Bag-ong Programa sa Sirkitong Asembliya

“Bantayi ang mga Sugo sa Diyos ug Mabuhi” mao ang tema sa duha ka adlaw nga programa sa sirkitong asembliya nga magsugod sa Pebrero. (Prov. 4:4) Ipasiugda niini kon nganong ang pagsunod sa mga sugo sa Diyos dili mabug-at. Dugang pa, ipakita niini kon sa unsang paagi ang pagbuhat sa kabubut-on sa Diyos magdalag kahupayan ug tinuod nga kalipay maingon man paglaom sa umaabot.​—Mat. 11:28-30; Juan 13:17.

Sa pagsunod sa sugo ni Kristo sila nga gustong magpabawtismo didto sa asembliya kinahanglang mosulti sa nagadumalang magtatan-aw, ug himoon niya ang gikinahanglang mga kahikayan.​—Mat. 28:19, 20.

Ang usa ka simposyum magpatin-aw sa praktikal nga mga paagi nga atong ikapakita ang gugma alang sa Diyos ug sa atong mga igsoon. (Juan 13:34, 35; 1 Juan 5:3) Ang makapadasig-kasingkasing nga tambag gikan sa Salmo 19 ug 119 ilakip diha sa programa. Bisan tuod ang dinasig nga pahimangno niini nga mga salmo gisulat linibo na ka tuig kanhi, atong makita kon sa unsang paagi kini makahatag kaayohan kanato sa personal nga paagi karong adlawa.

Ang pakigpulong publiko nga ihatag sa magtatan-aw sa distrito nag-ulohang “Kahadloki ang Diyos ug Bantayi ang Iyang mga Sugo.” (Eccl. 12:13) Ang paniklop nga pakigpulong sa magtatan-aw sa sirkito magpakita kon sa unsang paagi ang mga batan-on makabaton sa labing maayo sa kinabuhi karon ug kon nganong makabaton silag pagsalig diha sa walay kataposang kaugmaon. Tiklopan sa magtatan-aw sa distrito ang programa pinaagi sa pag-isaisa sa daghang kaayohan nga maangkon tungod sa pagkinabuhi pinaagig “harianong balaod” sa gugma. (Sant. 2:8) Sa pagkatinuod, kini maoy usa ka programa sa asembliya nga dili gustong pakyason sa tanan!