Ang Librong Gitudlo sa Bibliya—Atong Pangunang Tabang sa Pagtuon sa Bibliya
1 Kita nahinam kaayo nga atong nasaksihan nga giluwatan ang librong Unsay Tinuod nga Gitudlo sa Bibliya? panahon sa “Diyosnong Pagkamasinugtanon” Distritong Kombensiyon! Ang mga delegado nalipay sa pagdawat ug personal nga kopya pagkatapos sa programa sa Sabado. Sa unsang paagi gamiton kining bag-ong tabang sa pagpanudlo? Gilaraw kini nga mahimo natong pangunang tabang sa pagtuon sa Bibliya. Bisag ang bag-ong libro ipresentar pag-una isip tanyag nga literatura sa Marso, ang mga magmamantala gidasig sa pagsugod dayon ug gamit niini diha sa pagsugod ug sa pagdumalag mga pagtuon sa Bibliya.
2 Presenteng mga Pagtuon sa Bibliya: Ang mga magmamantala nga nagdumalag mga pagtuon sa Bibliya ginamit ang librong Kahibalo o brosyur nga Gikinahanglan angayng mogamit ug maayong panghukom kon sa unsang paagi ug kon kanus-a sugdan ug gamit ang bag-ong libro diha sa pagtuon. Kon bag-o pang nasugdan ang usa ka pagtuon, mahimo nimong sugdan ang pagtuon gikan sa sinugdanan sa bag-ong libro. Kon taas na ang inyong pagtuon diha sa librong Kahibalo, inyong ikapadayon ang pagtuon diha sa katumbas nga kapitulo sa librong Gitudlo sa Bibliya. Kon hapit na mong matapos sa librong Kahibalo, mahimong taposon ninyo ang maong libro.
3 Walay duhaduha nga kitang tanan nahibalo nga daghang tawo ang makabenepisyo sa pagtuon sa librong Gitudlo sa Bibliya. Nganong dili tanyagan ug pagtuon sa Bibliya ang matag tawo ginamit kining sistematikong tabang sa pagtuon? Pananglitan, kadtong nagtuon sa brosyur nga Gikinahanglan o sa librong Kahibalo apan wala mouswag ngadto sa pagpahinungod ug pagpabawtismo tingali gustong mopadayon sa ilang pagtuon nga gamiton ang bag-ong libro. Mahimong modesisyon ang mga ginikanan nga gamiton ang maong libro diha sa ilang pagpanudlo sa ilang mga anak sa tukmang kahibalo bahin sa kabubut-on sa Diyos.—Col. 1:9, 10.
4 Pagtuon sa Ikaduhang Libro: Aduna bay kahikayan nga ang nagtuon sa Bibliya mogamit ug ikaduhang libro pagkahuman sa Unsay Tinuod nga Gitudlo sa Bibliya? Oo. Kon makitang ang nagtuon nagamauswagon, bisag hinay, ug nagapakitag pagpabili sa iyang ginatun-an, ikapadayon ang pagtuon sa Bibliya nga gamiton ang librong Simbaha ang Bugtong Matuod nga Diyos. Masaligon kami nga ang librong Gitudlo sa Bibliya mahimong usa ka epektibo natong galamiton samtang atong ginatuman ang sugo sa paghimog mga tinun-an.—Mat. 28:19, 20.