Bahin 1—Pagdumalag Mauswagong mga Pagtuon sa Bibliya
Unsa ba ang Pagtuon sa Bibliya?
1 Sa tibuok kalibotan, mga unom ka milyong pagtuon sa Bibliya ang ginadumala sa katawhan sa Diyos matag bulan. Pinaagi sa paggamit ug epektibong mga paagi sa pagpanudlo, atong matabangan kining mga ginatun-an sa Bibliya nga mouswag ngadto sa punto sa pagpahinungod ug bawtismo ug “makabaton ug igong katakos sa pagpanudlo sa uban.” (2 Tim. 2:2) Buot ba nimong tabangan ang imong ginatun-an sa paghimo sa maong pag-uswag? Sugod niining gulaa, ang Atong Ministeryo sa Gingharian magpasiugda sa serye sa mga artikulo nga magpatin-aw sa paninugdang mga bahin sa pagdumalag mauswagong mga pagtuon sa Bibliya.
2 Kon Kanus-a Itaho ang Usa ka Pagtuon sa Bibliya: Kon ikaw adunay regular ug sistematiko nga mga panaghisgot sa Bibliya, bisag dili dugay, ginamit ang Bibliya uban sa usa sa gisugyot nga mga publikasyon, ikaw nagadumala ug usa ka pagtuon sa Bibliya. Tinuod kini bisan kon ang pagtuon anha himoa sa pultahan o sa telepono. Ang pagtuon mahimong itaho kon kini nadumala na sulod sa duha ka higayon human ikapasundayag ang kahikayan sa pagtuon ug kon dunay katarongan sa pagtuo nga magpadayon ang pagtuon.
3 Ang brosyur nga Gikinahanglan ug ang librong Kahibalo mao ang mga publikasyon nga gamiton sa pagdumalag daghang pagtuon sa Bibliya. Inigkahuman niini, kon dayag nga ang maong tawo nakahimog pag-uswag, bisan sa hinay nga paagi, ug siya nakaugmad ug pagpabili sa iyang nakat-onan, nan ang pagtuon mahimong ipadayon sa librong Simbaha ang Diyos. Ang brosyur nga Ikaw Mahimong Higala sa Diyos! mahimong gamiton sa pagtuon uban sa mga tawong kulang sa edukasyon o katakos sa pagbasa.
4 Ang kalihokan sa pagtuon sa Bibliya nagpalampos na sa pagtabang sa minilyon sa pagkahimong tinuod nga mga tinun-an ni Jesu-Kristo. (Mat. 28:19, 20) Pinaagi sa pagpadapat sa mga sugyot nga ihatag sa umaabot nga mga artikulo niini nga serye, ikaw makadumalag mauswagong pagtuon sa Bibliya.