Pagdumalag Progresibong mga Pagtuon sa Bibliya Diha sa Ganghaan ug Pinaagig Telepono
1. Unsay atong katuyoan sa pagdumalag mga pagtuon sa Bibliya?
1 Makalilipay gayod nga makasugod ug usa ka pagtuon sa Bibliya! Ugaling lang, ang pagkaplag ug tawo nga interesadong magtuon sa Bibliya maoy sinugdanan lamang. Ang katuyoan sa pagtuon mao ang pagtabang sa tawo aron mahimong tinuod nga tinun-an ni Kristo. (Mat. 28:19, 20) Unsay makatabang kanato aron makab-ot ang maong tumong?
2. Unsa ang mga pagtuon sa Bibliya diha sa ganghaan ug pinaagig telepono, ug nganong epektibo kini sila?
2 Puliki nga mga Tawo: Ang mga tawo karon mas nagakapuliki. Sa pipila ka dapit, pipila ra ka tawo ang tingali andam sa sinugdan nga mogahin ug tibuok oras sa pagtuon sa Bibliya. Aron matabangan ang maong mga tawo, kita gidasig sa pagsugod ug pagdumalag mga pagtuon sa Bibliya diha sa ganghaan o pinaagi sa telepono. Sa sinugdan, ang maong mga pagtuon mahimong mugbo ra ug tingali maoy paghisgot lamang ug pipila ka teksto sa Bibliya uban sa tabang sa usa o duha ka parapo diha sa usa ka publikasyon, sama sa librong Gitudlo sa Bibliya. Pagkadalayegon nga daghang magmamantala ang nagadumala karon sa ingon nga mga pagtuon diha sa ganghaan o pinaagig telepono!
3. Nganong angay kitang manlimbasog nga patas-an ang panahong gigugol sa usa ka pagtuon diha sa ganghaan?
3 Apan angay bang magmatagbawon na kita sa pagdumalag pagtuon diha sa ganghaan sa panahong walay tino? Dili. Bisan pag maalamon nga dili kita magdugay kaayo sa dihang unang masugdan ang usa ka pagtuon, ang Agosto 1990 nga Atong Ministeryo sa Gingharian, panid 8, mikomento: “Sa dihang masugdan na ang pagtuon ug naugmad ang interes sa tagbalay, ang taastaas nga panahon mahimong gugolon sa pagtuon.” Hinungdanon kaayo kini. Ingong ilustrasyon: Ang usa ka batang gikuraw mahimong pakan-on sa sinugdan ug tinagdiyutayng pagkaon hangtod mahibalik ang iyang gana, apan dili gayod kita magdahom nga siya maulian sa iyang bug-os nga kabaskog ug motubong normal kon siya pakan-on ug tinagdiyutay lamang sulod sa daghang bulan. Sa samang paagi, ang usa ka gitun-an ug Bibliya nagkinahanglag mas pormal ug regular nga pagtuon aron mahimong hamtong nga alagad sa Diyos.—Heb. 5:13, 14.
4. Unsa ang mga kaayohan sa pagdumalag pagtuon sa Bibliya sulod sa balay?
4 Mga Pagtuon sa Bibliya Sulod sa Balay: Mas maayo ang pagdumalag usa ka pagtuon diha sa pribadong dapit—sulod sa balay o ubang nahiangayng dapit. Kini mas makatabang sa pagkat-on ug makatabang sa gitun-an sa pagkasabot sa Pulong sa Diyos. (Mat. 13:23) Kini makapaarang sa magtutudlo nga mas ipahiangay ang materyal nga tun-anan ngadto sa mga panginahanglan sa gitun-an. Dugang pa, maposible ang mas mabug-oson, makapalig-on-sa-pagtuo nga paghisgot sa Pulong sa Diyos kon ang pagtuon himoon sa taastaas nga panahon.—Roma 10:17.
5. Sa unsang paagi makabalhin kita sa pagtuon diha sa ganghaan ngadto sa pagtuon sulod sa balay?
5 Sa unsang paagi makabalhin ka sa pagtuon diha sa ganghaan ngadto sa pagtuon sulod sa balay? Human sa ubay-ubay nga mugbong mga pagtuon, nganong dili yanong itanyag ang taastaas, tino nga yugto sa panahon? O makagamit kag dili-direktang metodo pinaagi sa pagsukna sa gitun-an, “May panahon ka ba karon nga molingkod ug atong hisgotan kini?” o “Unsa ka dakong panahon ang gusto nimong gugolon karon sa paghisgot niining ulohana?” Kon dili molampos ang imong paningkamot, ipadayon gayod ang pagdumalag mugbong mga pagtuon diha sa ganghaan. Sa nahiangayng panahon, sulayi na usab ang pagbalhin sa pagtuon ngadto sa sulod sa balay.
6. Uban sa unsang tumong nga angay kitang magtuman sa atong ministeryo, ug sa unsang paagi ang mga sugyot niining artikuloha makatabang kanato sa pagkab-ot sa maong tumong?
6 Samtang magpadayon kita sa pagpangitag mga tawong takos, dili nato kalimtan ang atong katuyoan sa pagsugod ug pagdumalag mga pagtuon sa Bibliya. Ang atong tumong mao ang pagtabang sa mga tawong matinud-anon ug kasingkasing nga mahimong nagpahinungod ug bawtismadong mga alagad ni Jehova. Hinaot nga iyang panalanginan ang atong mga paningkamot samtang kita nagatuman sa atong ministeryo uban niining tumonga.—2 Tim. 4:5.