Managtukaw ug Magmahusay sa Inyong Hunahuna
1 Tungod sa sigi-nagakabalhin nga kahimtang sa kalibotan, pagkatukma nga ang tema sa sirkitong asembliya sa 1991 maoy “Managtukaw ug Magmahusay sa Inyong Hunahuna.” (1 Tes. 5:6) Kini nga serye magsugod sa Pebrero, 1991. Ang tanan gayod kanato maghimog mga pangandam sa pagtambong sa dihang ang inyong magtatan-aw sa sirkito magpahibalo na kaninyo sa mga petsa.
2 Ang pipila sa dagkong puntos sa programa maglakip sa upat-bahin nga simposiyum nga gituyo sa pagtabang kanato nga ‘managtukaw diha sa tanang butang.’ (2 Tim. 4:5) Bisan pa sa posibleng way-pagtagad sa miagi, sa unsang paagi kita karon magmalamposon sa paglikay sa mga lit-ag ni Satanas ug makapakigbisog sa espiritu sa kalibotan? Paneguroang dili pakyason kining hinungdanong impormasyon. Sa tibuok duha-adlaw nga asembliya, ang atong pagtagad dad-on ngadto sa mapuslanong tambag nga anaa sa basahong Mga Pangutana nga Gisukna sa mga Batan-on—Mga Tubag nga Mosaler. Basin gusto mong dad-on ang imong kopya. Ilabina ang mga batan-on buot nga sa linain motagad sa impormasyon nga gipunting ngadto kanila pinaagig magtatan-aw sa sirkito sa Sabado. Ingon sa naandan, adunay mga kahikayan sa bawtismo sa Sabado, mao nga kadtong nagatinguha sa pagpasimbolo sa ilang pahinungod didto sa sirkitong asembliya magpahibalo gayod nga abante sa nagadumalang magtatan-aw sa sayo nga maarangan.
3 Sa buntag sa Domingo ang hinungdanong mga leksiyon ipasiugda pinaagig serye sa mga pasundayag nga nagapakita kon sa unsang paagi kita makakuhag kaayohan gikan sa mga kalisdanan, apil na ang ato mismong mga kasaypanan. Sa palis ang magtatan-aw sa distrito mopahayag sa publikong diskurso sa ulohang “Paglihok nga Maalamon diha sa Walay Salabotan nga Kalibotan.” Ang tanang magmamantala sa Gingharian ug mga interesadong tawo kinahanglang manlimbasog nga makatambong.
4 Sanglit kay padayong nagatubo ang mga kapit-osan sa kinabuhi, kami nagatuo nga ang tanan makakuhag kaayohan ug kahupayan gikan ning maong materyal nga giandam alang sa atong kalig-on. Tinoa nga makatambong ug padayong mapatalinghogon sa bug-os nga programa, “kay karon ang atong kaluwasan mas haduol na kay sa panahon sa atong pagkahimong mga magtutuo.”—Roma 13:11.