Tagana Alang sa Kristohanong mga Ministro
1. Unsang bag-ong kahikayan ang gisugdan sa 1938, ug unsay katuyoan niini?
1 Niadtong 1938, gisugdan sa organisasyon ni Jehova ang usa ka bag-ong kahikayan. Ang mga kongregasyon gidapit sa pagtambong sa mga asembliya sa sona, nga karon gitawag ug sirkitong mga asembliya. Unsay katuyoan niini? Ang Enero 1939 nga gula sa Informant (karon Atong Ministeryo sa Gingharian) nag-ingon: “Kini nga mga asembliya maoy bahin sa Teokratikanhong Organisasyon ni Jehova alang sa pag-alagad sa Gingharian. Nagtagana kinig hinungdanong instruksiyon aron ang matag usa makatuman sa giasayn nga buluhaton sa hustong paagi.” Kon atong tagdon ang pag-uswag sa mga magmamantala sa Gingharian gikan sa 58,000 sa 1938 ngadto sa kapig 7,000,000 sa 2010, dayag nga nagmalamposon ang katuyoan sa sirkitong mga asembliya sa pagtabang sa mga ministro nga “makatuman sa giasayn nga buluhaton”!
2. Unsang impormasyon ang ipresentar sa atong sirkitong asembliya niining bag-ong tuig sa pag-alagad?
2 Tema sa Sunod Tuig: Kita mahinamong nagpaabot sa makapadasig nga programa nga magsugod sa Pebrero. Ang tema nga ‘Kamo Dili Bahin sa Kalibotan’ gikutlo sa Juan 15:19. Unsa ang pipila sa mga pakigpulong nga makahatag gayod ug kaayohan sa Kristohanong mga ministro? Sa Sabado atong mapatalinghogan ang pakigpulong nga “Sa Unsang Paagi ang Bug-os Panahong Pag-alagad Manalipod Kanato?” Ato usab nga mapahimuslan ang tulo-ka-bahin nga simposyum nga “Likayi nga Mahugawan sa . . . ” “Mapintas nga Mananap,” “Dakong Bigaon,” ug “Nagapanawng mga Magpapatigayon.” Sa Dominggo atong mapaminawan ang simposyum nga may temang “Higugmaa si Jehova, Dili ang Kalibotan.” Ang ubang pakigpulong naglakip sa “Magpadayon Ingong ‘mga Langyaw ug Temporaryong mga Pumoluyo’” ug “Magmaisogon! Madaog Mo ang Kalibotan.”
3. Unsang mga benepisyo ang atong madawat sa pagtambong sa sirkitong asembliya?
3 Human makatambong sa dili pa dugayng sirkitong asembliya, usa ka sister nga dili hinangyaw misulat nga ang programa nakatabang kaniya nga susihon ang iyang kahimtang ug “mogula gayod sa kanataran ug dili mangitag rason nga dili makasangyaw!” Walay duhaduha nga ang programa sa sirkitong asembliya niining bag-ong tuig sa pag-alagad makatabang kanato nga higugmaon si Jehova inay ang kalibotan. (1 Juan 2:15-17) Paneguroa nga makatambong ka ug maminaw pag-ayo aron bug-os makapahimulos niining mahigugmaong tagana alang sa Kristohanong mga ministro!