Gidapit Kamo Ngadto sa “Mga Magtutudlo sa Pulong sa Diyos” Distritong Kombensiyon!
MILYONMILYON ANG MOTAMBONG sa gatosan ka dapit sa tibuok kalibotan. Dinhi lang sa Pilipinas, 60 ka kombensiyon ang gieskedyul. Ang una pagahimoon sa Nobyembre 23-25, 2001, ug ang kataposan pagahimoon sa Enero 11-13, 2002. Lagmit, usa niining tulo-ka-adlaw nga mga panagkatigom—Biyernes hangtod sa Dominggo—pagahimoon diha sa siyudad nga duol sa imong gipuy-an.
Matag adlaw ang programa pagasugdan sa musika sa alas 8:30 s.b. Ang pangbukas nga pakigpulong sa Biyernes pagasundan sa mga pakigpulong bahin sa mga tema sa Bibliya nga “Pagpanudlo Bahin sa Gingharian Magpatunghag Maayong Bunga,” “Napukaw Tungod sa ‘Halangdong mga Butang sa Diyos,’” ug “Pagkakaplag ug Kahimuot sa Pagkamatarong ni Jehova.” Ang sesyon sa buntag taposon pinaagi sa keynote address nga “Bug-os nga Nasangkapan Ingong mga Magtutudlo sa Pulong sa Diyos.”
Ang unang pakigpulong sa hapon, “Nahinloan Ingong Katawhan Alang sa Maayong mga Buhat,” pagasundan sa tulo-ka-bahin nga simposyum nga “Pagtudlo sa Atong Kaugalingon Samtang Nagtudlo sa Uban.” Kini magpasiugda sa kahinungdanon sa pagbuhat kon unsay ginawali sa usa maylabot sa moralidad, personal nga pagtuon sa Bibliya, ug sa panginahanglan nga suklan ang mga paningkamot sa Yawa sa pagpahisalaag kanato. Mosunod ang pakigpulong nga “Kasilagi ang Kalibotanong Hampak sa Pornograpiya.” Dayon ang programa nianang adlawa taposon pinaagi sa paghisgot sa kapitulo 60 sa Isaias, nga nag-ulohang “Si Jehova Nagpatahom sa Iyang Katawhan Pinaagi sa Kahayag.”
Ang mga pakigpulong sa Sabado nga “Pagkakaplag ug Kahayahay Ilalom sa Yugo ni Kristo,” “Sundoga ang Dakong Magtutudlo,” ug “Andam Ka ba sa Pag-alagad sa Uban?” magsentro sa panginahanglan nga sundon ang panig-ingnan ni Kristo. Ang duha ka simposyum nga tagsa-ka-oras ang gidugayon nga nag-ulohang “Mga Ministro nga Pinaagi Kanila Nahimong mga Magtutuo ang Uban” ug “Pagkuhag Mas Bug-os nga Kaayohan Gikan sa Teokratikanhong Edukasyon” pagahisgotan usab sa Sabado. Ang simposyum sa buntag maghatag ug mga sugyot bahin sa paghimog mga tinun-an, ug ang simposyum sa hapon magpasiugda sa mga paagi nga kita makakuhag mas bug-os nga kaayohan gikan sa pagtuon sa Bibliya ug pagtambong sa Kristohanong mga tigom. Ang programa sa buntag taposon pinaagi sa paghisgot bahin sa bawtismo, nga human niana adunay kahigayonan alang sa kuwalipikadong mga indibiduwal nga mabawtismohan. Daghan ang maghinamhinam sa pagpatalinghog sa kataposang pakigpulong sa Sabado sa hapon, “Bag-ong mga Tagana Alang sa Atong Espirituwal nga Pag-uswag.”
Ang programa sa Dominggo sa buntag maglakip sa tulo-ka-bahin mga simposyum nga maghisgot sa basahon ni Malaquias ug magtaganag maayong kapadapatan sa mga kahimtang sa atong adlaw. Kini pagasundan sa usa ka full-costume nga drama mahitungod sa pag-alsa ni Kore, Datan, ug Abiram batok sa hinatag-sa-Diyos nga awtoridad ni Moises. Human niana, usa ka pakigpulong ang magpasiugda sa mensahe nga gipahayag diha sa drama. Ang programa sa hapon magpasiugda sa pakigpulong publiko nga nag-ulohang “Kinsa ang Nagatudlo sa Kamatuoran sa Tanang Kanasoran?”
Segurado nga ikaw matugob sa espirituwal pinaagi sa pagtambong sa tibuok tulo ka adlaw. Alang sa dapit nga kinadul-an sa imong gipuy-an, kontaka ang lokal nga Kingdom Hall sa mga Saksi ni Jehova o pagsulat sa mga magpapatik niining magasina.