Pinadayag​—Mga Misteryo Nabutyag

¹ Ang basahon sa Pinadayag maoy sa dugay nang panahon usa ka misteryo. Apan ang impormasyon sa Pinadayag wala tuyoang magpabiling tinagoan sa walay kataposan. Kana maoy bahin sa Pulong sa Diyos nga gikinahanglan natong masabtan. (2 Tim. 3:16, 17) Sa pagkamalipayon, maingon nga gigamit ni Jehova si Juan sa pakigkomunikar niining mga panan-awona ngadto sa iyang isigka-Kristohanon, busa karong adlawa siya nagagamit sa “matinumanong ulipon” sa pagbutyag sa kahulogan niining maong makakulba-hinam nga tagna.​—Mat. 24:45-47; Pin. 1:1-3.

² Ang Tanyag sa Marso: Ang librong Pinadayag​—Hingpit nga Sangkoanan Niini Haduol Na! naglamdag ug dako sa katawhan sa Diyos. Apan nganong makapaikag man kini sa katawhan sa imong teritoryo? Tungod kay kini nagahisgot sa mga panghitabo nga mahitabo niining kataposang mga adlaw. Dili ba ang mahunahunaong mga tawo interesado man sa kaugmaon ingon sa gipadayag sa Diyos? Gawas pa sa paghulagway sa mga paghukom sa Diyos, kini usab nagatanyag sa mga saad sa kahibulongang mga panalangin sa umaabot.​—Pin. 21:1-5.

³ Ang Pinadayag ba nga libro halalom kaayo alang sa publiko sa pagkasabot? Dayag nga ang pipila wala makakaplag niini nga malisod kaayo. Ang usa ka tawo miingon: “Kini nga impormasyon maoy gamhanan. Apan makaiikag kini. Nagustohan ko kini.” Ang usa ka ministro miingon: “Wala pa gayod ako masayod o makabasa sa bisan unsa nga mas makapaukyab ug matinud-anon kay niining libroha!” Ang laing tawo nga nakabasa sa libro nga wala ray usa ka semana mikomento: “Karon ang akong mga mata nabuka kaayo sa kamatuoran. Buot kong usbon ang tibuok kong kinabuhi.” Tin-aw, nga daghan ang nakakaplag ug kalipay samtang ilang gibasa ang libro sa Bibliya nga Pinadayag uban ang pagsabot sa unang higayon ug misugod sa pagtuman sa mga pulong niini.

⁴ Irekomendar ang Librong Pinadayag sa Uban: Sa Marso, itanyag ang librong Pinadayag nga mainiton ngadto sa uban. Ihisgot ngadto kanilang nagatinguhang mobasa niana nga mahimo nilang markahan ang mga bahin sa libro nga wala nila masabti, ug sa dihang mobalik ka, imong hisgotan kining mga puntoha uban kanila. Kini magataganag dugang pasukaranan alang sa pagbalikduaw.

⁵ Dugang pa sa balaybalay nga ministeryo, daghan ang milampos sa pagtanyag sa librong Pinadayag sa impormal nga paagi ngadto sa mga paryente, mga kaila, ug mga kontak sa negosyo. Isaysay kon sa unsang paagi ikaw nabenepisyohan sa personal sa mabulokong mga ilustrasyon, mapuslanong mga tsart, ug ubang mga tabang sa pagtudlo diha sa libro. Kini makadasig sa uban nga susihon ang basahon sa Pinadayag.

⁶ Pagkadakong pribilehiyo ang pagbaton ug kahibalo sa umaabot nga mga panghitabo ingon sa pagbutyag niana sa basahon sa Pinadayag! Kay gipiyalan nianang kahibaloa, magmaikagon gayod kita nga magpahibalo sa kahulogan sa Pulong sa Diyos ngadto sa mga magapatalinghog. Samtang buhaton ta kana, kita magalaom nga daghan pa ang moduyog kanato sa pagbuhat sa kabubut-on sa atong Maglalalang.​—Pin. 4:11.