Kinahanglan Kitang Mahimong mga Magtutudlo, Dili Lamang mga Magsasangyaw
1 Namatikdan nga ang “mga Saksi ni Jehova literal nga nagkobre sa yuta pinaagi sa ilang pagpanaksi.” Sa unsang paagi kini naposible? Dili pinaagig tawhanong kusog o gahom, apan pinaagi sa espiritu sa Diyos nga nagalihok diha sa iyang mga alagad samtang ilang gamiton ang nagkalainlaing mga tagana sa pagtuman sa ilang pagsangyaw ug pagpanudlong buluhaton.—Zac. 4:6; Buh. 1:8.
2 Usa ka epektibong paagi ang mga pinatik sa pagpalampos sa atong pagsangyawng buluhaton. Latas sa katuigan bilyon-bilyong mga libro, mga bokleta, mga brosyur, mga magasin, ug mga tract ang gipatik ug giapod-apod sa mga Saksi ni Jehova sa pagtabang nga ikamantala ang maayong balita sa Gingharian. Ang mga taho sa 1997 Yearbook nagpakita nga ang produksiyon sa literatura nakaabot sa kinamaayohang mga nakab-ot. Sa pagkakaron, kapin sa 91 ka milyong (91,000,000) kopya sa New World Translation ang napatik. Sa usa ka tuig ang gidaghanon sa mga magasing Watchtower ug Awake! nga gipatik sa Tinipong Bansa miuswag ug 7.1 porsiyento. Sa Alemanya, ang produksiyon sa magasin miuswag ug 35 porsiyento. Kapin sa un-tersiya sa mga magasin nga gihimo didto sa Alemanya maoy alang sa kanataran sa Rusya.
3 Nganong daghan kaayong literatura ang gikinahanglan? Sa tibuok kalibotan, dihay talagsaong sanong sa pagdasig nga gihatag alang kanato sa pagpamatuod bisan diin nga makaplagan ang mga tawo. Nga mas pa kanato ang nagapadako sa atong buluhaton sa pagpamatuod—diha sa publikong mga dapit, sa kadalanan, ug sa teritoryo sa patigayon—mas daghang literatura ang napahiluna sa mga tawo nga nagapakitag interes. Daghan kanila talagsa ra kon aduna man ing kahigayonan kanhi sa pagkadungog sa mensahe sa Gingharian. Aron makab-ot kining panginahanglana, ang mga kongregasyon adunay nagkalainlaing mga publikasyon aron magamit diha sa tanang bahin sa ministeryo.
4 Unsay Atong Tumong sa Pagpang-apob-apob ug Literatura? Ang tumong ta dili lamang ang pagpahilunag literatura. Ang sugo sa paghimog mga tinun-an nagalangkit ug duha ka bahin—pagsangyaw ug pagpanudlo. Una, aduna kita ing pribilehiyo sa pagsangyaw sa maayong balita sa Gingharian, nga magpaalinggat sa mga tawo nga kini lamang ang bugtong paglaom alang sa katawhan. (Mat. 10:7; 24:14) Nasulayan na sa panahon ang atong pinasukad sa Bibliyang literatura ug epektibong paagi sa pagpasibot sa interes ug pagpakat-on sa kahibalo bahin sa Gingharian ngadto sa uban.
5 Ikaduha, kon kita maghimog mga tinun-an, kinahanglang atong itudlo ang tanang butang nga gisugo ni Jesus. (Mat. 11:1; 28:19, 20) Sa makausa pa, ang literatura nagadulag hinungdanong papel sa atong pagpalanog sa kamatuoran nga modulot sa mga kasingkasing sa mga estudyante, sa pagtabang kanila nga mahimong mga tinun-an.
6 Kadtong modawat ug literatura hayan ‘mga tigpatalinghog sa pulong,’ apan dili gayod sila mahimong mga tigbuhat niana kon sila pasagdan sa ilang kaugalingon. (Sant. 1:22-25) Pipila ang mahimo gayong mga tinun-an gawas kon adunay mogiya kanila. (Buh. 8:30, 31) Nagakinahanglan silag magtutudlo sa pagtabang kanila sa pagpamatuod ngadto kanila sa kamatuoran nga makaplagan sa Kasulatan. (Buh. 17:2, 3) Ang atong tumong mao ang pagtabang kanila nga molambo ngadto sa punto sa pagpahinungod ug bawtismo, ug sa pagbansay kanila nga mahimong takos gayod sa pagtudlo sa uban.—2 Tim. 2:2.
7 Ang Labing Dakong Panginahanglan Mao ang Dugang mga Magtutublo: Sa dihang kita mosangyaw, atong ginapahayag ang maayong balita sa publiko. Ang pagpanudlo, hinunoa, nagalakip sa pagtudlo sa usa sa progresibong paagi. Samtang ang pagsangyaw magpahimo sa uban nga masayod sa mensahe sa Gingharian, ang pagpanudlo magtabang sa mga indibiduwal sa pagdawat sa maayong balita ug molihok uyon niana. (Luc. 8:15) Ang magtutudlo makahimo pag dugang kay sa pagmantala; siya mosaysay, mangatarongan uban ang maayong argumento, mohatag ug mga pruyba, ug mokabig.
8 Ang kadaghanan kanato kutob sa maarangan kinahanglang mahimong mga magtutudlo, dili lamang mga magsasangyaw. (Heb. 5:12a) Ang pagpang-apod-apod ug literatura usa ka hinungdanong bahin sa atong buluhaton, apan ang pagkab-ot sa ikaduhang tumong sa atong ministeryo sa ultima mag-agad kon unsay atong buhaton ingong mga magtutudlo. Bisan tuod kita malipay sa dihang kita makapahilunag literatura, aron sa pagpalampos sa atong ministeryo sa bug-os, dili gayod nato lantawon ang pagpahiluna ingong atong kataposang tumong. (2 Tim. 4:5) Ang mga pagpahiluna maoy epektibong paagi sa pagbukas sa ganghaan ngadto sa mga kahigayonan sa pagtudlo sa kamatuoran ngadto sa uban.
9 Paghimog mga Balikbuaw Aron Sugban ang mga Pagtuon sa Bibliya: Lagmit kitang tanan nakapahiluna na ug daghang libro, mga brosyur, ug mga magasin, nga nagtala ug taas nga listahan sa mga balikduaw. Kita angayng mag-eskedyul ug regular nga panahon sa pagbalik aron sa pagpasibot sa interes. Ang atong pangunang tumong sa pagbalik dili lamang ang pagpahilunag dugang literatura apan ang pagdasig sa mga tawo sa pagbasa ug pagkuhag kaayohan gikan sa ila nang nabatonan. Unsa ka dako man ang espirituwal nga pag-uswag ang nahimo ta sa atong kaugalingon kon dili pa dihay usa nga nagbalikbalik sa pagtabang kanato sa pagbaton ug tukmang kahibalo?—Juan 17:3.
10 Sundala ang tanang interes uban ang paglantaw nga makasugod ug usa ka pagtuon sa Bibliya sa brosyur nga Unsay Gikinahanglan sa Diyos Kanato? o sa libro nga Kahibalo nga Motultol sa Kinabuhing Walay Kataposan. Kining duha ka publikasyon nagatanyag sa mensahe sa Gingharian diha sa pormang daling sabton. Ang Gikinahanglan nga brosyur naundan sa mahimsog nga kurso sa pagtuon, nga nagakobre sa pangunang mga pagtulon-an sa Bibliya. Ang Kahibalo nga libro magpaarang sa usa sa pagtudlo sa kamatuoran sa mas dakong detalye, apan uban ang kayano, katin-aw, ug kapintok.
11 Ang pinayanong programa sa pagtuon, ingon sa gisaysay sa pasukip sa Hunyo 1996 nga Atong Ministeryo sa Gingharian, magpasayon sa magtutudlo sa pagtudlo ug sa estudyante sa pagkat-on. Paghupot ug kopya sa maong pasukip nga daling mabatonan aron sublion ang mga pamaagi sa pagpanudlo ug mga teknik nga napamatud-ang epektibo. Ang pipila ka sugyot nga gihatag niini nagalangkit kon unsaon pagbaton ug tiunayng personal nga interes diha sa estudyante, kon unsa ka dakong materyal ang kobrehan sa usa ka sesyon, kon unsaon pagdumala ang mga pangutana nga walay kalabotan sa ulohan, kon unsaon sa magtutudlo ug estudyante sa pagpangandam nga abante alang sa pagtuon, ug kon unsaon pagtultol sa estudyante ngadto sa organisasyon ni Jehova. Pinaagig pagsunod sa mga sugyot, ang dugang kanato, lakip na ang mga bag-ohan, makahimo sa pagdumalag mauswagong mga pagtuon.
12 Mga Taho sa Maayong Pag-uswag Gikan sa Kanataran: Ang Gikinahanglan nga brosyur ug ang Kahibalo nga libro napamatud-ang hinungdanong mga tabang sa pagpadali sa proseso sa paghimog mga tinun-an. Sa pagkadawat sa Gikinahanglan nga brosyur, usa ka igsoong lalaki sa Bolivia dihadiha migamit niana sa pagsugod ug pagtuon uban sa usa ka lalaki. Upat ka bulan sa ulahi sa distritong kombensiyon, kining maong estudyante apil sa malipayong mga kandidato sa bawtismo!
13 Daghan ang natukmod sa pagpahinungod sa ilang mga kinabuhi ngadto kang Jehova tapos makompleto ang ilang pagtuon sa Kahibalo nga libro. Sa usa ka kongregasyon sa Angola, ang gidaghanon sa mga pagtuon sa Bibliya nga gidumala sa mga magmamantala miuswag gikan sa 190 ngadto sa 260 ug ang nagtambongan sa tigom midoble ang gidaghanon gikan sa 180 ngadto sa 360 sa upat lamang ka bulan human ang Kahibalo nga libro gisugdan paggamit sa maong dapit. Wala madugay human niana, gikinahanglan ang pagporma ug laing kongregasyon.
14 Tapos masugdi ang iyang unang pagtuon sa Kahibalo nga libro, usa ka igsoong lalaki miingon nga ang pagdumala niana maoy “yano kon ang konduktor mosukna lamang sa mga pangutana, magbasa sa pipila ka mapadapat nga mga kasulatan, ug magtino nga masabtan sa estudyante.” Bisan tuod siya kanunayng naghunahuna nga ang takos lamang kaayong mga magmamantala ang makadumalag mauswagong mga pagtuon sa Bibliya ug nga siya dili gayod makahimo niana, siya nakaamgo nga makahimo siya niana, nga miingon: “Kon ako makahimo, bisan kinsa makahimo.”
15 Maoy pinaagi sa pagdumalag mga pagtuon sa Bibliya ingong usa ka bahin sa atong ministeryo nga kita molampos sa tumong sa paghimog mga tinun-an. Kadtong kinsa nakaugmad sa katakos sa pagpakig-ambit niining bahina sa ministeryo makakaplag niana nga matagbawon kaayo ug magantihon gayod. Hinaot nga kini maoy ikaingon bahin kanato nga kita usab “nagwali sa gingharian sa Diyos . . . ug nagpanudlo sa mga butang mahitungod sa Ginoong Jesu-Kristo uban ang labing dakong kagawasnon sa pagsulti.”—Buh. 28:31.