‘Matuman ang Kabubut-on sa Diyos’
1. Unsay tema sa espesyal nga asembliya sa 2012, ug nganong angay nato kining tagdon?
1 Kita nalalang tungod sa kabubut-on ni Jehova. (Pin. 4:11) Busa dili gayod nato matuman ang katuyoan sa atong pagkalalang kon dili kita mahibalo ug mobuhat sa kabubut-on sa Diyos. Dili kini sayon kay kita kinahanglang makigbisog sa pagbuhat sa “mga butang nga gipangandoy sa unod ug sa hunahuna” o sa pagbuhat “sa kabubut-on sa mga nasod.” (Efe. 2:3; 1 Ped. 4:3; 2 Ped. 2:10) Kon walay tabang sa Diyos, peligro pa nga kita ‘madakpang buhi sa Yawa alang sa iyang kabubut-on.’ (2 Tim. 2:26) Ang atong espesyal nga asembliya sa 2012 motabang kanato nga molihok uyon sa ikatulong punto diha sa modelong pag-ampo. (Mat. 6:9, 10) Ang tema niini mao, ‘Matuman ang Kabubut-on sa Diyos.’
2. Unsang mga pangutana ang pagatubagon niini nga asembliya?
2 Mga Pangutanang Pagatubagon: Samtang maminaw ka sa programa, matikdi ang mga tubag niini: Unsa pay laing hinungdanong butang nga atong himoon gawas sa pagpatalinghog sa Pulong sa Diyos? Sa unsang paagi padayon natong masabtan kon unsay kabubut-on sa Diyos alang kanato? Nganong maningkamot kita sa pagsangyaw sa tanang matang sa tawo? Sa unsang paagi imong mabatonan ang makahuloganong kinabuhi? Mga batan-on, unsay angay ninyong pamatud-an kang Jehova? Unsay mga ganti sa pagbuhat sa kabubut-on sa Diyos? Nganong dinalian nga atong palig-onon ug dasigon ang uban?
3. Sa unsang paagi kita bug-os nga makabenepisyo niini nga asembliya?
3 Paneguroa nga makatambong ka ug paminaw pag-ayo sa programa. Tingali ang bisitang mamumulong maoy usa ka hawas sa Bethel o nagapanawng magtatan-aw. Sa dili pa ug human sa programa, ayaw pagpanuko sa pagduol kaniya ug sa iyang asawa, kon siya minyo. Aron dili kamo mahimong “malimtanong tigpaminaw,” repasoha ang programa ingong pamilya o indibiduwal kon sa unsang paagi inyong matuman sa mas bug-os pa ang kabubut-on sa Diyos.—Sant. 1:25.
4. Nganong angay natong unahon ang pagbuhat sa kabubut-on sa Diyos?
4 Sa dili madugay kadtong nangagpas sa kaugalingon nilang mga tinguha ug wala magtuman sa kabubut-on ni Jehova pagalaglagon. (1 Juan 2:17) Busa mapasalamaton kita kang Jehova sa pagtagana niining nahiangayng impormasyon aron matabangan kita nga unahon pagbuhat ang kabubut-on sa Diyos!