Pagmantala ‘sa mga Pulong sa Tagna’
1 Daghang tawo buot nga masayod sa kahulogan sa makapasamok nga mga hitabo nga nagakahitabo karon. Sila makabenepisyo gikan sa ‘pagpaminaw sa mga pulong’ sa tagna sa Pinadayag. (Pin. 1:3) Sa Marso, kita may kahigayonan sa pag-abag kanila pinaagig pagtanyag sa librong Pinadayag. Unsay atong isulti?
2 Kining paagiha mahimong epektibo:
◼ “Ang gubat, gutom, ug sakit naghampak sa katawhan niining ika-20 nga siglo. Ngano man kini nga unta nakahimo man ug dakong teknikal nga pag-uswag ang tawo? [Tugoting motubag.] Daghan ang natingala sa pagkasayod nga kini gitagna na sa Bibliya. Malagmit ikaw nakadungog na bahin sa ‘upat ka magkakabayo sa Apokalipsis.’ Kini sa aktuwal maoy usa ka tagna nga nagakatuman karong adlawa. [Buksi ang librong Pinadayag sa kapitulo 16, ug ipakita ang ilustrasyon sa mga panid 91-7.] Samtang ang tagna nagatagna sa usa ka panahon sa dakong kapit-osan, kini nagahatag usab ug paglaom. [Basahang Pinadayag 6:2 sa parapo 3.] Ang Magkakabayo sa puting kabayo mao si Jesu-Kristo. Pinaagi sa iyang Gingharian, siya nagsaad sa pagbuntog sa pagkadaotan ug ipahinabo ang usa ka kalibotan sa kalipay ug pakigdait.” Itanyag ang libro.
3 Tingali kining pangutanaha makaaghat ug makapainteres nga panaghisgot:
◼ “Unsay imong gibati nga gikinahanglan sa pagwagtang sa daotang mga kahimtang sa kalibotan? [Tugoting motubag.] Kadaghanang tawo mouyon nga adunay panginahanglan alang sa hinanaling mga kausaban kon molungtad man ugaling kining kalibotana. Ang Bibliya nagapakita nga ang Diyos nahibalo kon unsay angayng pagabuhaton ug nagsaad sa pagsulbad sa atong mga suliran.” Pakliang Pinadayag nga libro, sa panid 171, ug basahang Pinadayag 11:15 sa parapo 1. Paklia ngadto sa ilustrasyon sa mga panid 302 ug 308, ug ipunting ang mga panalangin ubos sa Gingharianong pagmando pinaagi ni Kristo. Unya isaysay kon sa unsang paagi sila sa personal makabenepisyo.
4 Hayan mahimuot ka sa pagsultig sama niini:
◼ “Daghang tawo nga nakabasa sa basahon sa Bibliya nga Pinadayag nakakaplag niana nga malisod sabton. Kana nagahubit sa nagkalainlain di-kasagarang mga tawo ug mga hitabo. Kining libroha, Pinadayag—Hingpit nga Sangkoanan Niini Haduol Na!, nagataganag bersikulo-por-bersikulong pagtagad sa tibuok basahon sa Pinadayag ug nagapakita kon sa unsang paagi kita sa personal maapektohan sa katumanan niini.” Buksi ang libro ngadto sa panid 15, parapo 2, ug ipunting ang Pinadayag 1:1, diha sa dayag kaayong letra. Isaysay nga ang ingon niini nga mga komento gihatag sa matag bersikulo sa basahon sa Pinadayag. Itanyag ang libro.
5 Kon ang tawo puliki o wala nimo maseguro nga may igong interes, mahimong ikabilin nimo ang usa ka magasin o usa ka tract. Sa dihang ikaw mobalik ug gipakita ang interes, ang libro ikatanyag.
6 Ang mensahe nga anaa sa Pinadayag magaapektar sa tanang katawhan. Busa ang tanan kinahanglang magpatalinghog sa mga pulong sa tagna. Hinaot nga buhaton natong tanan ang atong maarangan sa pagmantala niining hinungdanong mensahe.