Gidapit Kamo Ngadto sa “Lakaw Uban sa Diyos” nga Distritong Kombensiyon
◼ Milyonmilyon ang motambong diha sa ginatos ka dapit sa tibuok kalibotan. Ang una sa 67 ka tulo-ka-adlaw nga mga kombensiyon sa Pilipinas magsugod sa Nobyembre 19-21, ug ang kataposan, sa Enero 7-9, 2005. Lagmit nga usa niining tulo-ka-adlaw nga mga panagkatigom—nga kasagarang sugdan sa Biyernes hangtod sa Dominggo—anha himoon sa siyudad duol sa imong gipuy-an.
Sa kadaghanang lugar ang programa magsugod sa alas 8:30 s.b. kada adlaw pinaagig musika. Ang tema sa Biyernes maoy “Mao Kini ang Dalan. Lakaw Kamo Niini.” Ang nagaabiabi nga pakigpulong nga, “Nagkatigom Aron Tudloan Kita ni Jehova sa Iyang mga Dalan,” sundan sa usa ka bahin nga mag-interbiyo sa mga tawo nga maunongong nagalakaw uban sa Diyos. Human sa mga pakigpulong nga “Padayong Pamatud-i Kon Unsa Kamo sa Inyong Kaugalingon” ug “Magpagiya sa Pulong sa Diyos Adlaw-Adlaw,” ang sesyon sa buntag taposon pinaagi sa keynote address nga, “Lakaw Uban sa Diyos Niining Malisod nga Panahon.”
Ang sesyon sa Biyernes sa hapon maglakip sa tulo-ka-bahin nga simposyum nga, “Ang Tagna ni Oseas Makatabang Kanato sa Paglakaw Uban sa Diyos.” Human niana mao ang mga pakigpulong nga “Ayaw Bulaga ‘Kon Unsay Gihiusa Pagyugo sa Diyos’” ug “Pagpakitag Pagtahod Alang sa Atong Sagradong mga Panagkatigom.” Ang paniklop nga pakigpulong nianang adlawa nga, “Maayong Balita Alang sa mga Tawo sa Tanang Kanasoran,” makadasig aron maabot ang mga tawo sa tanang pinulongan dala ang maayong balita.
Ang tema sa Sabado maoy ‘Pagbantay Pag-ayo sa Inyong Paglakaw.’ Ang simposyum sa buntag nga, “Paglakaw nga Mauswagon Ingong mga Ministro,” maglakip sa usa ka bahin nga maghatag ug dugang mga sugyot aron maabot kadtong nagasulti ug laing mga pinulongan. Ang programa sa buntag taposon pinaagi sa mahinungdanong pakigpulong nga “Paglakaw Uban Kang Jehova Sumala sa Gikasabotan,” nga human niana may kahigayonan ang kuwalipikadong mga tawo nga mabawtismohan.
Ang pakigpulong sa Sabado sa hapon maglakip sa “Paglikay nga Dili Makahatag ug ‘Bisan Unsang Hinungdan sa Pagkapandol’” ug sa “Maayong mga Kalihokan nga Makapahayahay.” Ang kada usa sa mosunod nga mga presentasyon nga, “Si Jehova Mao ang Atong Magbalantay,” “Palita ang Nahiangay nga Panahon,” ug ang “Paglakaw Diha sa Dalan sa Nagakasanag nga Kahayag,” adunay makapadasig nga mga interbiyo. Ang sesyon matapos uban ang makapahinuklog nga pakigpulong “‘Padayon sa Pagbantay’—Ang Takna sa Paghukom Miabot Na.”
Ang tema sa Dominggo nga, “Padayon sa Paglakaw Diha sa Kamatuoran,” ipasiugda sa pakigpulong nga “Mga Batan-on—Lakaw Diha sa Dalan sa Pagkamatarong.” Ang sunod mao ang drama nga mag-costume ang mga entrante nga magpasundayag sa ministeryo ni apostol Pablo. Human niana mao ang pakigpulong nga magpasiugda sa mga leksiyon gikan sa drama. Ang programa sa hapon maglakip sa pakigpulong publiko nga, “Ang Paglakaw Uban sa Diyos Magdalag mga Panalangin Karon ug sa Walay Kataposan.”
Alang sa dapit sa kombensiyon nga kinadul-an sa imong gipuy-an, mahimo kang mokontak sa Kingdom Hall sa mga Saksi ni Jehova o mosulat sa mga magpapatik niining magasina.