Ginapadapat Mo ba ang Imong Nakat-onan sa “Mga Magtutudlo sa Pulong sa Diyos” Distritong Kombensiyon?
1 Nasabtan sa tanang mitambong sa miagi nga distritong kombensiyon nga ang katawhan ni Jehova maikagon sa pagtuman sa ilang buluhaton sa pagkahimong mga magtutudlo sa Pulong sa Diyos. (Mat. 28:19, 20) Sa imong pagpauli, unsang espesipikong mga punto sa pagtudlo ang imo gayong ipadapat sa imong kaugalingong kinabuhi ug diha sa ministeryo sa kanataran?
2 Ang Inspiradong Kasulatan Mapuslanon sa Pagpanudlo: Ang tema sa unang adlaw nagpasiugda sa 2 Timoteo 3:16. Ang sukaranang pakigpulong nagbutyag nga aron “Bug-os nga Nasangkapan Ingong mga Magtutudlo sa Pulong sa Diyos,” kinahanglang pabilhan gayod nato ang Pulong sa Diyos, tahoron kana labaw kay sa bisan unsang tawhanong opinyon o tradisyon, ug kanunay kanang gamiton. Kita usab kinahanglang mag-ampo sa matag adlaw nga tabangan kita sa balaang espiritu diha sa atong ministeryo ug manlimbasog nga maugmad ang pangunang bunga niana—ang gugma. Ug kinahanglan natong tugotan ang yutan-ong organisasyon ni Jehova sa pagbansay kanato ingong mga ministro pinaagi sa tanang tigom sa kongregasyon.
3 Ang simposyum sa Biyernes, “Pagtudlo sa Atong Kaugalingon Samtang Nagtudlo sa Uban,” nagpatin-aw nga kita kinahanglang mahimong panig-ingnan pinaagi sa (1) pagsunod sa mga balaod sa Diyos sa tanang bahin sa Kristohanong moralidad, (2) pagmentinar sa makugihong mga batasan sa pagtuon, ug (3) pagwagtang sa mga tinamdan ug mga tinguha sa kasingkasing ug hunahuna nga mahimong gamiton sa Yawa. Sunod, atong nakat-onan ang praktikal nga mga paagi sa pagpanalipod sa atong mga pamilya batok sa kalibotanong hampak sa pornograpiya. Giawhag ang mga ginikanan sa paghatag ug panig-ingnan sa paglikay bisan sa pagpasiplat sa usa ka seksuwal nga esena ug panid-an ang ilang mga anak bahin sa paggamit sa Internet ug sa pagtan-aw ug telebisyon. Unsang mga punto gikan sa programa sa Biyernes ang gisugdan na nimo sa pagpadapat?
4 Ang kataposang pakigpulong sa maong adlaw nagpalig-on sa atong gimbut-an nga ampingan ang kahayag ni Jehova, magpabiling suod sa iya sa Diyos nga matinumanong dinihogang matang, ug motabang sa pagpalambo sa kalinaw sa katawhan ni Jehova. Nabasa mo na ba ang bag-ong giluwatan nga Tagna ni Isaias—Kahayag Alang sa Tibuok Katawhan II?
5 May Igong Katakos sa Pagpanudlo sa Uban: Ang temang teksto alang sa ikaduhang adlaw maoy 2 Timoteo 2:2. Samtang nagpatalinghog ka sa simposyum sa Sabado sa buntag, gisulat mo ba ang mga sugyot kon unsaon sa (1) pagpangita sa mga takos, (2) pag-ugmad sa ilang interes, ug (3) pagtudlo kanila sa pagtuman sa tanang gisugo ni Kristo? Ginapadapat mo ba ang imong nakat-onan—sa pagpakita sa mga tagbalay labing menos usa ka punto gikan sa Kasulatan ug sa pagpahilunag pundasyon alang sa umaabot nga pagduaw?
6 Ang programa sa hapon nagpasiugda sa kahinungdanon sa pagsundog sa Dakong Magtutudlo, si Jesus. Sa unsang mga paagi nga naningkamot ka nga mahimong sama gayod kaniya? Gikan sa imong nakat-onan sa ikaduhang simposyum sa maong adlaw, sa imong hunahuna sa unsang paagi makahimo ka sa “Pagkuhag Mas Bug-os nga Kaayohan Gikan sa Teokratikanhong Edukasyon”? Unsang mga sugyot ang imo nang napadapat aron mapauswag ang imong lugway sa pagtagad panahon sa personal nga pagtuon ug mga tigom sa kongregasyon?
7 Walay duhaduha, ang umaabot nga tagana nga Pahimusli ang Edukasyon sa Teokratikanhong Tunghaan sa Ministeryo motabang kanato sa pagpauswag sa atong mga katakos ingong mga mamumulong ug ingong mga magtutudlo sa Pulong sa Diyos. Hatagan ug mas dakong pagtagad ang mga kalidad sa pagpanulti nga nagpaila sa matinumanong mga alagad sa Diyos sa kapanahonan sa Bibliya. Ang matag leksiyon diha sa bag-ong teksbok dunay mga kahon nga sa mubo nagpakita kon unsay angay natong himoon, kon nganong hinungdanon, ug kon unsaon paghimo niana. Gilakip ang praktikal nga mga pagbansaybansay. Ang mga sister adunay 29 ka tagboanan nga kapilian sa dihang mohatag sa ilang mga asaynment. Sa ngadtongadto, ipahibalo ang mga kausaban nga pagahimoon bahin sa pamaagi sa eskuylahan. Aduna ka bay maayong rutina sa pagtuon ug pagpangandam aron makakuhag bug-os nga kaayohan gikan sa Teokratikanhong Tunghaan sa Ministeryo matag semana?
8 Mahimong mga Magtutudlo Tungod sa Panahon: Ang Hebreohanon 5:12 nag-andam sa hunahuna sa mamiminaw para sa Dominggo. Ang simposyum sa buntag, “Ang Tagna ni Malaquias Nag-andam Kanato Alang sa Adlaw ni Jehova,” nag-awhag kanato sa paghatag sa atong kinamaayohan gayod ngadto sa Diyos ug sa pagdumot sa tanang matang sa panglimbong aron kita makalabang-buhi sa dako ug makalilisang nga adlaw ni Jehova. Ang drama, “Tahora ang Awtoridad ni Jehova,” kusganong nagpasundayag kon sa unsang paagi ang garbo, ambisyon, kasina, ug sayop nga pagkamaunongon ni Kore kanhi ug sa iyang mga kauban mitultol ngadto sa mga buhat sa laktod nga pag-alsa batok kang Jehova mismo. Ang sunod nga pakigpulong nagsentro sa pagtagad sa modernong-adlaw nga panginahanglan nga magpasakop sa diyosnong awtoridad sulod sa pamilya ug sa kongregasyon. Ang pakigpulong publiko, “Kinsa ang Nagatudlo sa Kamatuoran sa Tanang Kanasoran?,” naghatag pamatuod nga ang mga Saksi ni Jehova nagabuhat niana, kasukwahi sa Kakristiyanohan, nga nag-angkon lamang nga nagtudlo sa kamatuoran sa Bibliya.
9 Tin-aw, si Jehova nagbansay kanato aron mahimong mas maayong mga magtutudlo sa iyang Pulong. Ipadapat nato ang atong nakat-onan, nga ‘nagtagad kanunay sa atong kaugalingon ug sa atong pagpanudlo, aron maluwas nato ang atong kaugalingon ug kadtong mamati kanato.’—1 Tim. 4:16.