Bag-ong Programa sa Sirkitong Asembliya
Niining “makuyaw nga mga panahong lisod sagubangon,” kita nagkinahanglag diyosnong kaalam aron mabatonan ug mahuptan ang pag-uyon ni Jehova. (2 Tim. 3:1) Ang programa sa sirkitong asembliya sa 2005 maghatag kanatog praktikal nga tambag ug pagdasig samtang tagikon niini ang temang “Magpagiya sa ‘Kaalam nga Gikan sa Itaas.’”—Sant. 3:17.
Ang unang simposyum nga, “Pagpasundayag sa ‘Kaalam nga Gikan sa Itaas’ Diha sa Atong Kinabuhi,” motabang kanato sa pagsabot kon unsay nalangkit sa pagkaputli, pagkamakigdaiton, pagkamakataronganon, ug pagkaandam mosunod. Dayon hatagag pagtagad sa magtatan-aw sa sirkito ang laing tulo ka bahin sa langitnong kaalam. Taposon sa magtatan-aw sa distrito ang unang adlaw pinaagi sa pagpakita kon sa unsang paagi ang Kristohanong mga ministro nasangkapan sa pagsulti sa kaalam sa Diyos, bisan tuod giisip sa pipila nga “dili edukado ug ordinaryo.”—Buh. 4:13.
Sa ikaduhang adlaw, ang simposyum nga nag-ulohang “Himoa ang mga Butang nga Makapalig-on” motabang kanato sa pag-ila ug paglikay sa mga butang nga makapaluya kanato sa espirituwal. Ipakita usab niini kanato kon unsaon nato pagdasig ang uban diha sa mga tigom sa kongregasyon, sa ministeryo sa kanataran, ug sa sulod sa pamilya. Ang pakigpulong publiko nga “Kon sa Unsang Paagi ang Diyosnong Kaalam Mapuslanon Kanato,” magpalalom sa atong pagpabili sa mga kaayohan nga atong madawat samtang atong ipadapat ang balaang mga prinsipyo sa atong kinabuhi. Ang paniklop nga pakigpulong, “Ang Pagpadapat sa Balaang Kaalam Magpanalipod Kanato,” magpalig-on sa atong tinguha sa pagpangayog kaalam kang Jehova niining kataposang mga adlaw.
Ang haylayt sa matag asembliya mao ang pagbawtismo sa bag-ong mga tinun-an. Ang Teokratikanhong Tunghaan sa Ministeryo ug ang Pagtuon sa Bantayanang Torre sa maong semana ilakip usab sa programa. Maoy tinguha ni Jehova nga kitang tanan makabatog kaayohan sa kaalam nga iyang itagana. Kita malig-on sa espirituwal pinaagi sa tambag ug pagdasig nga naghulat kanato sa atong sirkitong asembliya.—Prov. 3:13-18.