Tambong sa “Pagtuo sa Pulong sa Diyos” Distritong Kombensiyon!
MILYONMILYON ang motambong sa gatosan ka dapit sa tibuok kalibotan. Sa Pilipinas lamang, 49 ka kombensiyon ang gieskedyul. Ang una maoy Disyembre 19-21 ug ang kataposan, Enero 2-4, 1998. Lagmit usa niining tulo-ka-adlaw nga panagkatigom—Biyernes hangtod sa Dominggo—himoon sa siyudad nga dili halayo sa imong pinuy-anan.
Makabenepisyo ka gikan sa dagayang praktikal nga instruksiyon sa Bibliya. Sa kadaghanang dapit ang programa magsugod kada buntag pinaagig musika sa 8:30. Ang Biyernes sa buntag adunay 25 minutos nga interbiyo uban sa mga tawo kansang mga kinabuhi dulot nga naapektahan sa ilang pagtuo sa Pulong sa Diyos. Kanang unang sesyon matapos pinaagig keynote address, “Paglakaw Pinaagi sa Pagtuo, Dili Pinaagi sa Makita.”
Ang unang pakigpulong sa Biyernes sa hapon magkonsiderar sa hinungdanong bahin sa mga batan-on diha sa Kristohanong kongregasyon. Ang mosunod nga tulo-ka-bahin nga simposyum maghisgot sa kalabotan sa mga sukdanan sa Bibliya sa Kristohanong panggawi diha sa sinultihan, pamatasan, ug personal nga panagway. Sunod ang mga pakigpulong nga “Pagbantay sa Kakulang ug Pagtuo” ug “Ang Pulong sa Diyos Buhi” magsentro sa pagtagad diha sa maayong tambag sa Hebreohanon mga kapitulo 3 ug 4. Ang programa sa Biyernes matapos pinaagig diskurso nga “Usa ka Basahon Alang sa Tanang Tawo.
Ang unang pakigpulong sa Sabado sa buntag mao ang “Pagtuo nga Walay mga Buhat Patay.” Ang laing hinungdanong diskurso nianang buntaga, “Himoang Mogamot ug Molig-on sa Kamatuoran,” nagbatbat kon sa unsang paagi ang espirituwal nga pag-uswag makab-ot. Ang sesyon matapos pinaagig naandang bahin sa kombensiyon, “Pagtuo sa Pulong sa Diyos Motultol sa Bawtismo,” nga human niana adunay kahikayan nga mabawtismohan ang bag-ong mga tinun-an.
Ang pangbukas nga pakigpulong sa hapon sa Sabado, “Pakigbisog Alang sa Pagtuo,” maghisgot sa tambag sa basahon sa Bibliya nga Judas. Ang usa ka oras nga simposyum nga nag-ulohang “Sa Balay ni Jehova Kita Mangadto” magkonsiderar sa mga kaayohan sa Kristohanong mga tigom. Ang programa sa maong adlaw matapos pinaagig diskurso nga “Ang Kalidad sa Imong Pagtuo—Gisulayan Karon.”
Ang programa sa Dominggo sa buntag adunay tulo-ka-bahin nga simposyum nga maghisgot sa basahon sa Bibliya nga Joel, lakip ang kapadapatan niana sa atong adlaw. Unya mosunod ang drama sa Bibliya nga nag-ulohang “Hupting Yano ang Imong Mata.” Ang haylayt sa kombensiyon mao ang pakigpulong publiko sa hapon, “Ang Pagtuo ug ang Imong Kaugmaon.”
Tinong matugob ka sa espirituwal pinaagi sa pagtambong. Kinasingkasing kang abiabihon sa matag sesyon. Paghimog mga plano karon nga motambong. Alang sa dapit nga kinadul-an sa imong pinuy-anan, kontaka ang lokal nga Kingdom Hall sa mga Saksi ni Jehova o pagsulat sa mga magpapatik niining magasina. Makaplagan usab nimo ang mga adres sa mga dapit sa kombensiyon sa Disyembre 8 nga isyu sa Pagmata!