Dawata ang Kaakohan sa mga Balikduaw
1 Adunay ubay-ubay nga mga rason sa bug-os nga pagpakig-ambit sa paghimog mga balikduaw. Kon kita bug-os sa pagduaw sa mga tawong interesado, atong padayong mahuptan ang maayong tanlag ug bug-os nga makatuman sa atong ministeryo, ingon sa gibuhat ni Pablo.—Buh. 20:21, 24; 2 Tim. 4:5.
2 Kahibalo Magpahimo Kanatong Responsable: Ang punto nga ang mga kinabuhi nameligro magpalihok gayod kanato nga magmakugihon sa paghimog mga balikduaw. (Juan 17:3) Ang kahibalo ta sa pagkaduol na sa Armageddon kinahanglang magpadasig kanato dili lamang sa pagpasidaan sa mga daotan kondili usab sa pagbulig niadtong ‘nagapanghupaw ug nagaagulo tungod sa dulumtanang mga butang nga nagakahitabo sa yuta.’ (Ezek. 9:4) Sila kinahanglang matabangan sa pagpakig-uban sa makitang kapunongan ni Jehova.
3 Ang mga tawo nagakinahanglag tabang sa hustong pagsabot sa kamatuoran. (Buh. 8:30, 31; 18:26) Adunay laing katarongan alang kanato sa pagbalik ug sa “pagbisibis” sa mga binhi sa kamatuoran nga napugas. Unsa ka dako kaha sa espirituwal nga kauswagan ang nahimo ta kon wala pay mibalikbalik sa pagbulig kanato aron mahuptan ang tukmang kahibalo?—Mat. 7:12.
4 Ipakitang Gugma ug Kasibot: Ang paghimog mga balikduaw maoy usa ka maayong paagi sa pagpasundayag sa atong gugma sa katawhan. Miingon ang usa ka igsoong lalaki nga nag-alagad ingong regular payunir: “Sukad gayod sa akong bawtismo, ang tinguha ko mao ang pagsulti sa uban sa akong nakat-onan gikan sa Bibliya. Nalipay ako nga ang akong pagkabaldado wala magpapugong kanako sa pagbuhat niini. . . . Nakat-onan ko usab ang paghupot ug rekord diha sa hunahuna sa kada balay sa maong kalye, ug niining paagiha, ako nakaarang sa paghimog mga balikduaw sa interesadong mga tawo sa pagtuon sa Bibliya.”
5 Sa dihang mohimog mga balikduaw, sagad kita adunay higayon sa paggamit sa Bibliya ug mobutyag sa mga rason sa atong paglaom. (1 Ped. 3:15) Dili lang kita makabulig sa tagbalay kondili usab mosugnod sa atong kaugalingong kasibot ug pagpabili sa kamatuoran. Ang paghimog mga balikduaw magpatunghag kalipay nga dili mabatonan sa laing paagi. Ug kining kalipaya mapabag-o kanunay pinaagig atong masibotong paghimog mga balikduaw.—Prov. 10:22.
6 Ang katawhan ni Jehova dili mohikaw kon unsa ang maayo gikan sa uban, ug kini makita pinaagig atong tibuok-kalibotang buluhaton sulod sa 1991 nga tuig sa pag-alagad. (Prov. 3:27) Nakab-ot ta ang 344,926,952 ka balikduaw ug nagdumalag 3,947,261 ka pagtuon sa Bibliya sa balay. Dihay 300,945 ka bag-ong tinun-an ang nagpahinungod sa ilang kaugalingon ngadto kang Jehova ug nabawtismohan. Kining dakong pag-uswag dili unta mabatonan kondili pa ang atong kahinangop sa pagdawat sa kaakohan sa paghimog mga balikduaw.—1 Tes. 2:8.