Tagamtama ang mga Kaayohan sa Diyosnong Pagtulon-an
“Ako, si Jehova, mao ang imong Diyos, ang Usa nga nagatudlo kanimo sa pagpahimulos sa imong kaugalingon.”—ISAIAS 48:17.
1. Unsa kaha ang atong kahimtang kon ipadapat nato ang diyosnong pagtulon-an sa atong mga kinabuhi?
SI Jehova nga Diyos ang labaw nga nahibalo. Wala nay molabaw kaniya sa hunahuna, pulong, o lihok. Isip atong Maglalalang, siya nahibalo sa atong mga panginahanglan ug sa madagayaon nagtagana niana. Tinong nahibalo siya kon sa unsang paagi kita pagatudloan. Ug kon ipadapat nato ang diyosnong pagtulon-an, atong mabatonan ang kaayohan ug matagamtam ang tinuod nga kalipay.
2, 3. (a) Sa unsang paagi ang karaang katawhan sa Diyos makabaton untag kaayohan sa ilang kaugalingon kon sila nagsugot pa sa iyang mga sugo? (b) Unsay mahitabo kon ipadapat nato ang diyosnong pagtulon-an sa atong mga kinabuhi karong adlawa?
2 Ang diyosnong pagtulon-an nagpadayag sa dakong tinguha sa Diyos nga ang iyang mga alagad malikay sa katalagman ug magkalipay sa kinabuhi pinaagi sa pagsunod sa iyang mga balaod ug mga prinsipyo. Kon ang karaang katawhan ni Jehova namati pa unta kaniya, matagamtam unta nila ang dagayang mga panalangin, kay giingnan niya sila: “Ako, si Jehova, mao ang imong Diyos, ang Usa nga nagatudlo kanimo sa pagpahimulos sa imong kaugalingon, ang Usa nga nagapalakaw kanimo diha sa dalan nga angay nga imong pagalaktan. Oh kon ikaw namati unta sa akong mga sugo! Unya ang imong pakigdait mahisama sa usa ka suba, ug ang imong pagkamatarong maingon sa mga balod sa dagat.”—Isaias 48:17, 18.
3 Ang karaang katawhan sa Diyos makapahimulos unta sa ilang kaugalingon kon sila namati pa sa iyang mga sugo ug mga instruksiyon. Inay makasinatig katalagman diha sa mga kamot sa mga taga-Babilonya, sila makatagamtam unta sa pakigdait ug kadagayang ingon katugob, kalalom, ug kamalungtaron sa usa ka suba. Dugang pa, ang matarong nilang binuhatan mahimong dili maihap ingon sa mga balod sa dagat. Sa susama, kon ipadapat nato ang diyosnong pagtulon-an diha sa atong mga kinabuhi, matagamtam nato ang daghang kaayohan niini. Unsa ang pipila niini?
Kini Mag-usab sa mga Kinabuhi
4. Sa unsang paagi ang diyosnong pagtulon-an nag-apektar sa mga kinabuhi sa daghang tawo?
4 Ang diyosnong pagtulon-an naghatag ug kaayohan sa daghang tawo pinaagi sa pag-usab sa ilang mga kinabuhi. Kadtong nagpadapat sa instruksiyon ni Jehova nagbiya sa “mga buhat sa unod,” sama sa malaw-ay nga kagawian, idolatriya, espiritismo, panag-away, ug pangabugho. Sa kapulihay, sila nagpadayag sa mga bunga sa espiritu nga mao ang gugma, kangaya, pakigdait, hataas-nga-pailob, kalulot, pagkamaayo, pagtuo, kalumo, ug pagpugong-sa-kaugalingon. (Galacia 5:19-23) Gipamatian usab nila ang tambag sa Efeso 4:17-24, diin si Pablo nag-agda sa isigkamagtutuo nga dili magagawi sama sa kanasoran, diha sa kawalay-kapuslanan sa ilang mga hunahuna ug diha sa kangitngitan sa hunahuna, nga nahibulag sa kinabuhi nga iya sa Diyos. Kay wala agaka sa dili-mobating mga kasingkasing, ang samag-Kristo nga mga indibiduwal ‘naghukas sa daang pagkatawo nga nahiuyon sa ilang kanhing panggawi ug gibag-o diha sa gahom nga nagapalihok sa ilang hunahuna.’ Sila ‘nagsul-ob sa bag-ong pagkatawo nga namugna sumala sa kabubut-on sa Diyos diha sa matuod nga pagkamatarong ug pagkamaunongon.’
5. Sa unsang paagi ang diyosnong pagtulon-an nag-apektar sa paagi sa paggawi sa mga tawo?
5 Usa ka kaayohan sa pagpadapat sa diyosnong pagtulon-an mao nga kini nagpakita kanato kon unsaon paglakaw uban sa Diyos. Kon kita magalakaw uban kang Jehova, sama sa gibuhat ni Noe, gisunod nato ang dalan sa kinabuhi nga gilatid sa atong Dakong Instruktor. (Genesis 6:9; Isaias 30:20, 21) Ang mga tawo sa mga nasod “naglakaw diha sa pagkawalay-pulos sa ilang mga kaisipan,” sumala sa giingon ni apostol Pablo. Ug pagkawalay-pulos ang pila ka sinulat nianang mga kaisipana! Sa pagmatikod sa mga sinulat sa uban diha sa usa ka paril sa Pompeii, usa ka maniniid misulat mismo: “Katingad-anan, Oh paril, nga wala ka pa matumpag tungod sa kabug-at sa daghan kaayong binuang nga sinulat.” Apan wala ing binuang sa “pagtulon-an ni Jehova” ug sa buluhatong pagwali sa Gingharian nga gipahinabo niini. (Buhat 13:12) Pinaagi nianang buluhatona, ang mahigugmaon-sa-kamatuorang mga tawo natabangan sa paglihok nga maalamon. Sila gitudloan kon sa unsang paagi mohunong sa paglakaw sa ilang makasasalang paagi, kay wala masayod sa mga katuyoan sa Diyos. Sila wala na diha sa kangitngitan sa kaisipan, ni gidasig sila sa dili-mobati nga mga kasingkasing aron tinguhaon ang walay-pulos nga mga tumong.
6. Unsa ang relasyon tali sa atong pagkamasinugtanon sa pagtulon-an ni Jehova ug sa atong kalipay?
6 Nakabaton usab kitag kaayohan sa diyosnong pagtulon-an sa pagkaagi nga tungod niini kita masinati kang Jehova ug sa iyang mga pakiglabot. Kanang kahibaloa mas mopasuod kanato sa Diyos, mopadako sa atong gugma kaniya, ug mopasamot sa atong tinguha nga mosugot kaniya. Matud sa 1 Juan 5:3: “Kay ang paghigugma sa Diyos nagakahulogan niini, nga atong sundon ang iyang mga sugo; ug gani ang iyang mga sugo dili man mabug-at.” Kita nagsunod usab sa mga sugo ni Jesus kay nahibalo man kita nga ang iyang pagtulon-an nagagikan sa Diyos. (Juan 7:16-18) Ang maong pagkamasinugtanon manalipod kanato batok sa espirituwal nga kadaot ug mopausbaw sa atong kalipay.
Usa ka Tinuod nga Katuyoan sa Kinabuhi
7, 8. (a) Unsaon nato pagsabot ang Salmo 90:12? (b) Sa unsang paagi kita makabaton ug kasingkasing nga maalamon?
7 Ang pagtulon-an ni Jehova mapuslanon sa pagpakita kanato kon unsaon paggamit sa atong kinabuhi sa may-katuyoang paagi. Sa pagkamatuod, ang diyosnong pagtulon-an nagpakita kanato kon unsaon pag-ihap sa atong mga adlaw sa linaing paagi. Ang gitas-on sa kinabuhi nga 70 anyos nagsaad ug mga 25,550 ka adlaw. Ang tawo nga 50 anyos nakagugol nag 18,250 ka adlaw, ug ang iyang gilaoman nga nahibiling 7,300 ka adlaw maorag diyutay na lang kaayo. Nianang panahona ilabina nga makapabili siya sa mas bug-os pa kon nganong ang propetang si Moises nag-ampo sa Diyos sa Salmo 90:12: “Ipakita kanamo kon unsaon pag-ihap ang among mga adlaw aron kami makabaton ug kasingkasing nga maalamon.” Apan unsay gipasabot ni Moises niana?
8 Wala ipasabot ni Moises nga ang Diyos magpadayag sa eksaktong gidaghanon sa mga adlaw sa kinabuhi sa matag Israelinhon. Sumala sa Salmo 90, mga bersikulo 9 ug 10, ang maong Hebreohanong propeta nag-ila nga ang gitas-on sa kinabuhi tingali mga 70 o 80 ka tuig—nga mubo kaayo. Busa ang mga pulong sa Salmo 90:12 dayag nagpahayag sa mainampoong tinguha ni Moises nga si Jehova magpakita o magtudlo kaniya ug sa Iyang katawhan nga gamiton ang kaalam aron mapabilhan ‘ang mga adlaw sa ilang katuigan’ ug magamit kana sa paagi nga inuyonan sa Diyos. Nan, komosta man kita? Kita ba nagpabili sa matag bililhong adlaw? Nabatonan ba nato ang kasingkasing nga maalamon pinaagi sa pagtinguha sa paggugol sa matag adlaw sa mapuslanong paagi alang sa himaya sa atong Dakong Instruktor, si Jehova nga Diyos? Ang diyosnong pagtulon-an nagtabang kanato sa pagbuhat gayod niana.
9. Unsay madahom kon kita makakat-on sa pag-ihap sa atong mga adlaw alang sa himaya ni Jehova?
9 Kon makakat-on kita sa pag-ihap sa atong mga adlaw alang sa himaya ni Jehova, kita mahimong makapadayon sa pag-ihap nga walay hunong, kay ang diyosnong pagtulon-an naghatag ug kahibalo alang sa kinabuhing dayon. “Kini nagakahulogan ug kinabuhing walay-kataposan,” matud ni Jesus, “ang ilang pagkuha ug kahibalo kanimo, ang bugtong matuod nga Diyos, ug sa usa nga imong gipadala, si Jesu-Kristo.” (Juan 17:3) Siyempre, kon atong mabatonan ang tanang kahibalo sa kalibotan nga anaa, dili kana mohatag kanatog kinabuhing dayon. Apan ang kinabuhing walay kataposan maangkon nato kon atong batonan ug ipadapat ang tukmang kahibalo sa duha ka labing hinungdanong persona sa uniberso ug magpakita gayod ug pagtuo.
10. Unsay giingon sa usa ka ensiklopedia mahitungod sa edukasyon, ug komosta kini kon itandi sa mga kaayohan sa diyosnong pagtulon-an?
10 Bisan pag unsa na ka taas ang atong kinabuhi, atong hinumdoman kining talagsaong kaayohan sa diyosnong pagtulon-an: Mohatag kinig tinuod nga katuyoan sa kinabuhi niadtong nagapadapat niini. Ang The World Book Encyclopedia nag-ingon: “Ang edukasyon angay motabang sa mga tawo sa pagkahimo nga mapuslanong mga sakop sa katilingban. Kini angay usab motabang kanila sa pag-ugmad sa apresasyon sa ilang kultural nga panulondon ug sa pagkinabuhig mas matagbawong mga kinabuhi.” Ang diyosnong pagtulon-an mapuslanon sa pagtabang kanato sa pagkinabuhig matagbawong mga kinabuhi. Mougmad kini sa atong kahiladman sa lalom nga apresasyon sa atong espirituwal nga panulondon isip katawhan sa Diyos. Ug kini sa tino mohimo kanato nga mapuslanong mga sakop sa katilingban, kay mopaarang kini kanato sa pagdulag bililhong bahin aron itagana ang mga panginahanglan sa mga tawo sa tibuok yuta. Ngano man nga ikasulti kana?
Tibuok-Kalibotang Programa sa Pagpanudlo
11. Giunsa pagpasiugda ni Thomas Jefferson ang panginahanglan sa tukmang edukasyon?
11 Nga walay laing samang programa sa pagtudlo, ang diyosnong pagtulon-an nagtagana sa edukasyonal nga mga panginahanglan sa mga tawo. Ang panginahanglan sa pagtudlo sa mga tawo gipahayag ni Thomas Jefferson, kinsa nahimong ikatulong presidente sa Tinipong Bansa. Sa usa ka sulat sa Agosto 13, 1786, ngadto kang George Wythe, usa ka higala ug kaubang tigpirma sa Deklarasyon sa Independensia, si Jefferson misulat: “Sa akong hunahuna ang labing hinungdanong balaod diha sa atong tibuok kabalaoran mao ang balaod sa pagpalapnag ug kahibalo taliwala sa mga tawo. Walay laing tinong patukoranan ang mamugna, alang sa katunhayan sa kagawasan ug kalipay. . . . Ipasiugda, minahal nga ginoo, ang usa ka kampanya batok sa kawalay-alamag; ipahiluna ug pauswaga ang balaod alang sa pag-edukar sa kasagarang mga tawo. Pahibaloa ang atong mga paisano . . . nga ang buhis nga igabayad sa katuyoan [sa edukasyon] dili mokapin sa usa ka bahin sa libo nianang igabayad ngadto sa mga hari, mga pari, ug mga hamili nga motindog sa atong taliwala kon pasagdan nato nga walay alamag ang katawhan.”
12. Nganong ikaingon nga ang diyosnong pagtulon-an mao ang labing malamposon ug mapuslanong programa alang sa tibuok-yutang edukasyon?
12 Halayo nga pasagdan ang mga tawong hilig sa pagkamatarong nga magpabiling walay alamag, ang pagpanudlo ni Jehova nagtagana sa labing maayong programa alang sa tibuok-yutang edukasyon alang sa ilang kaayohan. Samtang nagsilaob pa ang Gubat sa Kalibotan II 50 ka tuig kanhi, ang Komite sa Edukasyonal nga Pagtukod-Pag-usab sa T.B. nakasabot sa dinaliang panginahanglan alang sa “tibuok-yutang edukasyon.” Ang maong panginahanglan naglungtad gihapon, apan ang diyosnong pagpanudlo mao lamang ang malamposong programa alang sa tibuok-yutang edukasyon. Kini usab ang labing mapuslanon kay kini mohaw-as sa mga tawo gikan sa kawalay-paglaom, mobayaw kanila sa moral ug espirituwal nga paagi, moluwas kanila gikan sa garbo ug kamapihigon sa kalibotan, ug mohatag ug kahibalo alang sa kinabuhing dayon. Labaw sa tanan, kining programaha nagahatag ug kaayohan sa mga tawo sa bisan diin pinaagi sa pagtudlo kanila nga moalagad kang Jehova nga Diyos.
13. Sa unsang paagi ang Isaias 2:2-4 gituman karong adlawa?
13 Ang mga kaayohan sa diyosnong pagtulon-an gipahimuslan sa kapid-an karon nga nahimong mga alagad sa Diyos. Sila mahunahunaon sa ilang espirituwal nga panginahanglan ug sa bug-os nasayod nga ang adlaw ni Jehova haduol na. (Mateo 5:3; 1 Tesalonica 5:1-6) Pagkakaron, “sa kataposang bahin sa mga adlaw,” kining katawhang gikan sa tanang nasod nagaganayan ngadto sa bukid ni Jehova, ang iyang maputling pagsimba. Kini lig-ong pagkatukod ug gibayaw ibabaw sa tanang pagsimba nga supak sa kabubut-on sa Diyos. (Isaias 2:2-4) Kon ikaw usa ka dedikadong Saksi ni Jehova, wala ka ba malipay nga nahiapil sa kanunay-nagauswag nga panon nga nagasimba kaniya ug nagapahimulos sa diyosnong pagtulon-an? Kahibulongan gayod kaayo nga maapil niadtong nagpatugbaw: “Dayega ninyo si Jehova!”—Salmo 150:6.
Mapuslanong Epekto Diha sa Atong Espiritu
14. Unsay kaayohan sa pagsunod sa tambag ni Pablo sa 1 Corinto 14:20?
14 Apil sa daghang kaayohan sa diyosnong pagtulon-an mao ang maayong epekto niini diha sa atong panghunahuna ug espiritu. Kini motukmod kanato sa paghunahuna sa matarong, maputli, maligdong, ug dalayegong mga butang. (Filipos 4:8) Ang pagtulon-an ni Jehova moabag kanato sa pagsunod sa tambag ni Pablo: “Magpakabata sa pagkadaotan; apan magpakahingkod diha sa mga kagahom sa pagsabot.” (1 Corinto 14:20) Kon ipadapat nato kining tambaga, dili kita magtinguhag kahibalo sa pagkadaotan. Si Pablo misulat usab: “Kuhaa gikan kaninyo ang tanang mapangdaoton nga kayugot ug kasuko ug kapungot ug sininggitay ug maabusohong sinultihan uban sa tanang pagkadaotan.” (Efeso 4:31) Ang pagpamati sa maong tambag motabang kanato sa paglikay sa imoralidad ug sa ubang grabeng mga sala. Samtang kini makahatag ug kaayohan sa lawas ug sa kaisipan, kini mohatag ilabina kanato sa kalipay sa pagkahibalo nga kita nagapahimuot sa Diyos.
15. Unsay makatabang nato sa pagpabiling matarong sa panghunahuna?
15 Aron kita magpabiling matarong sa panghunahuna, ang usa ka tabang mao nga likayan ‘ang daotang pakig-uban nga modaot sa mapuslanong mga batasan.’ (1 Corinto 15:33) Isip mga Kristohanon, kita dili makig-uban sa mga makihilawason, mga mananapaw, ug ubang mga mamumuhat ug daotan. Nan, makataronganon nga dili kita makig-uban sa maong mga indibiduwal pinaagi sa pagbasa mahitungod kanila alang sa kalipayang unodnon o pinaagi sa pagtan-aw kanila diha sa telebisyon o sa mga sine. Ang kasingkasing mabudhion, daling makabatog tinguha sa daotang mga butang, ug matental sa pagbuhat niana. (Jeremias 17:9) Busa likayan nato ang maong mga panental pinaagi sa pagsunod sa diyosnong pagtulon-an. Makaapektar kini sa panghunahuna sa “mga mahigugmaon kang Jehova” nianang mapuslanong sukod nga ilang “gidumtan ang daotan.”—Salmo 97:10.
16. Sa unsang paagi ang pagtulon-an sa Diyos makaapektar sa espiritu nga atong gipakita?
16 Giingnan ni Pablo ang iyang isigkamagbubuhat nga si Timoteo: “Ang Ginoo magauban sa espiritu nga imong ginapakita. Ang iyang dili-takos nga kalulot magauban kaninyo.” (2 Timoteo 4:22) Gitinguha sa apostol nga ang Diyos, pinaagi ni Ginoong Jesu-Kristo, magauyon sa nagapalihok nga gahom nga nagtukmod kang Timoteo ug sa ubang mga Kristohanon. Ang pagtulon-an sa Diyos nagtabang kanato sa pagpadayag ug mahigugmaon, maluluton, malumong espiritu. (Colosas 3:9-14) Ug pagkalahi niini gikan sa espiritu sa daghan niining kataposang mga adlaw! Sila mapahitas-on, dili-mapasalamaton, walay gugma nga kinaiya, dili ikasabot, gahig-ulo, mahigugmaon ug kalingawan, ug walay tinuod nga diyosnong debosyon. (2 Timoteo 3:1-5) Samtang mopadayon kita sa pagpadapat sa mga kaayohan sa balaang pagtulon-an diha sa atong mga kinabuhi, hinunoa, atong ipasundayag ang espiritu nga mahimo kitang minahal sa Diyos ug sa isigkatawo.
Mapuslanon Diha sa Tawhanong mga Pakiglabot
17. Nganong hinungdanon kaayo ang mapaubsanong pakigtambayayong?
17 Ang pagtulon-an ni Jehova motabang kanato sa pagsabot sa mga kaayohan sa mapaubsanong pakigtambayayong sa kaubang mga magsisimba. (Salmo 138:6) Lahi sa daghang tawo karong adlawa, kita dili molapas sa matarong nga mga prinsipyo kondili kita maoy ikasabot. Pananglitan, ang dakong kaayohan mosangpot kay ang tinudlong mga magtatan-aw ikasabot man panahon sa mga tigom sa mga ansiano. Kining mga tawhana makasulting malinawon sa kaayohan sa kamatuoran, samtang dili motugot nga ang emosyon mopukgo sa pangatarongan o mopahinabo sa kawalay-panaghiusa. Ang tanang membro sa kongregasyon makabatog kaayohan gikan sa espiritu sa paghiusa nga atong gitagamtam kon kitang tanan magpadayon sa pagpadapat sa diyosnong pagtulon-an.—Salmo 133:1-3.
18. Ang diyosnong pagtulon-an motabang nato sa pagbaton sa unsang pangisip bahin sa isigkamagtutuo?
18 Ang diyosnong pagtulon-an mapuslanon usab sa pagtabang kanato sa paghupot ug tukmang pag-isip sa isigkamagtutuo. Si Jesus miingon: “Walay tawo nga makaari kanako gawas kon ang Amahan, kinsa nagpadala kanako, magkabig kaniya.” (Juan 6:44) Sukad sa 1919 ilabina, gipamantala ni Jehova sa iyang mga alagad ang iyang mga panghukom, ug ang tibuok-kalibotang sistema ni Satanas giuyog ug gitay-og nianang tibuok-yutang pasidaan. Sa samang panahon, ang mahadlokon-sa-Diyos nga mga tawo—“ang tilinguhaong mga butang”—gidani na sa Diyos aron mobulag gikan sa mga nasod ug makaambit uban sa dinihogang mga Kristohanon sa pagpuno sa balay sa pagsimba ni Jehova sa himaya. (Haggeo 2:7) Sa pagkamatuod, angay nga isipon nato kanang tilinguhaong mga tawo nga gidani sa Diyos ingong minahal nga mga kauban.
19. Unsay gipadayag sa pagtulon-an sa Diyos mahitungod sa paghusay sa personal nga mga kabingkilan batok sa isigka-Kristohanon?
19 Siyempre, kay kitang tanan dili man hingpit ang kinabuhi dili kanunayng hanoy. Sa dihang hapit nang mogikan si Pablo alang sa iyang ikaduhang misyonaryong panaw, si Bernabe determinado nga modala kang Marcos. Wala mosugot si Pablo kay si Marcos “mibulag man kanila gikan sa Pampilia ug wala mokuyog kanila sa buluhaton.” Niana, misangpot ang “pagsilaob sa kasuko.” Si Bernabe nagdala kang Marcos ngadto sa Cipro, samtang si Silas gipakuyog ni Pablo latas sa Sirya ug Cilicia. (Buhat 15:36-41) Sa ulahi, ang maong panagbingkil lagmit nahusay ra, kay si Marcos nahauban man ni Pablo sa Roma, ug ang apostol nagdayeg kaniya. (Colosas 4:10) Usa ka kaayohan sa diyosnong pagtulon-an mao nga kini magpakita kanato kon sa unsang paagi husayon ang personal nga mga kabangian tali sa mga Kristohanon pinaagi sa pagsunod sa tambag nga sama sa kang Jesus sa Mateo 5:23, 24 ug Mateo 18:15-17.
Sa Kanunay Mapuslanon ug Madaogon
20, 21. Ang atong paghisgot sa diyosnong pagtulon-an angay modasig kanato sa pagbuhat sa unsa?
20 Bisan gikan sa mubo natong paghisgot sa pila ka kaayohan ug kadaogan sa diyosnong pagtulon-an, sa walay duhaduha kitang tanan makasabot sa panginahanglan nga molahutay sa pagpadapat niini sa atong mga kinabuhi. Nan, uban sa mainampoong espiritu, magpadayon kita sa pagkakat-on gikan sa atong Dakong Instruktor. Sa dili madugay, ang diyosnong pagtulon-an magmadaogon nga labaw pa kay sukad masukad. Kini magmadaogon sa dihang ang mga utokan niining kalibotana mabugtoan sa gininhawa sa walay kataposan. (Itandi sa 1 Corinto 1:19.) Dugang pa, samtang minilyon pa ang makakat-on ug mobuhat sa kabubut-on sa Diyos, ang yuta mapuno sa kahibalo kang Jehova ingon sa katubigan nga nagtabon sa dagat mismo. (Isaias 11:9) Pagkadako unya nga kaayohan ang maangkon sa masinugtanong mga tawo ug mabayaw gayod si Jehova isip Unibersohanong Soberano!
21 Ang pagtulon-an ni Jehova sa kanunay mapuslanon ug madaogon. Mopadayon ka ba sa pagpahimulos niini isip madasigong estudyante sa dakong Basahong-tun-anan sa Diyos? Nagakinabuhi ka ba nga nahiuyon sa Bibliya ug nagapakig-ambit sa mga kamatuoran niini sa uban? Kon mao, makapanan-aw ka sa unahan nga makakita sa hingpit nga kadaogan sa diyosnong pagtulon-an, sa himaya sa atong Dakong Instruktor, ang Soberanong Ginoo nga si Jehova.
Unsay Imong Nakat-onan?
◻ Unsa ang epekto sa diyosnong pagtulon-an diha sa atong mga kinabuhi?
◻ Sa unsang paagi ang pagtudlo ni Jehova nagatagana sa edukasyonal nga mga panginahanglan?
◻ Unsa ang mapuslanong epekto sa diyosnong pagtulon-an diha sa atong panghunahuna ug tinamdan?
◻ Sa unsang paagi ang pagtulon-an sa Diyos nagmapuslanon kon bahin sa tawhanong mga relasyon?
[Hulagway sa panid 15]
Ang diyosnong pagtulon-an nagpakita kanato kon unsaon paglakaw uban sa Diyos, sama sa gibuhat ni Noe
[Hulagway sa panid 17]
Ang mga tawo sa tanang nasod nagaganayan ngadto sa bukid ni Jehova