Sundoga ang Hustisya ni Jehova
1 “Si Jehova mahigugmaon sa hustisya.” (Sal. 37:28) Busa, bisan tuod siya nakahukom nga laglagon kining di-matarong nga kalibotan, siya naghikay nga ikahatag una ang pasidaan. (Mar. 13:10) Kini maghatag ug kahigayonan sa mga tawo nga makahinulsol ug mamaluwas. (2 Ped. 3:9) Naningkamot ba kita sa pagsundog sa hustisya ni Jehova? Ang kagul-anan ug pag-antos sa tawhanong pamilya mopalihok ba kanato sa pagpaambit sa paglaom sa Gingharian ngadto sa uban? (Prov. 3:27) Ang gugma sa hustisya motukmod kanato nga aktibong makig-ambit sa pagsangyaw.
2 Pagsangyaw nga Way-Pagpihig: Pinaagi sa pagpahayag sa katuyoan sa Diyos ngadto sa tanan nga walay pagpihig, kita ‘nagabuhat sa hustisya.’ (Miq. 6:8) Kinahanglan natong suklan ang di-hingpit nga kiling sa paghukom daan sa uban pinasukad sa ilang panggawas nga panagway. (Sant. 2:1-4, 9) Ang “kabubut-on [ni Jehova] mao nga ang tanang matang sa mga tawo mangaluwas unta ug makadangat sa tukmang kahibalo sa kamatuoran.” (1 Tim. 2:4) Ang pulong sa Diyos sa kamatuoran makapausab gayod sa kinabuhi sa mga tawo. (Heb. 4:12) Ang pagkaamgo niining kamatuorana mopalihok kanato sa pagduol sa mga tawo nga masaligon, bisan niadtong tingali wala maminaw sa miagi.
3 Ang usa ka igsoong babaye nga nagtrabaho sa usa ka tindahan morag nahadlok sa pisikal nga panagway sa usa ka regular nga pumapalit. Bisan pa niana, sa dihang mitungha ang nahiangay nga higayon, misulay siya sa pagsangyaw kaniya bahin sa saad sa Diyos nga Paraiso. Siya prangkang mitubag nga dili siya motuo sa mga sugilanong engkantohanon ug nga siya usa ka hippie ug naadik sa droga. Apan ang igsoong babaye wala mosurender. Usa ka adlaw gipangutana niya ang igsoong babaye kon unsay iyang ikaingon sa iyang taas nga buhok, busa siya mataktikanhong mitubag kon unsay giingon sa Bibliya bahin niana. (1 Cor. 11:14) Sa iyang katingala, pagkasunod adlaw namarbas na siya ug mubo nag buhok! Mihangyo siyag pagtuon sa Bibliya, nga malipayong gidumala sa usa ka igsoong lalaki, ug siya miuswag ngadto sa pagpahinungod ug bawtismo. Sama niining tawhana, daghang nag-alagad kang Jehova karon ang mapasalamaton sa way-pagpihig, mapadayonon nga mga paningkamot niadtong nagdala sa mensahe sa Gingharian ngadto kanila.
4 Sa di madugay hanawon na ni Jehova ang pagkadi-matarong sa tibuok yuta. (2 Ped. 3:10, 13) Sa limitadong panahon nga nahibilin, hinaot sundogon nato ang hustisya ni Jehova pinaagi sa paghatag sa tanan ug kahigayonan nga makalingkawas sa taliabot nga kalaglagan sa di-matarong nga kalibotan ni Satanas.—1 Juan 2:17.