Ang Pulong sa Diyos Mapuslanon sa Pagpanudlo
1. Unsa ang tema sa sirkitong asembliya sa 2014, ug unsang pangutana ang tubagon sa programa?
1 Ang atong “Dakong Instruktor,” si Jehova, mao ang kinamaayohang magtutudlo sa tibuok uniberso. (Isa. 30:20, 21) Sa unsang paagi kita gitudloan ni Jehova? Iyang gitagana ang kinalabwang libro—iyang inspiradong Pulong, ang Bibliya. Sa unsang paagi ang gitudlo sa Diyos makabenepisyo kanato sa pisikal, mental, emosyonal, ug espirituwal? Tubagon kini sa programa sa sirkitong asembliya sa 2014. Ang tema maoy “Ang Pulong sa Diyos Mapuslanon sa Pagpanudlo,” nga gibase sa 2 Timoteo 3:16.
2. Unsang mga pangutana ang magpasiugda sa mga pangunang punto?
2 Pangitaa Kining mga Pangunang Punto: Ang mga tubag sa mga pangutana sa ubos magpasiugda sa mga pangunang punto:
• Unsay epekto sa pagtudlo sa Diyos sa atong kinabuhi? (Isa. 48:17, 18)
• Kon maningkamot kita sa paghimog mga kausaban sa atong kahimtang aron makapayunir, sa unsa kita makaseguro? (Mal. 3:10)
• Unsay angay natong reaksiyon kon motungha ang “langyaw nga mga pagtulon-an”? (Heb. 13:9)
• Sa unsang paagi atong masundog ang “paagi sa pagpanudlo” ni Jesus? (Mat. 7:28, 29)
• Nganong ang mga magtutudlo diha sa kongregasyon angayng magtudlo sa ilang kaugalingon? (Roma 2:21)
• Ang Pulong sa Diyos mapuslanon sa unsa? (2 Tim. 3:16)
• Unsay epekto sa ‘pag-uyog’ sa kanasoran diha sa mga tawo? (Hag. 2:6, 7)
• Si Jehova nahibalo nga kita makahimo sa unsa? (Efe. 5:1)
• Nganong maningkamot kita sa pagpabilin diha sa pagtulon-an ni Jehova? (Luc. 13:24)
3. Nganong importante nga motambong ug mamati kita niining tukma sa panahong programa?
3 Sa nag-unang mga bersikulo sa 2 Timoteo kapitulo 3, una pa sa teksto nga gibasehan sa tema sa programa, gihubit ni Pablo ang makuyawng mga panahon nga magpaila sa kataposang mga adlaw. Siya misulat: “Ang mga tawong daotan ug mga impostor mosamot pa kangil-ad, nga nagapahisalaag ug nahisalaag.” (2 Tim. 3:13) Aron dili mahisalaag, importanteng pamatian ug ipadapat ang gitudlo sa Diyos! Busa, paneguroon nato nga makatambong ug mamati niining tukma sa panahong programa.