Ang Balaang Pagpanudlo Nagahimog Kusganong Impluwensiya
1 Pagkadakong pribilehiyo nato nga magadawat ug instruksiyon gikan sa Balaang Usa, ang atong Maglalalang, si Jehova nga Diyos! (Sal. 50:1; Isa. 30:20b) Gikan sa tanang kanasoran karon, mga panon sa katawhan ang nagananayan ngadto sa iyang bukid sa putling pagsimba aron pagatudloan niya. (Miq. 4:2) Ang ubang mga minilyon nagapalista sa mga tunghaan nga nagabayaw sa kalibotanong kaalam. Apan ang kaalam nga nagasalikway kang Jehova ug sa iyang sinulat nga Pulong maoy binuang sa panan-aw sa Diyos.—Sal. 14:1; 1 Cor. 1:25.
2 Epekto sa Kristohanong Pagkinabuhi: Ang balaang pagpanudlo nagatabang sa paghulma sa atong mga tanlag. Ang matag usa natawo nga may usa ka tanlag, apan aron nga kana magagiya kanato sa dalan sa pagkamatarong, kinahanglan kanang bansayon. (Sal. 19:7, 8; Roma 2:15) Ang katawhan sa kalibotan wala maghulma sa ilang panghunahuna sumala sa Pulong sa Diyos, ug tungod nianang katarongana sila nalibog ug di-tino kon unsa ang husto ug unsa ang sayop. Ang mga panaglalis nagaulbo bahin sa moral nga mga isyu tungod kay ang kada usa moinsister sa pagbuhat kon unsa ang husto sa iyang kaugalingong mga mata. Ang kadaghanan gustog bug-os nga kagawasan sa pagdesider sa kaugalingong kurso sa ilang kinabuhi. Nagadumili sila sa pagpamati sa bugtong tinubdan sa matuod nga kaalam. (Sal. 111:10; Jer. 8:9; Dan. 2:21) Apan ang balaang pagpanudlo nagsulbad nianang mga gumonhapa alang kanato, ug nagapabilin kitang nahiusa ingong ang panimalay sa Diyos tungod kay natudloan kita niya. Kita masaligong moatubang sa kaugmaon uban ang maayong tanlag, nga nagapabiling puliki sa atong ministeryo.
3 Ang balaang pagpanudlo nagatabang kanato sa pagsukol sa “tanang hangin sa tuloohan.” (Efe. 4:14) Wala kita mahaylo sa pagtuon sa pilosopiya, nga nagahimo sa mga tawong tigpangitag-sayop ug mga maduhaduhaon, nagadasig ug kinaugalingong-pagbuot, ug nagatultol ngadto sa moral nga kagun-oban. Kita mahimuot nga matudloan ni Jehova, ug busa malikayan nato ang kaguol ug kasakit nga nasinatian sa daghan. Ang mga balaod ni Jehova ug mga pahinumdom maoy samag ‘pulong sa likod nato,’ nga nagaingon: “Kini mao ang dalan. Lakaw diha niana, kamong katawhan.”—Isa. 30:21.
4 Atong mga Tigom ug Ministeryo: Atong ginatamod ang Hebreohanon 10:23-25 ingong sugo gikan sa Diyos. Sa mga tigom sa kongregasyon, kita gitudloan ni Jehova. Mao bay atong batasan ang kanunayng anaa sa mga tigom, o ginatamod ta ba ang pagtambong sa tigom ingong diyutay rag bili? Hinumdomi, ang panagkatigom maoy bahin sa atong pagsimba. Dili gayod kana isipon ingong kapilian (sundon o dili). Dili kita makaako nga sipyaton ang bisan unsang bahin sa programa sa espirituwal nga pagpakaon nga giandam ni Jehova alang kanato.
5 Si Moises nag-ampo sa Diyos: “Ipakita kanamo kon unsaon pag-isip sa among mga adlaw diha sa paaging mabatonan namo ang maalamong kasingkasing.” (Sal. 90:12) Mao ba usab kini ang atong pag-ampo? Ginapabilhan ba nato ang matag bililhong adlaw? Kon mao, nan atong “mabatonan ang maalamong kasingkasing” pinaagig paggugol sa matag adlaw sa mapuslanong paagi, ngadto sa himaya sa atong Dakong Instruktor, si Jehova nga Diyos. Ang balaang pagpanudlo magatabang kanato sa pagbuhat niana.