Nagasangyaw Ka ba Uban ang Katuyoan?
1 Si Jehova maoy usa ka Diyos sa katuyoan, ug ang iyang mga buhat matuyoanon. Kini gayod tinuod man kanato, ilabina maylabot sa atong ministeryo. Si Jesus misugo sa iyang mga tinun-an sa pagsangyaw sa maayong balita alang sa katuyoan sa pagpamatuod. (Mat. 24:14) Samtang kita nagaamot ngadto sa katumanan niining buluhatona, kita kinahanglan usab nga magmakugihon sa pagbalik o pagsundal sa tanang interes nga gipakita. Kini dayag gikan sa dugang mga pulong ni Jesus sa Mateo 28:19, 20.
2 Ang mga taho sa binuhatan sa kanataran nagapakita nga ang mga balikduaw wala himoa sa tanan nga nakakuhag literatura. Ang pipila basin magduhaduha, nga hanas lamang nga mga magmamantala ang takos sa paghimog mga balikduaw. Apan, dili man kana malisod sama sa gihunahuna niini nga mga magmamantala. Apan gikinahanglan ta nga himoong may katuyoan ang atong mga balikduaw.
PAGHIMO SA MGA BALIKDUAW NGA MATUYOANON
3 Sa mahibalag mo ang tawong interesado, maayong dihadiha ipahimutang ang pasukaranan alang sa imong balikduaw. Sa unsang paagi? Nakaplagan sa pipila nga epektibong binlan ang tagbalay ug usa ka pangutana nga mahimong tubagon sa sunod nga duaw. Ang uban nagapasiugda ug tinong punto diha sa literatura nga ilang napahimutang nga mahimong hisgotan sa dihang mobalik sila. Paneguroa nga itala ang ngalan sa tagbalay, ang ulohan nga nahisgotan, ang iyang sanong, ug ang bisan unsang basahon nga napahimutang. Dayon, sa dili pa mobalikduaw, sublia kining impormasyona ug hatagig mainampoong panghunahuna kon unsa ang imong isulti.
4 Sa Oktubre aduna kita ing maayo kaayong higayon sa pagtanyag sa mga suskrisyon sa Pagmata! diha sa mga balikduaw. Daghang magmamantala nagmalamposon kaayo sa pagkuhag mga suskrisyon sa mga balikduaw. Ang pipila nga midawat sa mga magasin sa unang duaw hayan nagpadayag nga sila buot mosuskriber. Unya anaa ang mga tawo nga nahuptan ta ang ilang ‘Expiring Subscription slips,’ mga indibiduwal diha sa atong rota sa magasin, o mga tawo nga sa miagi atong natun-an. Ang usa ka suskrisyon makabulig man sa pagtagbaw sa ilang espirituwal nga panginahanglan.—Mat. 5:3.
5 Kon ikaw mobalikduaw sa imo nang nagamitan sa kinabag-ohang Ulohan nga Mahisgotan, ikaw makaingon: “Sa nakigsulti ko kanimo, atong nahisgotan ang bahin sa kalinaw ug kasegurohan ug ang paagi sa mga panlimbasog sa tawo daw wala gayod magmalungtaron. Bisan tuod ang ‘United Nations’ nagaangkon sa pagtuman sa Isaias 2:4, napamatud-an nga wala kana makalampos niana. [Basahang teksto ug hisgoti.] Ang magasing Pagmata! niining bulana nagahisgot niini gayong puntoha kon sa unsang paagi ang mga gubat mahunong sa paagi nga iya sa Diyos.” Dayon ipakita ang Oktubre 8 nga gula ug itanyag ang suskrisyon, nga nagapasiugda sa tinong punto diha sa magasin.
IESKEDYOL ANG MGA DUAW
6 Ang uban wala maghimog mga balikduaw kay walay eskedyol nila sa tinong panahon alang niana. Mahimo man ang mga balikduaw sa mga gabii, sa mga hinapos ang semana, o sa ubang kombeniyenteng panahon. Nganong dili maghimog personal nga tumong sa paghimong labing menos usa ka balikduaw sa kada semana? Hangyoa ang tabang niadtong mas batid niining buluhatona. Batiang libre sa paghangyo sa imong konduktor sa pagtuon sa libro alang sa mga sugyot.
7 Ang apostol nga si Pablo mihisgot sa pagtanom ug pagbubo maylabot sa Kristohanong ministeryo. (1 Cor. 3:6, 7) Busa aduna kita ing kaakohan sa pagbalikduaw sa mga tawo uban sa katuyoan sa pagsugod ug pagtuon sa Bibliya. Ang atong kangaya modugang gayod kon kita nagasangyaw nga may katuyoan.