Mga Magtutudlo sa Pulong sa Diyos—Giagda sa Pagtuman sa Ilang Buluhaton

GATOSAN ka libo ka magtutudlo nagkatigom aron magpatudlo sa di pa dugayng mga bulan. Nagsugod sa miaging Mayo 2001, sila nagkatigom diha sa gatosan ka “Magtutudlo sa Pulong sa Diyos” nga Distritong mga Kombensiyon sa mga Saksi ni Jehova sa tibuok kalibotan. Ang mga delegado giagda sa pagtudlo sa ilang kaugalingon, aron mahimong labi pang kuwalipikado, ug aron sa pagtuman sa ilang buluhaton ingong mga magtutudlo.

Nakatambong ka ba sa usa niining mga kombensiyona? Kon mao, walay duhaduha nga mapasalamaton ka sa maayong espirituwal nga pagkaon nga gihatag niining maong mga panagkatigom sa pagsimba sa matuod nga Diyos, si Jehova. Atong sublion karon ang matulon-anong programa sa maong kombensiyon.

Unang Adlaw—Ang Inspiradong Kasulatan Mapuslanon sa Pagpanudlo

Ang tsirman sa kombensiyon mainitong nag-abiabi sa mga delegado pinaagi sa pakigpulong nga “Magpatudlo, Kamong mga Magtutudlo sa Pulong sa Diyos.” Kay nakakat-on gikan kang Jehova, ang “Dakong Instruktor,” si Jesu-Kristo nahimong Dakong Magtutudlo. (Isaias 30:20; Mateo 19:16) Kon buot natong mouswag ingong mga magtutudlo sa Pulong sa Diyos, kita usab kinahanglang matudloan ni Jehova.

Dayon misunod ang bahin nga “Pagpanudlo Bahin sa Gingharian Magpatunghag Maayong Bunga.” Pinaagig pag-interbiyo sa eksperyensiyadong mga magtutudlo sa Pulong sa Diyos, napasiugda ang kalipay ug mga ganti sa paghimog tinun-an.

Misunod ang makapalihok nga pakigpulong nga nag-ulohang “Napukaw Tungod sa ‘Halangdong mga Butang sa Diyos.’” Sa unang siglo, ang “halangdong mga butang” nga naglangkit sa Gingharian sa Diyos nakapalihok sa mga tawo nga mosanong. (Buhat 2:11) Kita usab makapalihok sa mga tawo nga mosanong pinaagi sa pagmantala sa maong “halangdong mga butang” sama sa Kasulatanhong mga pagtulon-an bahin sa lukat, pagkabanhaw, ug sa bag-ong pakigsaad.

Ang sunod nga pakigpulong nagdasig sa tanan sa “Pagkakaplag ug Kahimuot sa Pagkamatarong ni Jehova.” (Salmo 35:27) Natabangan kita sa pagtinguha sa pagkamatarong pinaagi sa pagkat-on sa paghigugma kon unsay matarong ug pagdumot kon unsay daotan, pinaagi sa pagtuon sa Bibliya, sa aktibong pagsukol sa mga impluwensiya nga makadaot sa espirituwal nga paagi, ug pinaagi sa pag-ugmad sa pagkamapainubsanon. Ang maong mga lakang motabang sa pagpanalipod kanato batok sa dili-maayong mga pakig-uban, sa materyalistikong mga sukdanan sa kalibotan, ug batok sa imoral ug mapintas nga kalingawan.

Ang keynote address nga nag-ulohang “Bug-os nga Nasangkapan Ingong mga Magtutudlo sa Pulong sa Diyos,” nagpahinumdom kanato nga si Jehova maghimo kanatong iyang kuwalipikadong mga ministro pinaagi sa iyang Pulong, iyang balaang espiritu, ug sa iyang yutan-ong organisasyon. Mahitungod sa paggamit sa Pulong sa Diyos, ang mamumulong nagtambag kanato: “Ang atong tumong mao ang pagkuha sa mensahe sa Bibliya gikan sa pinatik nga panid ug isilsil kini sa mga kasingkasing sa atong mga mamiminaw.”

Ang unang simposyum sa kombensiyon nag-ulohang “Pagtudlo sa Atong Kaugalingon Samtang Nagtudlo sa Uban.” Ang pangbukas nga bahin nagpasiugda nga kita angayng mosunod sa samang hataas nga sukdanan sa Kristohanong moralidad nga ginatudlo nato sa uban. Ang sunod nga bahin nagtambag kanato nga ‘gamiton ang pulong sa hustong paagi.’ (2 Timoteo 2:15) Aron matudloan ang atong kaugalingon, mahinungdanon ang regular ug makugihong personal nga pagtuon sa Bibliya, way sapayan kon unsa na kita ka dugay nga nag-alagad sa Diyos. Gipakita sa kataposang bahin sa simposyum nga ang Yawa nagabantay kanato, nga nagatan-aw kon duna ba kitay mga tinamdan nga sama sa garbo, independenteng espiritu, paghatag ug dakong importansiya sa kaugalingon, pangabugho, kasina, kayugot, kalagot, ug pagpangitag sayop. Apan, kon ato gayong suklan ang Yawa, siya mokalagiw gikan kanato. Aron makasukol kaniya, kita angayng moduol sa Diyos.—Santiago 4:7, 8.

Ang tukma-sa-panahong pakigpulong nga “Kasilagi ang Kalibotanong Hampak sa Pornograpiya” nagpakita kanato kon sa unsang paagi molampos sa pagpakigbisog nianang makadaot nga hulga sa atong espirituwalidad. Ang manalagnang si Habacuc miingon bahin kang Jehova: “Putli kaayo ang imong mga mata aron motan-aw sa daotan; ug ikaw dili makahimo sa pagtan-aw sa kasamok.” (Habacuc 1:13) Angay natong ‘kasilagan ang daotan.’ (Roma 12:9) Gitambagan ang mga ginikanan nga kontrolahon ang paggamit sa ilang mga anak sa Internet ug ang ilang pagtan-aw sa telebisyon. Ang mamumulong nag-ingon nga kadtong kinsa nadani sa pornograpiya angayng mangayog tabang gikan sa usa ka higala nga hamtong sa espirituwal. Makatabang usab ang pagpamalandong ug pagmemorya sa mga kasulatan sama sa Salmo 97:10; Mateo 5:28; 1 Corinto 9:27; Efeso 5:3, 12; Colosas 3:5; ug 1 Tesalonica 4:4, 5.

Ang sunod nga pakigpulong, “Hinaot ang Kalinaw sa Diyos Magabantay Kanimo,” naghupay kanato uban ang pasalig nga kon nabug-atan kita sa kabalaka, atong ikatugyan ang atong palas-anon kang Jehova. (Salmo 55:22) Kon kita mag-ampo nga kinasingkasing, si Jehova mohatag kanato sa “kalinaw sa Diyos,” ang kakalma ug kalinaw sa galamhan nga moresulta gumikan sa atong bililhong relasyon uban kaniya.—Filipos 4:6, 7.

Ang unang adlaw malipayon kaayong natapos pinaagi sa pakigpulong nga “Si Jehova Nagpatahom sa Iyang Katawhan Pinaagi sa Kahayag,” nga nagpatin-aw sa katumanan sa Isaias kapitulo 60. Taliwala sa kangitngit karon sa kalibotan, ang “mga langyaw”—ang nagpadayag nga dakong panon sa mga karnerohon—nagtagamtam sa kahayag ni Jehova duyog sa dinihogang mga Kristohanon. Naghisgot sa mga bersikulo 19 ug 20, ang mamumulong mipatin-aw: “Si Jehova dili ‘mosalop’ sama sa adlaw o ‘moawop’ sama sa bulan. Siya magpadayon sa pagpatahom sa iyang katawhan pinaagi sa pagpasidlak sa kahayag diha kanila. Pagkatahom nga pasalig kana alang kanato samtang nagkinabuhi kita sa kataposang mga adlaw niining nangitngitan nga kalibotan!” Sa kataposan sa pakigpulong, ang mamumulong nagpahibalo sa pagluwat sa libro nga Tagna ni Isaias—Kahayag Alang sa Tibuok Katawhan, Tomo Dos. Nahuman na ba nimog basa kining bag-ong publikasyon?

Ikaduhang Adlaw—May Igong Katakos sa Pagtudlo sa Uban

Human mahisgoti ang inadlawng teksto sa ikaduhang adlaw, namati kitang maikagon kaayo sa ikaduhang simposyum sa kombensiyon, “Mga Ministro nga Pinaagi Kanila Nahimong mga Magtutuo ang Uban.” Ang mga mamumulong niining tulo-ka-bahin nga simposyum nagpasiugda sa matag usa sa tulo ka hugna nga nalangkit sa pagtabang sa mga tawo aron mahimong mga magtutuo—pagpakaylap sa mensahe sa Gingharian, pag-ugmad sa nakaplagang interes, ug pagtudlo sa mga interesado sa pagtuman sa gisugo ni Kristo. Sa tabang sa mga interbiyo ug mga pasundayag nga nagsubli sa mga eksperyensiya, espesipiko natong nasabtan kon sa unsang paagi atong matudloan ang uban nga mahimong mga tinun-an.

Ang sunod nga bahin mao ang tema nga “Idugang sa Inyong Pagkamainantoson ang Diyosnong Pagkamahinalaron.” Gipakita sa mamumulong nga ang labing hinungdanon mao ang atong ‘paglahutay hangtod sa kataposan.’ (Mateo 24:13) Kinahanglan natong gamiton ang tanang tagana sa Diyos—pag-ampo, personal nga pagtuon, mga tigom, ug ang ministeryo—aron maugmad ang diyosnong pagkamahinalaron. Kinahanglan natong masanta ang kalibotanong mga tinguha ug mga kalihokan nga makabalda o makadaot sa atong diyosnong pagkamahinalaron.

Sa unsang paagi makakaplag ug kahayahay ang mga tawo nga nagabudlay ug nabug-atan karon? Ang pakigpulong nga “Pagkakaplag ug Kahayahay Ilalom sa Yugo ni Kristo” nagtubag nianang pangutanaha. Si Jesus malulotong nagdapit sa iyang mga sumusunod sa pagsangon sa iyang yugo ug sa pagkat-on gikan kaniya. (Mateo 11:28-30) Mahimo natong isangon ang yugo ni Jesus pinaagi sa pagsunod pag-ayo sa iyang panig-ingnan sa pagkinabuhi ug usa ka yano, balanse nga kinabuhi. Ang pangunang mga punto niini nga presentasyon gipalig-on pinaagig mga interbiyo niadtong kinsa nakapayano na sa ilang mga kinabuhi.

Usa sa mga haylayt sa dagkong mga panagkatigom sa mga Saksi ni Jehova mao ang pagbawtismo sa bag-ong dedikadong mga alagad sa Diyos. Ang igsoon nga mihatag sa pakigpulong nga “Ang Bawtismo Motultol Ngadto sa Mas Dagkong mga Pribilehiyo sa Pagpanudlo” mainitong nag-abiabi sa mga kandidato sa bawtismo ug nagdapit kanila sa pagpakigbahin sa mas dagkong mga kahigayonan sa pag-alagad. Ang bag-ong nabawtismohan nga mga magtutudlo sa Pulong sa Diyos nga nakakab-ot sa Kasulatanhong mga kuwalipikasyon makapangab-ot sa nagkalainlaing mga kaakohan diha sa kongregasyon.

Ang unang pakigpulong nianang hapona nag-ulohang “Sundoga ang Dakong Magtutudlo.” Sa dili-maihap nga katuigan didto sa langit, si Jesus naniid ug nagsundog gayod sa iyang Amahan, sa ingon nahimong Dakong Magtutudlo. Sa dinhi pa sa yuta, gigamit niya ang epektibong mga teknik sa pagpanudlo, sama sa matugkarong mga pangutana ug yano apan tin-aw nga mga ilustrasyon. Gibase ni Jesus ang iyang pagpanudlo sa Pulong sa Diyos ug misulti nga may kadasig, kainit, ug awtoridad. Dili ba kita matukmod sa pagsundog sa Dakong Magtutudlo?

Ang lain pang makapalihok nga pakigpulong, “Andam Ka ba sa Pag-alagad sa Uban?,” nagdasig kanato sa pagsundog sa panig-ingnan ni Jesus sa pag-alagad sa ubang mga tawo. (Juan 13:12-15) Ang mamumulong direktang nag-agda sa kuwalipikadong mga lalaki nga mahimong sama kang Timoteo sa pagpahimulos sa mga kahigayonan sa pagtabang sa uban. (Filipos 2:20, 21) Ang mga ginikanan gidasig sa pagsundog kang Elkana ug Ana sa pagtabang sa ilang mga anak sa pagtinguha sa bug-os-panahong ministeryo. Ug ang mga batan-on gitambagan nga sundogon ang mga panig-ingnan ni Jesu-Kristo ug sa batan-ong si Timoteo pinaagi sa kinabubut-on nga pagtanyag sa ilang mga serbisyo. (1 Pedro 2:21) Napalihok usab kita pinaagi sa mga pulong niadtong kinsa nagpahimulos sa mga kahigayonan sa pag-alagad sa uban.

Ang tema sa ikatulong simposyum maoy “Pagkuhag Mas Bug-os nga Kaayohan Gikan sa Teokratikanhong Edukasyon.” Ang unang mamumulong nagpasiugda sa kahinungdanon sa pagpauswag sa atong konsentrasyon. Aron mapalampos ang maong tumong, kita makasugod pinaagig mugbong mga sesyon sa personal nga pagtuon ug dayon sulayan nga patas-an kana. Gidasig usab niya ang mamiminaw sa pagtan-aw sa mga kasulatan ug sa pagkuhag mga nota panahon sa mga tigom. Ang ikaduhang mamumulong nagpabantay kanato sa panginahanglan sa pagpabilin diha sa “sumbanan sa makapahimsog nga mga pulong.” (2 Timoteo 1:13, 14) Aron mapanalipdan ang atong kaugalingon batok sa imoral nga mga pasundayag sa palaumagian sa balita, tawhanong mga pilosopiya, matukiong mga pagpanaway, ug sa apostatang mga pagtulon-an, kinahanglan natong paliton ang panahon alang sa personal nga pagtuon ug pagtambong sa tigom. (Efeso 5:15, 16) Ang kataposang mamumulong sa simposyum nagpasiugda sa panginahanglan sa pagpadapat sa mga butang nga nakat-onan aron kita makakuhag bug-os nga kaayohan gikan sa teokratikanhong edukasyon.—Filipos 4:9.

Nahinam kita sa pagkadungog sa pakigpulong nga “Bag-ong mga Tagana Alang sa Atong Espirituwal nga Pag-uswag”! Nalipay kita sa pagkasayod nga usa ka bag-ong libro nga nag-ulohang Pahimusli ang Edukasyon sa Teokratikanhong Tunghaan sa Ministeryo ang patikon sa dili madugay. Naghinamhinam kita nga makabaton sa libro samtang gisumaryo sa mamumulong ang kaundan niini. Mahitungod sa seksiyon sa libro nga dunay daghang punto sa porma sa talambagan, siya miingon: “Ang pagpresentar niining bag-ong teksbok sa 53 ka punto alang sa maayong pagbasa, pagpanulti, ug pagpanudlo dili sama sa sekular nga mga basahon. Ang paagi gibase sa Kasulatanhong mga prinsipyo.” Ipakita sa libro kon sa unsang paagi gipasundayag sa mga manalagna, ni Jesus, ug sa iyang mga tinun-an ang maayong mga katakos sa pagpanudlo. Sa pagkatinuod, kini nga teksbok ug ang bag-ong mga bahin sa Teokratikanhong Tunghaan sa Ministeryo motabang gayod kanato nga mahimong mas maayong mga magtutudlo sa Pulong sa Diyos.

Ikatulong Adlaw—Mahimong mga Magtutudlo Tungod sa Panahon

Human sa paghisgot sa inadlawng teksto sa kataposang adlaw, ang tanan naminaw pag-ayo sa kataposang simposyum sa kombensiyon, “Ang Tagna ni Malaquias Nag-andam Kanato Alang sa Adlaw ni Jehova.” Si Malaquias nanagna duolag usa ka gatos ka tuig human mamauli ang mga Hudiyo gikan sa Babilonya. Sila naanod na usab ngadto sa apostasya ug pagkadaotan, nga nagpasipala sa ngalan ni Jehova pinaagi sa pagsalikway sa iyang matarong nga mga balaod ug pinaagi sa pagdalag buta, piang, ug masakiton nga mga hayop aron ihalad. Dugang pa, ilang gidiborsiyohan ang mga asawa sa ilang pagkabatan-on, tingali aron makapangasawa ug paganong mga babaye.

Ang unang kapitulo sa tagna ni Malaquias nagpasalig kanato sa gugma ni Jehova alang sa iyang katawhan. Gipasiugda niini ang panginahanglan sa pagbaton ug masimbahong kahadlok sa Diyos maingon man sa pagpasalamat ug pagtahod sa balaang mga butang. Gidahom ni Jehova nga ihatag nato kaniya ang atong kinamaayohan, nga magsimba kaniya tungod sa dili-mahakogong gugma. Ang atong balaang pag-alagad dili angayng pormalidad lamang, ug kita kinahanglang manubag sa Diyos.

Nagpadapat sa ikaduhang kapitulo sa Malaquias sa atong adlaw, ang ikaduhang mamumulong sa simposyum nangutana: “Kita ba nagbantay nga ‘walay pagkadili-matarong nga makaplagan diha sa atong mga ngabil’?” (Malaquias 2:6) Angayng paneguroon niadtong nagapanguna sa pagpanudlo nga kon unsay ilang ginasulti lig-ong gipasukad sa Pulong sa Diyos. Angay natong dumtan ang pagkamaluibon sama nianang pagkuhag dili-makataronganong mga diborsiyo.—Malaquias 2:14-16.

Namulong bahin sa tema nga “Kinsay Makalabang-Buhi sa Adlaw ni Jehova?” ang kataposang mamumulong sa simposyum mitabang sa pag-andam kanato alang sa adlaw ni Jehova. “Pagkamakapalipay alang sa mga alagad ni Jehova ang pagkasayod nga diha kanila natuman ang dakong katumanan sa Malaquias kapitulo 3, bersikulo 17!” mipatugbaw ang mamumulong. “Kini nag-ingon: ‘“Sila mahimong akoa gayod,” miingon si Jehova sa mga panon, “sa adlaw nga ako magpatunghag usa ka linaing katigayonan. Ug ako maluoy kanila, ingon sa usa ka tawo nga naluoy sa iyang anak nga nagaalagad kaniya.”’”

Ang usa pa ka haylayt sa kombensiyon mao ang full-costume nga dramang “Tahora ang Awtoridad ni Jehova,” nga naghulagway sa mga anak ni Kore. Bisan pa sa rebelyosong tinamdan sa ilang amahan ngadto kang Moises ug Aaron, sila nagpabiling maunongon kang Jehova ug sa iyang mga hawas. Samtang nangamatay si Kore ug ang iyang mga sumusunod, nakalabang-buhi ang mga anak ni Kore. Ang sunod nga pakigpulong, “Maunongong Magpasakop sa Awtoridad ni Jehova,” nagpadapat sa kahulogan sa drama sa matag usa kanato. Ang mamumulong nagpasidaan labot sa unom ka bahin diin si Kore ug ang iyang mga sumusunod napakyas: wala magmaunongon sa pagpaluyo sa awtoridad ni Jehova; nagtugot nga dag-on sila sa garbo, ambisyon, ug kasina; nagtan-aw sa pagkadili-hingpit sa mga gitudlo ni Jehova; nag-ugmad ug reklamador nga tinamdan; nahimong dili kontento sa ilang mga pribilehiyo sa pag-alagad; ug nagtugot sa panaghigala o suod nga relasyon sa pamilya nga mopatigbabaw kay sa pagkamaunongon kang Jehova.

Ang pakigpulong publiko nag-ulohan ug “Kinsa ang Nagatudlo sa Kamatuoran sa Tanang Kanasoran?” Ang kamatuoran nga gihisgotan mao, dili ang kamatuoran sa kinatibuk-an, kondili ang kamatuoran bahin sa katuyoan ni Jehova nga gipanghimatud-an ni Jesu-Kristo. Gihisgotan sa mamumulong ang kamatuoran nga nalangkit sa mga pagtulon-an, ang kamatuoran maylabot sa paagi sa pagsimba, ug ang kamatuoran mahitungod sa personal nga panggawi. Pinaagi sa pagtandi sa unang-siglong mga Kristohanon uban sa mga Saksi ni Jehova karon, ang atong pagtuo nga ‘ang Diyos anaa gayod sa atong taliwala’ napalig-on gayod.—1 Corinto 14:25.

Human sa sumaryo sa tun-anang artikulo sa Bantayanang Torre alang nianang semanaha, ang tanang magtutudlo sa pulong sa Diyos nga mitambong napalihok pinaagi sa paniklop nga pakigpulong, “Dinaliang Pagtuman sa Atong Buluhatong Pagpanudlo.” Ang mubo nga pagsubli sa programa nagpasiugda sa kahinungdanon sa paggamit sa Kasulatan diha sa pagpanudlo, sa mga paagi aron kita mahimong kuwalipikadong mga magtutudlo, ug sa panginahanglan nga makabaton ug pagsalig sa kamatuoran nga atong ginatudlo sa uban. Ang mamumulong nag-awhag kanato sa ‘pagpadayag sa atong pag-uswag’ ug sa ‘pagtagad kanunay sa atong kaugalingon ug sa atong pagpanudlo.’—1 Timoteo 4:15, 16.

Pagkadakong espirituwal nga kombira ang atong natagamtam didto sa “Mga Magtutudlo sa Pulong sa Diyos” nga Distritong Kombensiyon! Hinaot atong sundogon ang atong Dakong Instruktor, si Jehova, ug ang atong Dakong Magtutudlo, si Jesu-Kristo, sa pagtudlo sa uban sa pulong sa Diyos.

[Kahon/Mga hulagway sa panid 28]

Bag-ong Mga Publikasyon Nga Nagatagbaw Sa Linaing Mga Panginahanglan

Ang mga delegado sa “Mga Magtutudlo sa Pulong sa Diyos” nga Distritong Kombensiyon madasigong midawat sa duha ka publikasyon nga angayng makatabang pag-ayo sa pagtudlo sa Kasulatanhong kamatuoran sa mga tawo sa pipila ka dapit sa kalibotan. Ang tract nga nag-ulohang Ikaw ba Adunay Espiritu nga Dili-Mamatay? mahimong usa ka mapuslanong himan sa pagsugod ug mga panaghisgot uban niadtong nanagpuyo sa mga nasod diin ang lokal nga mga pinulongan walay gipakitang kalainan tali sa “kalag” ug “espiritu.” Ang bag-ong tract tin-awng nagpakita nga ang espiritung puwersa lahi sa espirituhanong linalang ug nga ang mga tawo dili mahimong espirituhanong mga linalang inigkamatay nila.

Ang brosyur nga Makapatagbaw nga Kinabuhi—Kon Unsaon Pag-angkon Niini giluwatan sa kataposan sa ikaduhang adlaw sa kombensiyon. Kining brosyura giandam sa tuyo nga makasugod ug mga pagtuon sa Bibliya uban niadtong kinsa walay ideya bahin sa usa ka Maglalalang nga may personalidad ug walay ideya bahin sa usa ka basahon nga inspirado sa Diyos. Gigamit na ba nimo kining bag-ong mga publikasyon diha sa imong ministeryo?

[Mga hulagway sa panid 26]

Sa Milan, Italya, ug sa ubang mga kombensiyon sa tibuok kalibotan, gatosan ang nabawtismohan

[Hulagway sa panid 29]

Ang mga mamiminaw nadasig sa drama nga “Tahora ang Awtoridad ni Jehova”