Pagkuhag Bug-os nga Kaayohan Gikan sa “Masibotong mga Magmamantala sa Gingharian” Distritong Kombensiyon
1 Makapalagsik nga Programa: Pagkamakapadasig nga programa ang atong natagamtam sa atong di pa dugay nga distritong kombensiyon! Nagkatigom kita alang sa usa ka katuyoan, aron mahimong mas pang masangkapan sa pagmantala sa Gingharian sa Diyos nga masiboton. Nahinumdom ka ba kon giunsa paghubit sa unang mamumulong ang pulong “pagmantala”? Nahinumdom ka ba kon unsang panukiduki nga kita gidasig sa paghimo diha sa pakigpulong nga “Magmaisogon Tungod kay si Jehova Nagauban Kanato”? Unsang tinuod nga mga asoy sa kinabuhi ang imo nang nasusi sa pagkakaron?
2 Ang simposyum nga “Ang Kalidad sa Atong Pagtuo Ginasulayan Pinaagi sa Nagkalainlaing mga Pagsulay” naghatag ug tulo ka pangunang mga rason kon nganong gitugotan ni Jehova ang paglutos. Ikapatin-aw ba nimo kon unsa ang maong mga rason? Unsa ang Kasulatanhong pasikaranan sa atong Kristohanong neyutralidad? Sa unsa nga kita gidasig sa pagpangandam sa atong kaugalingon sa mga suliran nga motungha maylabot sa atong neyutral nga baroganan? Sa unsang paagi ang atong matinumanong paglahutay sa mga pagsulay magdalag kadayeganan kang Jehova?
3 Unsang mga esenaha sa drama nga “Barog nga Malig-on sa Magubot nga Panahon” ang ilabinang nakapalig-on kanimo? Sa unsang paagi nga kita mahisama kang Jeremias?
4 Ang pakigpulong publiko, “Ang Talan-awon Niining Kalibotana Nagakausab,” naghubit ug unsang talagsaong mga kausaban nga hapit nang mahitabo ug nga motultol ngadto sa makalilisang nga adlaw sa Diyos? Samtang naminaw sa paniklop nga pakigpulong, “Magmadagayaon sa Maayong mga Buhat Ingong Masibotong mga Magmamantala sa Gingharian,” giunsa nimo paglangkit ang maong impormasyon nganha sa imong kaugalingong ministeryo?
5 Pangunang mga Punto nga Ipadapat: Ingon sa gipatin-aw sa pakigpulong nga “Ipakita nga Kamo Mapasalamaton,” sa unsang paagi atong ikapahayag ang atong kinasingkasing nga pasalamat ngadto kang Jehova? Sa sukaranang pahayag, “Ang mga Magmamantala sa Gingharian Napukaw sa Tumang Kasibot,” kansang kasibot nga kita gidasig sa pagsundog? Unsang pagsusi sa kaugalingon nga kita giawhag sa paghimo?
6 Ang simposyum nga “Ang Tagna ni Miqueas Nagpalig-on Kanato sa Paglakaw Diha sa Ngalan ni Jehova” nagpasiugda sa unsang tulo ka kinahanglanon nga ato gayong kab-oton aron madawat ang pag-uyon ni Jehova? Makab-ot ba ang maong mga kinahanglanon? (Miq. 6:8) Sumala sa pakigpulong nga “Ampingi ang Kaputli Pinaagi sa Pag-amping sa Imong Kasingkasing,” diha sa unsang mga paagi nga kita kinahanglan nga magpabiling hinlo sa moral? Sa unsang mga bahin nga ang pakigpulong nga “Pagbantay Batok sa Panglimbong” nagpasidaan kanato aron dili malimbongan ug dili manglimbong sa uban?
7 Unsang praktikal nga mga punto gikan sa simposyum nga “Mga Magmamantala sa Gingharian nga Naghimaya sa Ilang Ministeryo” ang gisugdan nimo sa pagpadapat diha sa imong ministeryo? Diha sa pakigpulong nga “Ang Espirituwal nga Kabildohay Makapalig-on,” ang Filipos 4:8 gianalisar. Sa unsang paagi ang maong teksto makatabang kanato sa pagpunting sa atong mga kabildohay ngadto sa espirituwal nga mga butang, ug kanus-a nato himoon kana?
8 Ang pakigpulong nga “Salig Kang Jehova sa Bug-os sa mga Panahon sa Kasakitan” naghisgot kon sa unsang paagi atong masagubang ang makapasubong mga kahimtang, kalisod sa panalapi, dili maayong panglawas, mga problema sa pamilya, ug nagpadayong mga kahuyangan. Sa unsang paagi atong ipakita ang pagsalig kang Jehova sa dihang makaatubang niining mga kahimtanga?
9 Bag-ong Espirituwal nga mga Bahandi: Nalipay kita sa pagkadawat sa bag-ong libro nga Simbaha ang Bugtong Matuod nga Diyos. Sa unsang paagi ang pahibalo nga nagpatin-aw sa katuyoan niini nakaapektar kanimo? Nganong makatabang man kini diha sa atong buluhatong paghimog tinun-an ingong ikaduhang tun-anang libro?
10 Sunod atong nadawat ang maanindot nga librong Pakigsuod Kang Jehova. Unsa ang pipila sa linaing mga bahin niini? Unsang mga ilustrasyona ang imong nagustohan pag-ayo? Ang imo bang pagbasa niana mas nakapasuod kanimo kang Jehova? Kinsa pa ang mahimong makabenepisyo gikan niana?
11 Ang “Masibotong mga Magmamantala sa Gingharian” Distritong Kombensiyon naghatag kanatog espirituwal nga pagdasig nga atong gikinahanglan sa pagsagubang niining malisod nga mga panahon. Aron bug-os makabenepisyo gikan niining talagsaong espirituwal nga tagana, hinaot buhaton nato ang ato gayong maarangan sa paghinumdom kon unsa ang gipahayag, sa pagpabili sa atong nadawat, ug sa pagpadapat sa atong nakat-onan. (2 Ped. 3:14) Ang paghimo niana magpalig-on kanato sa paghupot kanunay sa atong integridad ug mahimong masibotong mga magmamantala sa Gingharian sa pagsundog sa atong Ginoong Jesu-Kristo, ang tanan ngadto sa kahimayaan ni Jehova.—Filip. 1:9-11.