Panalipdi ang Imong Kaisipan

1. Unsa ang tema sa sirkitong asembliya sa 2013, ug unsay katuyoan sa programa?

¹ Gisugo ni Jesus ang iyang mga tinun-an nga higugmaon si Jehova sa tibuok nilang kasingkasing, kalag, ug kaisipan. (Mat. 22:37, 38) Ang mga programa sa kombensiyon ug sa sirkito ug espesyal nga asembliya niining tuiga gidisenyo aron tabangan kita nga palig-onon ang atong sulod nga pagkatawo. Inyong mahinumdoman nga ang tema sa atong distritong kombensiyon maoy “Ampingi ang Imong Kasingkasing!” Ang programa sa espesyal nga asembliya sa 2013 dunay temang “Panalipdi ang Imong Tanlag.” Ang tema unya sa serye sa mga sirkitong asembliya nga magsugod sa sunod bulan maoy “Panalipdi ang Imong Kaisipan,” nga gibase sa Mateo 22:37. Kini nga programa gidisenyo sa pagtabang sa matag usa nga susihon ang kaugalingong mga hunahuna aron kini mas kahimut-anan kang Jehova.

2. Angayng pangitaon nato ang mga tubag sa unsang mga pangutana samtang mamati kita sa programa?

² Kon Unsay Pagahisgotan: Dihang mamati kita sa programa sa sirkitong asembliya, angayng pangitaon nato ang mga tubag niini nga mga pangutana, nga maoy mga pangunang punto:

• Sa unsang paagi malikayan nato ang paghunahuna sa ‘mga hunahuna sa tawo’?

• Sa unsang paagi kita makatabang sa pagtangtang sa taptap nga nakabuta sa hunahuna sa mga dili magtutuo?

• Unsa nga tinamdan sa pangisip ang gusto natong mabatonan?

• Unsa ang mga kaayohan sa hustong pagpamalandong?

• Sa unsang paagi ipaumol nato kang Jehova ang atong hunahuna?

• Sa unsang paagi ang mga bana, asawa, ginikanan, ug mga anak makaamot sa kalipay sa pamilya?

• Sa unsang paagi kita mahimong andam sa adlaw ni Jehova?

• Unsay kahulogan sa pag-andam sa atong kaisipan alang sa buluhaton?

• Unsa nga kaayohan ang maani niadtong nagpadapat sa ilang nakat-onan?

3. Nganong hinungdanon nga kita motambong ug duha ka adlaw, mamati pag-ayo, ug magpadapat sa atong nakat-onan?

³ Si Satanas nakigbisog aron mapahisalaag ang atong kaisipan. (2 Cor. 11:3) Busa, kinahanglang panalipdan nato ang atong kaisipan ug kontrolahon ang atong panghunahuna aron makapahimuot kini kang Jehova. Kinahanglan natong ipabanaag kanunay ang panghunahuna ni Kristo ug suklan ang mga impluwensiya niining malapasong kalibotan. (1 Cor. 2:16) Busa hikaya nga makatambong ka sa duha ka adlaw nga sirkitong asembliya. Pamati pag-ayo. Ang pagpadapat sa hinungdanong impormasyon nga ipresentar makatabang kanato sa pag-andam sa atong kaisipan alang sa masibotong pag-alagad sa Gingharian.—1 Ped. 1:13.