Sirkitong Asembliya nga Motabang Kanato sa Pag-amping sa Atong Espirituwalidad
1. Unsa ang usa ka paagi aron atong madawat ang mga tagana ni Jehova nga motabang kanato sa pagtuman sa sugo nga isangyaw ang maayong balita?
1 Si Jehova dagayang nagtaganag impormasyon, pagbansay, ug pagdasig nga atong gikinahanglan sa pagtuman sa buluhaton nga iyang gisugo kanato nga mao ang pagsangyaw sa maayong balita. (Mat. 24:14; 2 Tim. 4:17) Ang atong tinuig nga sirkitong asembliya maoy usa ka paagi aron atong madawat ang maong mga tagana. Ang bag-ong programa alang sa 2010 magpasiugda sa tema nga “Ampingi ang Imong Espirituwalidad,” nga gipasukad sa Roma 8:5 ug Judas 17-19. Ang bag-ong serye magsugod sa ikatulong semana sa Enero 2010.
2. (a) Sa unsang mga paagi ang sirkitong asembliya mapuslanon kanato? (b) Sa unsang paagi ang miaging sirkitong mga asembliya nakatabang kanimo sa ministeryo?
2 Kon Unsa ka Mapuslanon: Ang programa magpasidaan kanato sa mga kapeligrohan, sama sa mga kalihokan nga makahurot sa atong panahon ug makapalinga sa atong pagtagad sa kon unsay tinuod nga hinungdanon. Atong makat-onan kon unsaon pagbuntog ang espiritu sa pagkamatinugoton, ug pagahisgotan usab kon unsay nalangkit sa pagkahimong espirituwal nga tawo. Ang simposyum sa Dominggo magpakita kon unsang mga lakang ang mahimo sa mga indibiduwal ug mga pamilya aron mapalig-on ang ilang espirituwalidad bisan pa sa nagkagrabeng mga pagpit-os ug pagsulay sa pagtuo. Ang programa motabang kanato sa pag-amping sa atong mga kasingkasing, pagpabiling himsog sa espirituwal, ug sa paghunahuna kanunay sa dagkong mga panalangin nga nagpaabot niadtong mga tawong nag-amping sa ilang espirituwalidad.
3. Kanus-a ang inyong sunod nga sirkitong asembliya, ug unsay angay nimong himoon?
3 Sa dihang imo nang mahibaloan kon kanus-a ug asa ipahigayon ang inyong sunod nga sirkitong asembliya, planoha nga makatambong ug makapaminaw pag-ayo sa tanang programa sa duha ka adlaw. Magmasaligon nga panalanginan ni Jehova ang mga plano sa makugihon.—Prov. 21:5.
4. Unsa ang segurado natong madawat sa atong umaabot nga sirkitong asembliya?
4 Si Jehova mao gayod ang Magtatagana niining talagsaong gasa. Ang programa nga giandam sa matinumanong ulipon nga matang mao gayod ang atong gikinahanglan aron makapadayon kita ingong Kristohanong mga ministro. Kita mapasalamaton gayod kang Jehova sa tanan niyang mahigugmaong tagana nga motabang kanato sa ‘pagpangupot pag-ayo sa pagpahayag sa dayag bahin sa atong paglaom nga walay pagkatarog.’—Heb. 10:23-25; Sant. 1:17.