Bag-ong Sirkitong Asembliyang Programa
1 Sugod sa Pebrero, 1996, ang tema alang sa sirkitong mga asembliya mao ang “Patalinghog ug Pagkat-on sa Pagtuman sa Pulong sa Diyos.” Kining temaha, pinasukad sa Deuteronomio 31:12, 13, nagataganag haom nga pasikaranan alang sa entirong programa sa pagpasiugda sa mga pagtulon-ang atong gikinahanglang makat-onan ug mapadapat.
2 Bisan tuod kadaghanan sa mga tawo karong adlawa nagapaminaw sa nagapahisalaag nga inspiradong mga pahayag, adunay hinungdanong panginahanglan alang sa matag usa kanato sa pagpaminaw sa Pulong sa Diyos ug pagkat-on sa pagtuman niini. (Luc. 11:28; 1 Tim. 4:1) Uban niini sa hunahuna, ang programa sa sirkitong asembliya gidesinyo sa pagtaganag pagdasig ug tabang sa mga magmamantala, mga pamilya, mga ansiyano, ug mga payunir. Sa Sabado, adunay upat-ka-bahing simposiyum sa ulohang “Pagsagubang Uban sa Atong mga Problema—Pinaagig Pagtagad sa Pulong sa Diyos.” Ug sa Dominggo sa buntag, adunay pagahimoong simposiyum nga nag-ulohang “Kon sa Unsang Paagi ang Kasulatan Nagadisiplina sa Pagkamatarong.” Ang entirong programa magapasundayag sa espirituwal nga pagdasig nga kinahanglang dili sipyaton nimo ug sa imong pamilya.
3 Sa Sabado ug Dominggo, praktikal nga mga sugyot alang sa ministeryo sa kanataran igatanyag ug igapasundayag. Ang makapadasig ug matulon-anong mga kasinatian ug mga interbiyu igapresentar usab. Busa, pinaagig pagtambong ug pagpatalinghog uban ang tumong nga ipadapat ang imong nakat-onan, ikaw anaa sa mas maayong kahimtang sa pagtuman nga bug-os sa mga sugo sa Pulong sa Diyos.
4 Usa sa dagkong mga puntos sa sirkitong asembliya mao ang bawtismo sa bag-ong dedikadong mga igsoong lalaki ug mga igsoong babaye. Buweno, sa dili pa kining publikong kapahayagan sa ilang dedikasyon, ang mga kandidato kinahanglang magpahayag sa ilang tinguha alang sa bawtismo ngadto sa nagadumalang magtatan-aw aron iyang mahikay ang ubang mga ansiyano nga makatigom uban kanila.
5 Ang pakigpulong publiko alang niining serye sa sirkitong asembliya nag-ulohang “Nganong Magpagiya sa Bibliya?” Nga abante pa sa asembliya, sugdi ang pag-imbitar sa interesadong mga tawo sa pagtambong. Sa pagpaabot sa gikinahanglan-kaayong pagdasig ug tabang nga madawat nimo ug sa imong pamilya, paghimog tinong mga plano nga makatambong alang sa entirong programa.