Pinadayag—Hingpit nga Sangkoanan Niini Haduol Na!
1 “Malipayon siya nga nagabasa sa makusog ug kadtong nagapatalinghog sa mga pulong niini nga tagna, ug kinsa nagatuman sa mga butang nga nahisulat niini; kay ang tinudlong panahon haduol na.” (Pin. 1:3) Kanang mga pulonga nagpasiugda sa kahinungdanon sa basahong Pinadayag, ilabina kay kita nagkinabuhi na sa tinudlong panahon nga matuman ang daghang tagna niini. Busa, haom nga atong sugdan ang pagtuon sa librong Pinadayag—Hingpit nga Sangkoanan Niini Haduol Na! diha sa Pagtuon sa Libro sa Kongregasyon sugod sa semana sa Enero 8, 2007.
2 Sukad sa kataposan natong pagtuon sa librong Sangkoanan sa Pinadayag diha sa Pagtuon sa Libro sa Kongregasyon, ang talan-awon sa kalibotan nangausab na sa daghang paagi. (1 Cor. 7:31) Dugang pa, daghan niadtong miduyog sa mga magwawali sa maayong balita sa Gingharian wala pa makaapil sa bersikulo-por-bersikulo nga pagtuon sa librong Pinadayag. Ang pagtuon sa librong Sangkoanan sa Pinadayag motabang gayod kanato sa pagpabiling nagtukaw bahin sa kon unsay mahitabo sa umaabot.—Pin. 16:15.
3 Paningkamoting makatambong ka matag semana. Kining libroha dili lang makatabang kanato sa pagpabiling mabinantayon kondili ang mga mensahe ni Jesus ngadto sa pito ka kongregasyon makatabang usab kanato sa paglikay sa mga kahimtang nga makadaot gayod sa atong espirituwalidad ug sa atong pagpakigbahin sa ministeryo.—Pin. 1:11, 19.
4 Pangandam Pag-ayo: Sa dili pa ang matag pagtuon sa libro, basaha ang mga bersikulo nga pagahisgotan diha sa basahon sa Pinadayag. Matikdi ang Kasulatanhong pangatarongan nga magpatin-aw sa maong mga bersikulo. Paningkamoting masabtan ang pangunang mga punto nga makatandog sa kasingkasing. (Neh. 8:8, 12) Paggahin ug panahon sa pagpamalandong ug pangutan-a ang imong kaugalingon: ‘Unsay gitudlo niini kanako bahin kang Jehova ug sa katumanan sa iyang katuyoan? Sa unsang paagi ako makalihok nga nahiuyon sa iyang katuyoan ug makatabang sa uban?’
5 Nubentay-dos ka tuig na ang milabay sukad nagsugod ang “adlaw sa Ginoo” sa 1914. (Pin. 1:10) Ang dagkong mga hitabo nga gitagna sa basahon sa Pinadayag hapit nang matuman. Ang pagtuon sa librong Sangkoanan sa Pinadayag makapadasig sa atong kasingkasing ug hunahuna ug makapalig-on sa atong pagtuo nga ang “gubat sa dakong adlaw sa Diyos nga Labing Gamhanan” ug ang bag-ong kalibotan haduol na.—Pin. 16:14; 21:4, 5.