Bag-ong Programa sa Sirkitong Asembliya
Unsang praktikal nga mga kaayohan ang imong nadawat karon tungod sa paglakaw uban ni Jehova? Sa unsang paagi ikaw makasukol sa tentasyon nga magtugot sa di-teokratikanhong mga pangagpas nga dili mauna ang intereses sa Gingharian sa imong kinabuhi? (Mat. 6:33) Nalisdan ka ba sa pag-ila sa husto gikan sa sayop diha sa kalibotan nga naghimo sa sayop nga maorag husto? (Heb. 5:14) Kining mga butanga hisgotan diha sa “Magpahimulos Karon Pinaagig Paglakaw sa mga Dalan nga Iya ni Jehova” nga sirkitong asembliya, sugod sa Pebrero 2000.—Sal. 128:1.
Ang bag-ong bahin sa Sabado niini nga sirkitong asembliya mao ang presentasyon sa usa ka sulondang Tigom sa Pag-alagad. Ang inyong magtatan-aw sa sirkito mopahibalo sa mga kongregasyon kon unsay giplano aron ang tanan makatambong nga andam sa pagpahimulos sa bug-os sa programa.
Ang bahin nga nag-ulohang “Mga Payunir—Padayong Magbantay Pag-ayo sa Inyong Paglakaw” mopakita kanato kon unsaon sa pagpasundayag sa kaalam ug pagkamakataronganon aron sa pagpalit sa nahiangayng panahon alang sa payunir nga ministeryo. (Efe. 5:15-17) Ang ulohang “Pagbantay sa mga Paagi nga Maorag Husto” motudlo kanato kon unsaon pagtino kon unsay dalawaton ngadto sa Diyos sa tanang bahin sa kinabuhi. Ang pakigpulong nga “Kon sa Unsang Paagi ang Natumang Tagna Mag-apektar Kanato” motabang sa pagpuno sa atong mga hunahuna ug mga kasingkasing pinaagig gugma dapig sa Pulong sa Diyos. Ang pakigpulong publiko nga “Iya sa Diyos nga mga Dalan—Pagkamapuslanon!” mopasiugda sa praktikal nga mga kaayohang nadawat karon tungod sa pagpabiling nahiuyon sa matarong nga mga kinahanglanon ni Jehova.
Tinguha ba nimo nga ipasundayag sa publiko pinaagi sa bawtismo sa tubig nga ikaw buot molakaw sa iya sa Diyos nga mga dalan ingong usa sa iyang dedikadong mga alagad? Nan sultihi ang nagadumalang magtatan-aw aron ang gikinahanglang mga kahikayan mahimo.
Himoa kana nga imong determinasyon sa dili pagsipyat niining haom-sa-panahong sirkitong asembliya. Tambong sa bug-os duha-ka-adlaw nga programa, kay “malipayon ang matag usa nga nahadlok kang Jehova, nga nagalakaw sa iyang mga dalan.”—Sal. 128:1.