Ginatanyag Mo ba ang mga Pagtuon sa Bibliya?
1 Daghan ang nakabaton ug maayong kalamposan sa pagsugod ug mga pagtuon sa Bibliya pinaagig paggamit ug diretsong paagi sa pagtanyag sa mga tawo sa kahigayonan nga makatuon sa Bibliya. Usa ka lalaki kinsa midumili sa basahon sa daghang higayon daling misanong sa dihang gitanyag ang usa ka pagtuon sa Bibliya. Siya mitubag: “Gusto gayod nako kanunay nga magtuon sa Bibliya.” Ang usa ka pagtuon sa Bibliya nasugdan, ug ang tibuok pamilya kusog nga miuswag.
2 Ang tanan kinahanglang matinguhaon nga mosugod ug mga pagtuon. Kon ang mga indibiduwal angayng mouswag sa pagkahimong mga tinun-an ni Kristo, kinahanglang sila matudloan. (Mat. 28:19, 20) Aron matudloan, sila kinahanglang madumalahan ug usa ka pagtuon sa Bibliya. Ang mga pagtuon sagad masugdan pinaagig pagtanyag lamang nga ipasundayag kon sa unsang paagi ang tagbalay makakat-on ug dugang bahin sa Bibliya ug sa mga saad sa Diyos. Usa ka igsoon nakasugod ug lima ka pagtuon diha sa tract nga Kinabuhi sa Malinawong Bag-ong Kalibotan. Tungod kay dili niya madumala ang ingon niana ka daghan nga pagtuon sa Bibliya nga makanunayon, siya misugod sa paghatag sa maong mga pagtuon sa Bibliya ngadto sa ubang mga magmamantala.
3 Kon makaplagan natong sayon ang pagsugod ug mga pagtuon, mahimong ikuyog nato ang ubang mga magmamantala ug buligan sila nga makabaton usab ug mga pagtuon. O ikahatag nato ang pipila ka pagtuon nga atong nasugdan ngadto sa uban sa kongregasyon. Kon buot gayod nimo nga modumalag usa ka pagtuon sa Bibliya, nganong dili sulayan ang pagtanyag ug usa ka pagtuon sa Bibliya sa mga gikahibalag nimo sa balaybalay nga ministeryo? Sa usa ka kahimtang ang usa ka magmamantala mibalikduaw sa usa ka ten-edyer nga babaye kinsa wala kaayo magpakitag interes. Bisan pa niana, gitanyagan siya sa magmamantala ug usa ka pagtuon sa Bibliya, ug siya midawat. Siya karon bawtismado na, ug ang iyang igsoong babaye ug ang bana sa iyang igsoong babaye nagatambongan na usab sa mga tigom.—Gal. 6:6.
4 Dili ang tanan nga nasugdan tag pagtuon mopadayon sa pagtuon. Dili ang tanan nga nagtuon makadangat sa kamatuoran. Apan ang pipila mohimo niana. Sa dugang pa nga kita mosugod ug mga pagtuon, adunay dugang pang purohan nga mabuligan nato ang uban nga mahimong mga magdadayeg ni Jehova.