunahuna. Sa dihang maghinapos na ang panaghisgot, kuhaa ang imong notbok ug pangutana: “Duna bay laing paagi nga makapadayon kita niini nga panaghisgot sa laing panahon?” O makaingon: “Buot ko nga mabasa mo ang artikulo nga segurado ako nga makapainteres kanimo. Madala ba nako kini sa imong balay o opisina?” Usa ka brader nangutana lamang: “Unsang numero sa telepono nga ikaw makontak?” Siya mitaho nga sulod sa tulo ka bulan tulo ka tawo ang malipayong mihatag kaniya sa ilang numero sa telepono.

²⁶ Gamita ang Telepono sa Pagkaplag ug Pag-ugmad ug Interes: Usa ka payunir nga sister nagagamit sa telepono aron aboton ang mga tawo nga nagapuyo sa binantayan-pag-ayong mga tinukod. Nagahimo usab siya ug mga pagbalikduaw sa samang paagi. Sa unang tawag, siya miingon: “Nasayod akong wala ka makaila nako. Naningkamot ako pagkontak sa mga tawo sa imong dapit aron ipaambit ang usa ka hunahuna gikan sa Bibliya. Kon may lugar ka, buot kong basahon ang saad nga makaplagan sa . . .” Human mabasa ang kasulatan, siya miingon: “Dili ba nindot kon atong makita kanang panahona nga moabot? Gikalipay ko ang pagbasa niini kanimo. Kon gikalipay mo usab, buot kong motawag pag-usab ug hisgotan ang laing kasulatan.”

²⁷ Sa pagbaliktawag sa telepono, iyang pahinumdoman ang tagbalay sa ilang miaging panaghisgot ug sultihan nga buot niyang basahon gikan sa Bibliya kon mahisama sa unsa ang mga kahimtang sa dihang ang pagkadaotan pagahanawon na. Dayon naa siyay mubong panaghisgot sa Bibliya uban sa tagbalay. Sulod sa daghang pakig-estoryahay diha sa telepono, 35 ka tawo ang midapit kaniya ngadto sa ilang balay ug pito ka panagtuon sa Bibliya ang nasugdan! Lisod ba usahay alang kanimo ang pagbalikduaw sa interesadong mga tawo panahon sa mga bulang tingtugnaw tungod sa nasirad-ang mga dalan, katugnaw, o sakit? Kon mao, nganong dili sila kontakon pinaagig telepono?

²⁸ Paloapa ang Interes nga Nakaplagan sa mga Dapit Negosyohanan: Dugang pa ang nalangkit sa pagkobre diha sa mga tindahan kay sa pagtanyag lamang ug mga magasin. Daghang naninda ang adunay sinserong interes sa kamatuoran, ug ang maong interes kinahanglang ugmaron. Sa pipila ka kaso, posible ang paghimog panaghisgot sa Bibliya o bisan sa usa ka pagtuon diha mismo sa ilang dapit sa negosyo. Sa ubang mga kaso, ikaw ug ang interesadong tawo makahimo sa pagtagbo panahon sa paniudto o sa ubang kombenyenteng panahon.

²⁹ Usa ka nagapanawng magtatan-aw miduaw sa tag-iya sa usa ka gamayng tindahan sa groseriya ug mitanyag nga ipasundayag ang usa ka pagtuon sa Bibliya. Sa dihang nangutana kon unsa ka dugay ang pasundayag matapos, ang nagapanawng magtatan-aw miingon nga mokabat lamang kinig 15 minutos. Niana, ang naninda nagsab-it ug pahibalo diha sa pultahan: “Balik Human sa 20 Minutos,” mikuha ug duha ka lingkoranan, ug silang duha naghisgot sa unang lima ka parapo sa Kahibalo nga libro. Kining sinserong tawo nakadayeg pag-ayo sa iyang nakat-onan nga siya mitambong sa Pahayag Publiko ug sa Pagtuon sa Bantayanang Torre nianang Dominggoha ug miuyon nga ipadayon ang pagtuon sa mosunod nga semana.

³⁰ Sa pagtanyag ug pagtuon diha sa dapit negosyohanan, ikaw hayan makaingon niini: “Ang among programa sa pagtuon sa Bibliya ikapasundayag lamang ug 15 minutos. Kon kini kombenyente, ikalipay ko ang pagpakita kanimo kon unsaon kini paghimo.” Dayon, tumana ang gilimiteng panahon. Kon dili posible ang paghimog taas nga panaghisgot diha sa dapit sa negosyo, mas tukma nga duawon ang naninda didto sa iyang balay.

³¹ Pagbalikduaw Bisan Kon Walay Literatura ang Napahiluna: Ang matag kislap sa interes takos sa usa ka pagbalikduaw, napahiluna man ang literatura o wala. Siyempre, kon tataw nga ang tagbalay wala gayoy interes sa mensahe sa Gingharian, labing maayong ipunting ang imong mga paningkamot sa uban.

³² Sa pultahan-ug-pultahan nga buluhaton, usa ka sister nakasugat ug usa ka babaye kinsa mahigalaon kaayo apan hugot nga midumili sa tanyag nga mga magasin. Ang magmamantala misulat: “Gihunahuna ko siya sa pipila ka adlaw ug nakahukom nga buot ko siyang estoryahon pag-usab.” Sa kataposan, ang sister nag-ampo, nagbaton ug kaisog, ug nanuktok sa pultahan sa babaye. Sa iyang kalipay ang tagbalay nagpadayon kaniya sa sulod. Ang usa ka pagtuon sa Bibliya nasugdan, ug gidumala usab kini sa pagkasunod adlaw. Sa kapulihay, ang tagbalay nakadangat sa kamatuoran.

³³ Pagplano nga Abante Aron Dako ang Malampos: Girekomendar nga gamiton ang pipila ka panahon matag semana sa paghimog mga balikduaw. Dako ang malampos uban ang maayong pagplano. Hikaya ang mga pagbalik diha sa samang dapit nga imong ginakobrehan sa balaybalay aron dili makausik ug dako kaayong panahon sa pagpanaw.

³⁴ Kadtong kinsa malamposon sa paghimog mga balikduaw ug sa pagsugod ug mga pagtuon sa Bibliya sa balay nag-ingon nga bililhon ang pagpakitag sinserong personal nga interes sa mga tawo ug sa pagpadayong paghunahuna bahin kanila bisan human mahimo ang pagduaw. Hinungdanon usab nga adunay makaiikag nga ulohan sa Bibliya nga pagahisgotan ug ikapahiluna ang sukaranan alang sa pagbalikduaw una pa mobiya sa unang pagduaw. Dugang pa, importante nga mobalik dayon aron paloapon ang interes. Ang tumong nga makasugod ug pagtuon sa Bibliya kinahanglang hinumdoman kanunay.

³⁵ Ang hinungdanong hiyas alang sa kalamposan sa buluhaton sa pagbalikduaw mao ang kaisog. Sa unsang paagi kini mabatonan? Si apostol Pablo nagtubag pinaagi sa pag-ingon nga kita ‘magbaton ug kaisog’ sa pagpahayag sa maayong balita ngadto sa uban “pinaagi sa atong Diyos.” (1 Tes. 2:2) Kon buot kang mouswag niining bahina, pag-ampo kang Jehova alang sa tabang. Dayon, uyon sa imong mga pag-ampo, paloapa ang tanang interes. Si Jehova magapanalangin gayod sa imong mga paningkamot!

[Kahon sa panid 3]

Kon Unsaon nga Magmalamposon sa Paghimog mga Balikduaw

■ Ipakita ang sinserong personal nga interes sa mga tawo.

■ Pilia ang makaiikag nga ulohan sa Bibliya nga pagahisgotan.

■ Ipahiluna ang sukaranan alang sa matag sunodsunod nga pagduaw.

■ Padayon sa paghunahuna bahin sa tawo human sa imong pagbiya.

■ Balik sulod sa usa o duha ka adlaw aron mapaloap ang interes.

■ Hinumdomi ang imong tumong sa pagsugod ug usa ka pagtuon sa Bibliya.

■ Pag-ampo alang sa tabang aron makabaton ug kaisog alang niining buluhatona.