“Masibotong mga Magmamantala sa Gingharian” Malipayong Nagtigom

ANG krisis sa moral, ekonomiya, ug politika nakatugaw sa kalibotan. Apan, bisan pa niining kagubot, ang mga Saksi ni Jehova nagtigom alang sa malinawong tulo-ka-adlaw nga “Masibotong mga Magmamantala sa Gingharian” nga Distritong mga Kombensiyon. Nagsugod niadtong Mayo 2002, kining maong panagtigom gihimo sa tibuok kalibotan.

Ang mga kombensiyon maoy malipayon gayod nga mga okasyon. Atong repasohon makadiyot ang makapalig-on ug pinasukad-sa-Bibliya nga programa.

Gipasiugda sa Unang Adlaw ang Kasibot ni Jesus

Ang tema sa unang adlaw sa kombensiyon maoy “Sundoga ang Kasibot sa Atong Ginoo, si Jesus.” (Juan 2:17) Ang pakigpulong nga “Magmaya sa Pagpakigtigom Ingong mga Magmamantala sa Gingharian” mainitong nagdapit sa nanambong sa pag-ambit sa kalipay nga naandan na diha sa mga kombensiyon sa katawhan sa Diyos. (Deuteronomio 16:15) Kini nga pakigpulong gisundan sa mga interbiyo sa masibotong mga magwawali sa maayong balita.

Ang pakigpulong nga “Pagbaton ug Tumang Kalipay Diha Kang Jehova” naghisgot bahin sa Salmo 37:1-11 bersikulo por bersikulo. Kita giawhag nga dili ‘manginit’ tungod kay morag malamposon ang daotan. Bisan pag butangbutangan kita sa mga daotan, moabot ra ang panahon nga ipadayag ni Jehova kon kinsa gayod ang iyang matinumanong katawhan. Ang pakigpulong nga “Ipakita nga Kamo Mapasalamaton” naghisgot kon sa unsang paagi atong ikapasundayag nga kita mapasalamaton sa Diyos. Ang tanang Kristohanon kinahanglang magtanyag ug “halad sa pagdayeg” kang Jehova. (Hebreohanon 13:15) Siyempre, ang gidaghanon sa panahon nga atong igugol sa pag-alagad kang Jehova nagadepende sa atong apresasyon ug mga kahimtang.

Ang keynote address may ulohang “Ang mga Magmamantala sa Gingharian Napukaw sa Tumang Kasibot.” Kini nagpunting kang Jesu-Kristo ingong atong labing maayong panig-ingnan sa kasibot. Human nga natukod ang langitnong Gingharian sa 1914, ang tinuod nga mga Kristohanon nagkinahanglan ug kasibot sa pagsangyaw sa maayong balita. Ang mamumulong naghisgot bahin sa kombensiyon sa Cedar Point, Ohio, T.B.A., sa 1922 ug nagpahinumdom kanato sa makasaysayanhong awhag: “Imantala ang Hari ug ang iyang Gingharian”! Paglabay sa panahon, ang kasibot sa matinumanong mga alagad sa Diyos nagpalihok kanila sa pagmantala sa katingalahang mga kamatuoran sa Gingharian ngadto sa tanang kanasoran.

Ang pakigpulong nga “Magmaisogon Tungod Kay si Jehova Nagauban Kanato,” nga gipahayag sa hapon sa unang adlaw, nagpakita nga ang katawhan sa Diyos mao ang pangunang target ni Satanas. Apan, bisan pag makasugat kita ug pagsupak, ang atong pagpamalandong sa daghang Biblikanhon ug modernong mga panig-ingnan sa pagtuo makahatag kanato ug kaisog sa pag-atubang sa mga pagsulay ug mga tentasyon.—Isaias 41:10.

Misunod sa programa ang tulo ka bahin nga simposyum sa tema nga “Ang Tagna ni Miqueas Nagpalig-on Kanato sa Paglakaw Diha sa Ngalan ni Jehova.” Gitandi sa unang mamumulong ang pagkadaot sa moral, apostasya sa relihiyon, ug materyalismo sa mga adlaw ni Miqueas uban sa atong adlaw karon. Siya miingon: “Ang atong paglaom sa umaabot segurado kon atong ugmaron ang masinugtanong kasingkasing ug paneguroon nga ang atong paggawi balaan ug ang atong kinabuhi mapuno sa mga buhat sa diyosnong debosyon—ug kon dili gayod kita makalimot nga moabot gayod ang adlaw ni Jehova.”—2 Pedro 3:11, 12.

Ang ikaduhang mamumulong sa simposyum naghisgot bahin sa paghukom ni Miqueas sa mga lider sa Juda. Ilang giabusohan ang mga kabos, ang mga tawong walay ikasarang. Apan si Miqueas nagtagna usab bahin sa kadaogan sa matuod nga pagsimba. (Miqueas 4:1-5) Kay gitugahan sa balaang espiritu ni Jehova, kita determinado sa pagsangyaw niining makapalagsik nga mensahe sa paglaom. Apan komosta kon kita mibati nga nababagan tungod sa mga sakit o mibati nga limitado sa usa ka paagi? Ang ikatulong mamumulong miingon: “Ang gipangayo ni Jehova makataronganon ug makab-ot.” Siya nagpadayon sa paghisgot sa nagkalainlaing bahin sa Miqueas 6:8, diin atong mabasa: “Unsa ba ang gipangayo ni Jehova kanimo kondili ang pagbuhat sa hustisya ug ang paghigugma sa kalulot ug ang paglakaw nga makasaranganon uban sa imong Diyos?”

Kay makaapektar man sa mga Kristohanon ang daotang moral sa kalibotan, kitang tanan nakabenepisyo sa pakigpulong nga nag-ulohang “Ampingi ang Kaputli Pinaagi sa Pag-amping sa Imong Kasingkasing.” Pananglitan, ang pag-amping sa atong kaputli motabang kanato nga makabaton ug usa ka malipayong kaminyoon. Kay mga Kristohanon man, dili gayod nato palandongon bisan ang paghunahuna sa pagpakigsekso sa dili kapikas sa kaminyoon.—1 Corinto 6:18.

Ang pakigpulong “Pagbantay Batok sa Panglimbong” nagpakita nga maalamong lantawon nato ingong hilo ang mga pagtuis sa kamatuoran, nga dili-tinuod, ug bakak nga gipakaylap sa mga apostata. (Colosas 2:8) Maingon man, dili gayod nato limbongan ang atong kaugalingon sa paghunahuna nga kita makapatagbaw sa atong makasasalang mga kailibgon nga walay daotang mga sangpotanan.

“Simbaha ang Bugtong Matuod nga Diyos” mao ang ulohan sa panghinapos nga pakigpulong sa unang adlaw. Samtang ang mga kahimtang sa kalibotan misamot ka lisod, pagkamakapalipay ang pagkasayod nga sa dili madugay ipatungha ni Jehova ang iyang matarong nga bag-ong kalibotan! Kinsay magpuyo diha niini? Kadto lamang nagsimba kang Jehova. Sa pagtabang kanato, sa atong mga anak, ug sa atong mga estudyante sa Bibliya sa pagkab-ot niini nga tumong, giluwatan sa mamumulong ang bag-ong libro sa pagtuon nga Simbaha ang Bugtong Matuod nga Diyos. Pagkamalipayon nato nga nakadawat niini!

Gipasiugda sa Ikaduhang Adlaw ang Pagpakitag Kasibot sa Kon Unsay Maayo

Ang tema sa ikaduhang adlaw sa kombensiyon maoy “Magmasiboton sa Kon Unsay Maayo.” (1 Pedro 3:13) Gihisgotan sa unang mamumulong ang teksto sa Bibliya nianang adlawa. Iyang gipasiugda nga ang regular, mapuslanong paghisgot sa adlaw-adlawng teksto dugang nga makapasibot kanato.

Dayon misunod ang simposyum nga “Mga Magmamantala sa Gingharian nga Naghimaya sa Ilang Ministeryo.” Gipasiugda sa unang bahin nga hinungdanong gamiton ang Pulong sa Diyos sa hustong paagi. (2 Timoteo 2:15) Ang atong epektibong paggamit sa Bibliya naghatag ug dalan aron ang ‘gahom’ niini molihok diha sa kinabuhi sa mga tawo. (Hebreohanon 4:12) Ang Bibliya gayoy atong kutloon ug gamiton ug mangatarongan pinasukad niini nga makapakabig. Ang ikaduhang bahin sa simposyum nag-awhag kanato nga kinahanglan atong balikbalikan pagduaw ang mga tawong interesado. (1 Corinto 3:6) Ang pagpangandam ug ang kaisog gikinahanglan aron makahimo dayon ug mga pagbalik-duaw sa tanang mga interesado. Ang ikatulong bahin nagsugyot sa paglantaw sa matag tawo nga atong mahibalag ingong potensiyal nga tinun-an ug nagpatin-aw nga ang pagtanyag ug pagtuon sa Bibliya sa unang pagduaw moresulta ug kalipay tungod sa pagtabang sa mga tawo nga mahimong mga tinun-an.

“Kon Nganong ‘Mag-ampo nga Walay Hunong’” mao ang tema sa sunod nga pakigpulong. Ang Bibliya nagtambag sa mga Kristohanon sa pagdangop sa Diyos alang sa pagtultol diha sa tanang bahin sa kinabuhi. Kinahanglang mogahin gayod kita ug panahon alang sa pribadong pag-ampo. Dugang pa, kinahanglang magsige gayod kita ug ampo, kay basin gitugotan kita ni Jehova sa pag-ampo ug dugaydugay sa dili pa madayag ang iyang tubag.—Santiago 4:8.

Ang pakigpulong “Espirituwal nga Kabildohay Makapalig-on” nag-awhag kanato sa paggamit sa atong gasa sa pagsulti aron kita ug ang uban makapahimulos. (Filipos 4:8) Ang mga magtiayon ug mga anak angayng magsultihanay adlaw-adlaw bahin sa espirituwal nga mga butang. Aron mahimo kana, ang mga pamilya angayng magdungan pagpangaon labing menos kas-a sa matag adlaw aron magkaestoryahay ug makapalig-ong mga butang.

Ang programa sa buntag gitapos sa makalipayng pakigpulong “Kon sa Unsang Paagi ang Dedikasyon ug Bawtismo Motultol sa Kaluwasan.” Ang mga kandidato sa bawtismo nakabaton ug kahibalo, nagpasundayag ug pagtuo, naghinulsol, nagsalikway sa daotang buhat, ug nagpahinungod sa ilang kaugalingon ngadto sa Diyos. Human mabawtismohan, miingon ang mamumulong, sila kinahanglang magpadayon sa pag-uswag sa espirituwal ug sa paghupot sa ilang kasibot ug maayong pamatasan.—Filipos 2:15, 16.

Nianang hapona, duha ka pangunang mga punto ang gipasiugda sa pakigpulong nga “Magmakasaranganon, ug Hupting Yano ang Imong Mata.” Ang pagkamakasaranganon nagkahulogan ug pagbatog realistikong panghunahuna bahin sa atong mga limitasyon ug sa atong baroganan atubangan sa Diyos. Ang pagkamakasaranganon motabang kanato nga huptang “yano” ang atong mata—napunting sa Gingharian sa Diyos, dili sa materyal nga mga butang. Kon atong himoon kini, kita dili angayng mabalaka, kay si Jehova motagana sa atong mga panginahanglan.—Mateo 6:22-24, 33, 34.

Gipatin-aw sa sunod nga mamumulong kon nganong kita angayng ‘Mosalig Kang Jehova sa Bug-os sa Panahon sa Kasakitan.’ Sa unsang paagi atong masagubang ang mga butang sama sa personal nga mga kahuyangan ug mga problema sa panalapi o panglawas? Kita mangayo kang Jehova ug mapuslanong kaalam ug mangayog tabang sa uban. Imbes matarantar o mawad-ag paglaom, kinahanglang palig-onon nato ang atong pagsalig sa Diyos pinaagi sa pagbasa sa iyang Pulong.—Roma 8:35-39.

Ang kataposang simposyum sa kombensiyon may tema nga “Ang Kalidad sa Atong Pagtuo Ginasulayan Pinaagi sa Nagkalainlaing mga Pagsulay.” Ang unang bahin nagpahinumdom kanato nga ang tanang tinuod nga mga Kristohanon makaatubang ug paglutos. Kini magsilbing usa ka pamatuod, makapalig-on sa atong pagtuo, ug makahatag kanato ug higayon sa pagpasundayag sa atong pagkamaunongon sa Diyos. Bisag dili nato ipameligro ang atong mga kinabuhi sa walay hinungdan, dili gayod nato gamiton ang dili-kasulatanhong mga paagi aron makalikay sa paglutos.—1 Pedro 3:16.

Ang ikaduhang mamumulong niini nga simposyum nagtubag sa mga pangutana bahin sa neyutralidad. Ang unang mga Kristohanon dili mga pasipista, apan sila nahibalo nga ang ilang unang unongan mao ang Diyos. Maingon man usab karon, ang mga Saksi ni Jehova nagtuo gayod niining prinsipyoha: ‘Kamo dili bahin sa kalibotan.’ (Juan 15:19) Sanglit ang mga pagsulay sa atong pagkaneyutral motungha lang ug kalit, ang mga pamilya angayng mag-eskedyul ug panahon sa pagrepaso sa mga giya sa Bibliya bahin niining ulohana. Sama sa gipasiugda sa ikatulong pakigpulong niini nga simposyum, ang tuyo ni Satanas, dili sa pagpatay kanato, kondili sa pag-ipit kanato aron mahimong dili matinumanon. Pinaagi sa matinumanong pag-antos sa pagtamay, imoral nga mga pag-ipit, emosyonal nga kasakit, ug mga balatian, kita makahatag ug pagdayeg kang Jehova.

Ang kinasingkasing nga pagdapit nga “Pakigsuod Kang Jehova” mao ang ulohan sa kataposang pakigpulong nianang adlawa. Ang pagkasabot sa pangunang mga hiyas ni Jehova nakadani kanato ngadto kaniya. Iyang gigamit ang iyang walay-kinutobang gahom sa pagpanalipod sa iyang katawhan, ilabina sa espirituwal nga paagi. Ang iyang hustisya dili mapintas kondili nagpalihok kaniya sa pagtanyag sa kinabuhing walay kataposan ngadto sa tanan nga nagabuhat ug pagkamatarong. Ang kaalam sa Diyos dayag diha sa paagi sa paggamit niya sa mga tawong dili-hingpit sa pagsulat sa Bibliya. Ang labing makapadani mao ang iyang gugma, nga nagpalihok kaniya sa pagtaganag kaluwasan alang sa mga tawo pinaagi kang Jesu-Kristo. (Juan 3:16) Ang mamumulong mihinapos pinaagi sa pagluwat sa makapadasig nga bag-ong libro nga Pakigsuod Kang Jehova.

Gipasiugda sa Ikatulong Adlaw ang Kasibot Alang sa Maayong mga Buhat

Ang tema sa kombensiyon sa ikatulong adlaw maoy “Usa ka Katawhan nga Masiboton sa Maayong mga Buhat.” (Tito 2:14) Ang programa sa buntag gisugdan pinaagi sa panaghisgot sa usa ka pamilya sa teksto nianang adlawa. Gisundan kini sa pakigpulong nga “May Pagsalig Ka ba Kang Jehova?” Ang mga nasod nasayop sa ilang gipakitaan ug pagsalig tungod kay sila nagsalig sa ilang kaugalingong kaalam ug kusog. Apan, kon itandi, ang mga alagad ni Jehova maisogon ug malipayong nagsalig kaniya bisan pa sa mga kalamidad.—Salmo 46:1-3, 7-11.

Ang bahin nga nag-ulohang “Mga Batan-on—Planoha ang Inyong Kaugmaon Uban sa Organisasyon ni Jehova” nagtubag niini nga pangutana: Sa unsang paagi ang batan-on makapahimulos sa labing maayo sa kinabuhi? Dili kini maangkon pinaagi sa pagpangagpas ug salapi, mga kabtangan, ug kadungganan. Ang atong Maglalalang mahigugmaong nag-awhag sa mga batan-on sa paghinumdom kaniya samtang sila batan-on pa. Giinterbiyo sa mamumulong ang pipila nga nagkugi pag-ayo sa Kristohanong pag-alagad sa dihang batan-on pa, ug atong namatikdan ang ilang kalipay. Ug pagkamapuslanon ang pagkadawat sa bag-ong tract, Mga Batan-on—Sa Unsang Paagi Gamiton Ninyo ang Inyong Kinabuhi?, nga gidisenyo sa pagtabang sa batan-ong mga Saksi sa pagtukod ug pundasyon alang sa walay-kataposang umaabot diha sa organisasyon ni Jehova!

Misunod niini ang makaikag kaayong drama sa Bibliya nga “Barog nga Malig-on sa Magubot nga Panahon.” Gilakbitan niini pagsaysay ang karera nga dugaydugay nang gihuptan ni Jeremias sukad pa sa iyang pagkabatan-on hangtod sa pagkalaglag sa Jerusalem, nga masiboton niyang gitagna. Si Jeremias mibati nga dili-takos alang sa iyang asaynment, apan iyang gituman kini bisan pa sa pagsupak, ug giluwas siya ni Jehova.—Jeremias 1:8, 18, 19.

Ang drama gisundan sa pakigpulong nga “Sundoga si Jeremias—Maisogong Imantala ang Pulong sa Diyos.” Ang presenteng-adlawng mga magmamantala sa Gingharian kasagaran nga nahimong puntirya sa kabakakan ug propaganda nga ang katuyoan mao ang pagdaot. (Salmo 109:1-3) Apan, sama kang Jeremias, atong masagubang ang pagkaluya sa buot pinaagi sa pagkalipay diha sa Pulong ni Jehova. Ug kita masaligon nga kadtong makig-away batok kanato dili makadaog.

Tukma gayod sa panahon ang pakigpulong publiko nga nag-ulohang “Ang Talan-awon Niining Kalibotana Nagakausab.” Dunay dakong kausaban nga nahitabo sa atong panahon. Ang Bibliya nagtagna nga ang ingon niana nga mga kahimtang, apil na ang pagsinggit ug “kalinaw ug kasegurohan,” mosangpot ngadto sa makalilisang nga adlaw ni Jehova sa paghukom. (1 Tesalonica 5:3) Kini mopatungha ug maanindot nga mga kausaban—ang kataposan sa tanang gubat, krimen, kapintasan, ug bisan sakit. Imbes mosalig niini nga sistema sa mga butang, nan, panahon na nga pangagpason ang diyosnong pagkamahinalaron ug huptan ang putli nga paggawi.

Ang sumaryo sa pagtuon sa Bantayanang Torre niana nga semana gisundan sa kataposang pakigpulong sa kombensiyon nga nag-ulohang “Magmadagayaon sa Maayong mga Buhat Ingong Masibotong mga Magmamantala sa Gingharian.” Gihisgotan sa mamumulong kon sa unsang paagi ang programa nakapukaw kanato sa espirituwal ug nakadasig kanato sa pagsalig kang Jehova. Agig panghinapos, kita giawhag nga magpabiling hinlo, mahigugmaon, ug masibotong mga magwawali sa Gingharian sa Diyos.—1 Pedro 2:12.

May espiritu nga sama nianang sa mga alagad ni Jehova sa mga adlaw ni Nehemias, kita namauli sa balay nga natagbaw gayod sa espirituwal nga mga panalangin nga nadawat diha sa “Masibotong mga Magmamantala sa Gingharian” nga Distritong mga Kombensiyon. (Nehemias 8:12) Dili ba kining makapadasig nga kombensiyon nakahatag kanimog kalipay ug determinasyon nga magpadayon sa paglahutay ingong masibotong magmamantala sa Gingharian?

[Kahon/Hulagway sa panid 23]

Usa ka Bag-ong Giya sa Pagtuon!

Sa kataposan sa unang adlaw sa kombensiyon, ang nanambong nalipay sa dihang giluwatan ang bag-ong librong Simbaha ang Bugtong Matuod nga Diyos. Kini gidisenyo nga pagatun-an niadtong nakahuman sa pagtuon sa librong Kahibalo nga Motultol sa Kinabuhing Walay Kataposan ug sa walay duhaduha makapalig-on sa pagtuo niadtong “hustong nakiling alang sa kinabuhing walay kataposan.”—Buhat 13:48.

[Credit Line]

Image on book cover: U.S. Navy photo

[Kahon/Mga hulagway sa panid 24]

Tabang Aron Masuod sa Diyos

Ang kataposang mamumulong sa ikaduhang adlaw sa kombensiyon nagpahibalo sa pagluwat sa bag-ong librong Pakigsuod Kang Jehova. Kini adunay upat ka dagkong mga seksiyon, usa alang sa matag pangunang mga hiyas ni Jehova—gahom, hustisya, kaalam, ug gugma. Ang matag seksiyon sa libro adunay kapitulo nga nagpakita kon sa unsang paagi si Jesu-Kristo nagtagana ug tin-awng mga pananglitan sa mga hiyas sa Diyos. Ang pangunang katuyoan niining bag-ong libro mao ang pagtabang kanato ug sa atong mga estudyante sa Bibliya nga makatukod ug mas suod ug mas malig-ong relasyon uban kang Jehova nga Diyos.

[Kahon/Mga hulagway sa panid 26]

Espirituwal nga Giya Alang sa mga Batan-on

Ang ikatulong adlaw sa kombensiyon gitiman-an sa pagluwat sa linain nga tract nga nag-ulohang Mga Batan-on—Sa Unsang Paagi Gamiton Ninyo ang Inyong Kinabuhi? Gidisenyo aron matabangan ang batan-ong mga Saksi sa paghimog hustong mga desisyon bahin sa ilang umaabot, kining bag-ong tract naghatag ug tambag gikan sa Kasulatan bahin sa pagtukod ug walay-kataposang karera diha sa pag-alagad kang Jehova.