Makapalipayng mga Kombensiyon Nagpauswag sa Diyosnong Pagtulon-an
KARONG adlawa, ang kalibotan gibahaan sa impormasyon. Sa telebisyon ug radyo, sa mga libro o pinaagi sa mga kompiyuter, halos walay kinutoban ang tinubdan sa kahibalo bahin sa hapit tanang matang sa ulohan nga mahunahunaan. Sa gihapon, ang mga tawo magkasakit ug mamatay. Ang krimen, gutom, ug kawalad-on naglungtad sa tibuok yuta, ug ang emosyonal nga mga sakit nakaapektar sa mas daghang tawo sukad masukad. Ang tanang mabatonang kahibalo napakyas sa pagtul-id sa mga butang. Ngano? Tungod kay ang mga tawo walay pagtagad sa kaalam sa Diyos.
Pagkahaom, gayod, nga “Diyosnong Pagtulon-an” mao ang gipiling tema sa bag-o pang mga kombensiyon sa mga Saksi ni Jehova! Ang programa nagpahinumdom sa mga nanambong nga mao lamang kini ang pagtulon-an nga makaplagan diha sa Pulong sa Diyos, ang Bibliya, nga adunay tinuod, makaluwas sa kinabuhi nga bili.
Ang unang kombensiyon gisugdan sa Huwebes, Hunyo 3, sa Uniondale, Nueba York, T.B.A. Sukad niadto padayon, ang programa gipresentar sa lainlaing dakbayan sa usa ka nasod ngadto sa lain, nga natapos sa mga kontinente sa Aprika ug Habagatang Amerika.
Sa Hapon sa Unang Adlaw
Kada adlaw may tema nga nagpasiugda sa usa ka bahin sa diyosnong pagtulon-an. Pananglitan, ang programa sa unang adlaw gipasukad sa temang “Pagkahibalo sa Pagtulon-an nga Gikan sa Diyos.” (Juan 7:17) Kining ulohana napalutaw ug maayo sa nagakahapon.
Human sa awit ug pag-ampo, gibuksan sa tsirman sa kombensiyon ang programa pinaagi sa pakigpulong nga nag-ulohang “Diyosnong Pagtulon-an Nagpatigom Kanato.” Iyang gipakita nga ang katawhan ni Jehova nahiusa pinaagi sa pagkat-on sa Iyang mga dalan ug sa paglakaw sa Iyang mga agianan. (Miqueas 4:1-5) Ang diyosnong pagtulon-an naglig-on sa ilang panaghiusa. Ang mga kombensiyonista gidasig nga magkalipay sa ilang nahiusang panag-ubanay.—Salmo 133:1-3.
Sa kahaponon na, ang regular nga mga tigom sa kongregasyon gihisgotan sa usa ka simposyom nga nag-ulohang “Mga Tigom nga Nagatudlo Kanato sa mga Dalan ni Jehova.” Gipahinumdoman sa unang mamumulong ang mga kombensiyonista nga kon magtigom kita, gipasidunggan nato si Jehova ug sa ingon makadawat sa Iyang panalangin. Gipasiugda sa sunod nga mamumulong ang panginahanglan sa pagpakigbahin sa mga tigom. Sa pagbuhat niana, atong gidayeg si Jehova sa katilingban, nagpasundayag sa atong pagtuo, ug nagpalig-on sa pagtuo sa uban. Ang ikatulong mamumulong sa simposyom nagpakita sa panginahanglan sa pagpadapat sa atong nakat-onan sa mga tigom. Kita kinahanglang mahimong “mga magbubuhat sa pulong, ug dili mga mamiminaw lamang.”—Santiago 1:22.
Sunod miabot ang maayong panaghisgot labot sa pag-awit ug mga pagdayeg kang Jehova. Ang kinasingkasing nga pag-awit maoy hinungdanong bahin sa atong pagsimba. Kining pakigpulonga gisundan sa keynote address, “Diyosnong Pagtulon-an Nagmadaogon.” Pagkamaayo nga tema! “Si Jehova mao ang Tuboran sa labing maayong pagtulon-an nga mahimong mabatonan ni bisan kinsa,” matud sa mamumulong. Unya, human sa mubong paghisgot labot sa milagro sa tawhanong utok, siya miingon: “Kinahanglang gamiton nato ang atong katakos sa panghunahuna ilabina sa pagdawat sa diyosnong pagtulon-an. Kini lamang ang mosangpot sa tinuod nga kaalam.” Pagkatinuod!
Ang Ikaduhang Buntag
“Dayandayani Kanunay ang Pagtulon-an sa Atong Manluluwas, ang Diyos” mao ang tema sa ikaduhang adlaw sa kombensiyon. (Tito 2:10) Kining prinsipyoha gipatataw diha sa pakigpulong nga “Diyosnong Pagtulon-an Batok sa mga Pagtulon-an sa mga Demonyo.” Oo, ang mga demonyo may kaugalingong mga pagtulon-an. (1 Timoteo 4:1) Ingon sa gisaysay sa mamumulong, ang diyosnong pagtulon-an nagmadaogon batok sa “kaalam” ni Satanas pinaagi sa pagyagyag sa bakak nga mga pagtulon-an ug ang malipotong mga paagi sa Yawa. Tungod niini, mga 4,500,000 ka matarong ug kasingkasing nga mga Kristohanon dili na mga ulipon sa kangitngit ni Satanas.—Juan 8:32.
Sa gihapon, kinahanglang padayon natong suklan si Satanas. Kini gipasiugda sa pakigpulong nga “Gisuklan Mo ba ang Espiritu sa Kalibotan?” Ang espiritu niining kalibotana makamatay. Kini nagadasig sa mahugaw nga moralidad, maalsahong tinamdan sa awtoridad, ug maibogong tinguha alang sa materyal nga mga butang. Kinahanglang susihon kanunay sa Kristohanon ang iyang kaugalingon. Hataas pa ba gihapon ang iyang mga sukdanan kon bahin sa iyang mga ginatan-aw, ginapamatian, o ginabasa? Makapadasig, ang mamumulong miingon: “Gidayeg namo kamo, mga igsoong lalaki, mga igsoong babaye, ug mga batan-on, alang sa inyong kinasingkasing nga paningkamot niining bahina.”—1 Juan 2:15-17.
Adunay usa ka butang nga nagpalisod sa pagsukol sa espiritu sa kalibotan. Unsa man kini? Kitang tanan dili-hingpit. Tinuod, si Jesus namatay alang sa atong mga sala, apan kita kinahanglan pang makigbisog batok sa kiling sa pagpakasala. Kini gitagad sa pakigpulong nga “Pakig-away Batok sa Paghawid sa Sala Diha sa Nahulog nga Unod.” Apil sa ubang mga butang, ang mamumulong miingon nga makadaog kita batok sa sala kon isul-ob nato ang bag-ong personalidad ug likayan ang bisan unsang butang nga magpukaw sa atong makasasalang mga kiling.
“Himoang Imong Paagi sa Pagkinabuhi ang Makahimsog nga Pagtulon-an” mao ang ulohan sa misunod nga pakigpulong. Ang pipila sobrang nabalaka sa ilang pisikal nga kahimsog. Apan, sa pagkatinuod, ang espirituwal nga kahimsog ang mas hinungdanon. Gipasiugda sa mamumulong ang panginahanglan nga magmaseryoso kita sa atong mga responsabilidad niining bahina, ug siya may linaing makapadasig nga pulong alang sa Kristohanong mga babaye. Siya miingon: “Giapresyar gayod nato ang edarang mga igsoong babaye ug ang batan-ong mga igsoong babaye nga timbang kaayo sa ilang kasibot sa ministeryo ug sa ilang pag-atiman sa personal nga mga responsabilidad.” Oo, ug kitang tanan nagapasalamat kang Jehova alang sa makahimsog nga pagtulon-an nga nagpalain kanato gikan sa kalibotan.
Ang programa sa buntag gitiklopan sa pakigpulong “Diyosnong Pagtulon-an Nagapadayag sa Katuyoan sa Kinabuhi.” Ang mamumulong miingon: “Sa dili madugay, halos ang tanan gustong mahibalo sa tubag, ‘Unsay katuyoan sa kinabuhi?’” Pinaagi sa kusganong mga argumento, iyang gipamatud-an nga ang Bibliya lamang ang nagahatag ug tinuod nga tubag sa maong pangutana. Unya, gipakita sa mamumulong nga ang kahibulongang mga saad sa Diyos tinuod gayod nga nagahatag kanatog katuyoan sa kinabuhi. Malagmit, daghan sa mamiminaw ang naghunahuna, ‘Mao gayod kini ang kinahanglang madunggan sa mga tawo sa akong teritoryo.’ Mao usab kanay pagtuo sa Nagamandong Lawas. Usa ka bag-ong brosyur, nga nag-ulohang Unsay Katuyoan sa Kinabuhi? giluwat pagkahuman niining pakigpulonga. Pagkadako sa kalipay sa tanan! Ang intermisyon sa udto naghatag ug higayon aron matan-aw ang bag-ong publikasyon.
Ang Ikaduhang Hapon
Ang unang pakigpulong sa hapon may makapahupay nga temang “Itugyan ang Tanan Nimong mga Kabalaka Kang Jehova.” Daghang butang ang nagpahinabog kabalaka; apan, ang Pulong sa Diyos nag-ingon nga kinahanglang itugyan nato ang tanan natong mga kabalaka diha kaniya. (1 Pedro 5:6, 7) Tinuod, ang pila ka suliran dili mawala, ug labot niini ang mamumulong miawhag: ‘Magmapailobon. Paghulat kang Jehova. Tuohi gayod nga ang pagsunod sa Bibliya mao kanunay ang labing maayo. Kon atong isentro ang atong kasingkasing diha kang Jehova, atong matagamtam “ang kalinaw sa Diyos” nga lapaw sa tanang pagpanabot.’—Filipos 4:6, 7.
Ang sunod nga upat ka pakigpulong nagpakita nga ang diyosnong pagtulon-an mapadapat sa pamilyahanong kinabuhi. Ang una, “Paghimo sa Kaminyoon nga Malungtarong Panag-ipon,” nagpahinumdom sa mga kombensiyonista nga sa mga mata ni Jehova ang kaminyoon maoy kahikayan nga dili ikasalindot, sama sa paglantaw sa daghan diha sa kalibotan. Hinunoa, aron molampos ang kaminyoon, kinahanglan natong sundon ang giya ni Jehova. Siya ang naglalang kanato. Busa, ang iyang dinasig nga Pulong naundan sa labing maayong tambag sa kaminyoon nga mabatonan.
Ang pakigpulong “Pagkugi Alang sa Kaluwasan sa Inyong Panimalay” naghisgot bahin sa mga hagit sa pag-atiman sa pamilya niining kritikal nga mga panahon. (2 Timoteo 3:1) Ang mga ginikanan magatudlo sa ilang mga anak sa pisikal nga kahinlo, maayong pamatasan, paagi sa pagtrabaho, ug kon unsaon sa pagkahimong manggihatagon ug matinagdanon sa uban. Labing hinungdanon, kinahanglang ilang tudloan ang ilang mga anak aron mahimong debotadong mga alagad ni Jehova.—Proverbio 22:6.
Sa misunod nga panaghisgot, “Mga Ginikanan, ang Inyong mga Anak Nagkinahanglan ug Linaing Pagtagad,” gipahinumdoman sa mamumulong ang mga kombensiyonista sa panginahanglan sa paghatag ug komendasyon sa mga anak, samtang dili magpakabuta sa ilang mga kahuyangan. Ang mga ginikanan kinahanglang ilabinang alisto sa mga kiling sa pagkadili-matinud-anon, materyalismo, o kahakog.
Ang batan-ong mga kombensiyonista ilabinang naminaw ug maayo sa pakigpulong “Mga Batan-on—Kansang Pagtulon-an ang Inyong Gisunod?” Ang mga butang malisod alang sa batan-ong mga Kristohanon karong adlawa. Ang pagsunod sa kalibotan sayon ra, apan kini motultol sa kamatayon. Bisag ang pagpili sa pagpabilin sa diyosnong pagtulon-an magkinahanglan ug kaisog alang sa usa ka batan-on, kini mohatag ug dagkong mga panalangin karon ug kinabuhing walay kataposan sa umaabot.—1 Timoteo 4:8.
Ang ikaduhang adlaw gitapos sa makapadasig nga dramang Mga Batan-on nga Nahinumdom sa Ilang Maglalalang Karon. Sa introduksiyon, gitawag sa direktor ang mga batan-on sulod sa organisasyon sa Diyos ingong “teokratikanhong kasundalohan nga maunongong nakigbahin sa debotadong pag-alagad kang Jehova nga Diyos ug sa iyang tinudlong langitnong Hari, si Kristo Jesus.” Siya midugang: “Ang atong mga batan-on sa pagkatinuod nakahimog usa ka butang nga maayo!” Tin-awng gipakita sa drama nga kon bansayog maayo sa ginikanan ang bata, kana makahatag sa bata ug kaayohan inigdako na niya ug mag-alagad kang Jehova sa iyang kaugalingon.
Buntag sa Ikatulong Adlaw
Ang tema sa ikatulong adlaw maoy “Padayon sa Pagtudlo sa Katawhan sa Tanang Kanasoran.” (Mateo 28:19, 20) Ang mga kombensiyonista sa walay duhaduha nagpaabot ug tukma sa panahong tambag bahin sa pagsangyaw nga buluhaton, ug sila wala mahigawad. Ang simposyom nga nag-ulohang “Malipayong Nagatuman sa Atong Pagsangyaw ug Pagpanudlo nga Buluhaton” nagpalig-on sa ilang determinasyon sa pagpadayon sa pagpakig-ambit sa pagsangyaw nga buluhaton. Gihisgotan sa unang pakigpulong ang unang mga pagduaw; ang ikaduha, mga pagbalik duaw; ug ang ikatulo, ang mga pagtuon sa Bibliya. Ang mga misyonaryo sa tibuok kalibotan gidapit sa pagpauli ug sa pagtambong sa kombensiyon uban sa ilang mga pamilya ug mga higala. Sa pila ka dapit, ang pipila ka misyonaryo nakig-ambit niining bahina sa programa. Makapalipay ang pagkadawat ug pipila ka katin-awan sa ilang kalamposan diha sa ilang mga asaynment. Gitagad sa misunod nga pakigpulong, “Pag-abot sa Tanan sa Maayong Balita” ang epekto sa dili-pormal nga pagsangyaw.
Ang buntag gitapos pinaagi sa pakigpulong sa bawtismo, nga mao kanunay ang usa sa pangunang bahin sa dagkong panagkatigom sa mga Saksi ni Jehova. Sa nagkalainlaing mga kombensiyon, dagkong grupo sa bag-ong mga dedikado mibarog sa atubangan sa nagtigom nga panon ug masaligong mitubag ug oo sa duha ka pangutana nga gitumong kanila. Dayon sila nagpabawtismo sa atubangan sa katilingban. Pagkakusganong pamatuod sa dakong epekto sa diyosnong pagtulon-an!
Hapon sa Ikatulong Adlaw
Ang programa sa hapon gisugdan pinaagi sa laglom nga panaghisgot sa Kasulatan. Ang mga Saksi ni Jehova sinati sa mga pulong sa Mateo kapitulo 24 ug Lucas kapitulo 21. Ang pipila ba naghunahuna nga wala nay bag-ong mahisgotan bahin niining mga kapituloha sa Bibliya? Pagkasayop nila! Ang mga pakigpulong “Unsa man ang Ilhanan sa Imong Presensiya?” ug “Tug-ani Kami, Kanus-a Mahitabo Kining mga Butanga?” nagdala sa mga kombensiyonista ngadto sa makaiikag nga panaghisgot sa mga bahin niadtong duha ka kapitulo ug mihatag ug nunot sa panahong mga katin-awan sa pila ka bersikulo. Dihay bibo nga mga panaghisgot human sa sesyon samtang ang mga kombensiyonista nagbayloayg mga hunahuna sa pagsusi kon ila bang nasabtan ang mga punto. Tino, daghang pangutana ang matubag sa dihang kining impormasyona ipatik na sa Ang Bantayanang Torre.
Ang tema sa pagtuon sa Bibliya gipadayon diha sa pakigpulong “Impormatibong mga Tubag sa Inyong mga Pangutana sa Bibliya.” Unya ang programa gipunting ngadto sa lain nga ulohan. Ang tuig 1993 nagtimaan sa ika-50ng kasumaran sa Watchtower Bible School of Gilead. Ang pakigpulong “Kalim-an ka Tuig sa Misyonaryong Pagbansay ug Kalihokan sa Gilead” nagpakita sa mga kombensiyonista kon unsay nalampos sulod nianang yugtoa. Kon dihay misyonaryo panahon sa pakigpulong nga “Mga Kalamposan sa Pag-ebanghelyo sa Tibuok-Kalibotang Kanataran,” sila gidapit sa pagpakig-ambit sa pipila nila ka kasinatian uban sa mga mamiminaw. Ang pagpaminaw sa mga asoy sa mga misyonaryo makapalipay!
Ang misunod nga pakigpulong, “Kon Nganong ang mga Saksi ni Jehova Padayong Nagabantay,” maoy laing pagtulon-an sa kasaysayan. Kini nagpakita nga ang mga Kristohanon nagabantay sukad pa sa unang siglo K.P. hangtod karon. Kana mitultol ngadto sa laing sorpresa. Sayo sa misunod nga pakigpulong, nga nag-ulohang “Mga Magmamantala sa Gingharian Aktibo sa Tibuok Yuta,” giisa sa mamumulong ang usa ka dakong tomo (dihang mabatonan na sa lokal nga pinulongan) ug miingon: “Usa ka kalipay nga ipahibalo dinhi karong adlawa ang pagluwat niining bag-ong libro, nga nag-ulohang Mga Saksi ni Jehova—Mga Magmamantala sa Gingharian sa Diyos.” Ang libro naundan ug detalyadong asoy bahin sa modernong-adlawng kasaysayan sa mga Saksi ni Jehova. Giasoy niini ang kulbahinam nga kasaysayan sa pagkamalahutayon, determinasyon, ug kalamposan, nga naghatag ug kusganong pamatuod nga ang espiritu ni Jehova aktibo diha sa iyang mga alagad.
Ang Ikaupat nga Buntag
Kadto mao nay kataposang adlaw sa kombensiyon. Ang tema sa adlaw, “Paghatag ug Kaayohan sa Atong Kaugalingon Pinaagi sa Diyosnong Pagtulon-an,” misaad ug maayong sangkoanan sa programa. (Isaias 48:17) Sa buntag nakuha ang pagtagad sa mga kombensiyonista sa usa ka simposyom sa tulo ka puwersadong mga pakigpulong. Nag-ulohang “Ang Dinasig nga Mensahe sa Pasidaan ni Jeremias—Alang sa Miagi ug sa Presente,” ang simposyom naundan sa bersikulo por bersikulo nga panaghisgot sa Jeremias kapitulo 23, 24, ug 25. Pagkakusganong mensahe ang unod niining mga kapituloha! Ang dili-matinumanong Israel sa mga adlaw ni Jeremias seguradong nangurog sa iyang prangka, dinasig sa Diyos nga mga pasidaan. Ang tibuok kalibotan labaw pang nangurog sa dihang kadtong mga pasidaana natuman. Lahi ba ang kahimtang karon? Dili gayod. Ang mga Saksi ni Jehova maisogong nagwali sa mga mensahe sa paghukom sa Diyos. Ngadtongadto, kinahanglang atubangon niining tibuok sistema sa mga butang ang mga buhat sa paghukom ni Jehova. Kana magpasabot ug bug-os nga kalaglagan sa kalibotan ni Satanas.
Ang Dominggo sa buntag gitapos pinaagi sa ikaduhang drama, Ayawg Palimbong o Biaybiaya ang Diyos. Sa tin-aw nga paagi, gipakita niadto kon sa unsang paagi ang diyosnong pagtulon-an makapanalipod kanato nga maimpluwensiyahan sa mahugaw nga mga video ug musika ug gikan sa kiling sa pagpahinabog away-away taliwala sa isigka-Kristohanon. Sa kataposan sa drama, ang tsirman mikutlo niining makapukaw sa kaisipan nga mga pulong sa usa sa mga karakter sa dula: “Kita dili kay dili-maapektohan sa impluwensiya sa kalibotan. Kon dili kita mosukol, ang kalibotan sa hinayhinay modaot sa atong panghunahuna. Ug kon kaha magpabilin kitang matinumanon o dili nagadepende sa kon unsay atong ginapugas.” Pagkatinuod!
Ang Kataposang Hapon
Ang kombensiyon tulin nga naghinapos samtang ang mamumulong miduol sa podyum sa paghatag sa publikong pakigpulong, nga nag-ulohang “Mapuslanong Pagtulon-an Alang sa Atong Kritikal nga mga Panahon.” Sa usa ka tin-aw ug makataronganong paagi, iyang gipaila ang yawing mga suliran nga nagaapektar kanato karon ug gihisgotan ang pila ka paagi nga makatabang ang diyosnong pagtulon-an kanato sa pagtagamtam sa usa ka mas maayong kinabuhi. Matud niya nga kon kita nagasunod sa Kasulatanhong pagtulon-an karon, makaarang kita sa pagsunod niana sa walay kataposan sa bag-ong kalibotan ni Jehova.
Human sa sumaryo sa senemanang pagtuon sa Bantayanang Torre, panahon na alang sa pangataposang pakigpulong. Ang mamumulong daklit nga mihisgot sa mga dagkong punto sa upat-ka-adlaw nga programa ug gipahinumdoman ang mga kombensiyonista sa bag-ong mga publikasyon. Iya usab nga gipahibalo ang ikaduhang videocassette diha sa seryeng The Bible—A Book of Fact and Prophecy nga sa dili madugay iluwat. Sa pagkatinuod, kanang maong videocassette, nga nag-ulohang The Bible—Mankind’s Oldest Modern Book karon mabatonan na sa Ingles. Ang makapatandog nga mga taho gibasa gikan sa mga dapit nga adunay seryosong mga suliran, sama sa Bosnia ug Herzegovina. Sa pagtapos, gibasa sa mamumulong ang mga pulong sa Ecclesiastes 12:13: “Ang kataposan sa butang, ang tanan nadungog na, mao: Kahadloki ang matuod nga Diyos ug bantayi ang iyang mga sugo. Kay kini mao ang tibuok nga katungdanan sa tawo.”
Pagkamaayo nga pahinumdom! Pasagding magkinabuhi kita alang sa adlaw sa dihang ang tanang katawhan magadayeg sa atong Dakong Instruktor, si Jehova, ug patalinghogan ang iyang diyosnong pagtulon-an.
[Mga hulagway sa panid 24, 25]
Ang “Diyosnong Pagtulon-an” nga mga kombensiyon sa Moscow ug Kiev nakahatag ug dakong kalipay
[Mga hulagway sa panid 26, 27]
1. Pinaagi sa pagpabawtismo, daghan ang nagpasimbolo sa ilang pagpahinungod sa Diyos
2. Usa ka 100-anyos nga kombensiyonista nalipay nga nakadawat ug bag-ong publikasyon
3, 4. Makapukaw sa kaisipan nga mga drama giapresyar gayod
5. Gipasiugda sa mga misyonaryo nga giinterbiyo sa mga kombensiyon ang mga kaayohan sa diyosnong pagtulon-an