Kon Unsaon Paggamit ang Librong “Gugma sa Diyos” sa Pagdumala ug mga Pagtuon sa Bibliya
1. Unsay katuyoan sa librong Gugma sa Diyos?
1 Nalipay gayod kita sa pagkadawat sa bag-ong libro nga Magpabilin Kamo sa Gugma sa Diyos sa atong “Giniyahan sa Espiritu sa Diyos” nga Distritong Kombensiyon! Sumala sa gipahibalo, kining libroha gidisenyo aron tabangan kita sa pagkahibalo ug sa paghigugma sa mga sukdanan ni Jehova sa panggawi, dili aron sa pagtudlo ug paninugdan nga mga doktrina sa Bibliya. Kini dili nato itanyag diha sa pagpamalaybalay.
2. Sa unsang paagi gamiton kining libroha, ug alang kang kinsa?
2 Kining libroha maoy ikaduhang publikasyon nga gamiton sa pagtuon sa mga estudyante sa Bibliya pagkahuman sa libro nga Gitudlo sa Bibliya. Hinumdomi nga dili managsama ang espirituwal nga pag-uswag sa matag tawo. Busa sa matag pagtuon angay nga ipasibo ang gidaghanon sa materyal nga kobrehan sumala sa maarangan sa estudyante. Paneguroa nga masabtan pag-ayo sa estudyante ang inyong ginatun-an. Kasagaran, kining libroha dili gamiton sa pagsugod ug mga pagtuon sa Bibliya niadtong mga natun-an nag daghang libro apan dili tigtambongan sa mga tigom ug dili gayod andam mopahiuyon sa ilang kinabuhi sa mga kamatuoran sa Bibliya nga gitudlo kanila.
3. Unsay angay natong himoon kon may gidumalahan kitag pagtuon gamit ang librong Simbaha ang Diyos?
3 Kon ikaw adunay gidumalahan ug pagtuon gamit ang librong Simbaha ang Diyos ug anaa na sa kataposang mga kapitulo, mahimo ninyo kanang humanon ug dasiga ang estudyante nga iya na lang basahon ang librong Gugma sa Diyos. Sa laing bahin, labing maayo kon ibalhin ang pagtuon sa bag-ong libro ug tun-an kana gikan sa sinugdan. Sama sa librong Gitudlo sa Bibliya, kamo nay mag-igo kon inyo pang hisgotan ang apendise o dili na.
4. Unsay angay natong himoon kon ang ginatun-an sa Bibliya nabawtismohan na bisan wala pa niya matapos ang mga librong Gitudlo sa Bibliya ug Gugma sa Diyos?
4 Kon ang estudyante nabawtismohan na bisan wala pa matapos ang duha ka libro, nan, angay nga ipadayon ang pagtuon hangtod mahuman ang librong Gugma sa Diyos. Bisan pag siya bawtismado na, mahimo nimong itaho ang oras, balikduaw, ug ang pagtuon. Kon may magmamantala nga mouban ug moambit sa inyong pagtuon, mahimo usab niyang itaho ang oras.
5. Sa unsang paagi magamit nato ang librong Gugma sa Diyos sa pagtabang sa mga magmamantala nga dugaydugay nang wala makigbahin sa pagsangyaw?
5 Kon ang usa ka membro sa Komite sa Pag-alagad sa Kongregasyon nag-asayn kanimo sa pagdumalag pagtuon sa Bibliya sa usa nga nahimong dili aktibo, mahimong hangyoon ka nga hisgotan ang espesipikong mga kapitulo sa librong Gugma sa Diyos. Ang maong pagtuon dili kinahanglang dumalahon sa taas nga panahon. Kining bag-ong libro naundan gayod ug mapuslanon nga mga impormasyon nga gidisenyo aron tabangan kitang magpabilin “sa gugma sa Diyos”!—Jud. 21.