Itanyag ang Maayong Balita Uban ang Pag-ila sa Pagkadinalian
1 Atong ikapakita ang atong lalom nga apresasyon sa mga saad sa Gingharian sa Diyos pinaagi sa kinasingkasing nga pagpakig-ambit sa Kristohanong ministeryo. Kinahanglang makig-ambit kita niining buluhatona uban ang pag-ila sa pagkadinalian. Ngano? Tungod kay ang mga mamumuo diyutay ra, ang kataposan niining sistemaha sa mga butang duol na, ug ang mga kinabuhi niadtong anaa sa atong teritoryo nameligro. (Ezeq. 3:19; Mat. 9:37, 38) Unsaon nato pagpasundayag ang pag-ila sa pagkadinalian diha sa atong kalihokan sa kanataran? Pinaagig pagpangandam ug maayong mga presentasyon nga abante, pinaagig pagpangita sa katawhan bisan diin sila tingali makaplagan, pinaagig pagtala niadtong tanan kinsa nagapakitag interes ug pagbalik dihadiha aron paloapon kana nga interes. Ang mosunod nga mga sugyot hayan makatabang samtang atong ipresentar ang maayong balita uban ang pag-ila sa pagkadinalian sa Pebrero. Ang tanyag mao ang Creation nga libro.
2 Hayan makasugod ka sa panaghisgot pinaagig mubong paghisgot sa pipila ka suliran nga ginaatubang sa katilingban, ug dayon ikaw makaingon:
◼ “Daghang tawo nagtuo nga adunay usa ka Diyos, apan sila nahibulong: ‘Unsang matanga sa kaugmaon ang buot niya alang kanato?’ Unsaon nimo pagtubag kana? [Tugoting motubag.] Nasayod ka ba nga ang Bibliya tin-awng nagasaysay sa kabubut-on sa Diyos alang sa katawhan ug ang mga tikang nga iyang pagahimoon aron makab-ot kana?” Paklia ang panid 239 sa Creation nga libro. Basaha ang Pinadayag 21:4 sa parapo 13. Ipakita ang mga hulagway sa mga panid 237 ngadto sa 239 aron iilustrar kon unsay kahulogan niini alang sa atong kaugmaon. Itanyag ang libro. Hikaya ang kombenyenteng panahon sa pagbalik aron ipadayon ang panaghisgot.
3 Imong mapaloap ang miaging panaghisgot sa Pinadayag 21:4 uban niining mubong presentasyon:
◼ “Sa akong miaging duaw, atong nahisgotan ang bahin sa saad sa Diyos sa pag-andam ug usa ka bag-ong yutan-ong katilingban alang sa katawhan. [Dad-a ang pagtagad pag-usab ngadto sa hulagway sa panid 237 sa Creation nga libro.] Buot ba nimong makita ang imong pamilya nga makapahimulos sa maong malipayong mga kahimtang? [Tugoting motubag.] Ang pangutana mao, Unsa ka kasaligan ang mga saad sa Diyos? Palihog matikdi kon unsay iyang giingon mismo.” Basaha ang Pinadayag 21:5, 6a. Isukna ang pinatik nga pangutana sa mga parapo 13 ug 14 sa panid 239, ug basaha ang tubag. Hisgoti ang tanyag sa usa ka libreng pagtuon sa Bibliya. Hikaya nga ipasundayag kana sa ulahi.
4 Sanglit daghan ang nabalaka bahin sa nagtubong mga suliran nga ginaatubang sa katawhan, hayan makaingon ka ug sama niini sa unang duaw:
◼ “Ang matag usa nga akong nahibalag nabalaka bahin sa mga suliran nga atong ginaatubang sa atong komunidad. [Hisgoti ang pipila.] Sa mga dekada ang mga politiko nagsaad sa pagpatunghag mga kasulbaran, ug ang pipila misulay sa pagbuhat niana. Unsay imong hunahuna nga nagapahinabo sa mga kahimtang nga padayong nagakagrabe? [Tugoting motubag.] Gisaysay sa Bibliya nga tungod kini kay kita nagakinabuhi sa kataposan sa sistema sa mga butang.” Basaha ang Mateo 24:3 gikan sa panid 223, parapo 20 sa Creation nga libro, dayon basaha ang mga ulohan sa mga parapo 22-27 sa mga panid 224 ug 225 ug suknaa ang tagbalay kon siya mouyon ba nga nagakahitabo kini sa atong adlaw. Itanyag ang basahon ug hikaya nga mobalik ug hisgotan kon unsaon pagsulbad sa Diyos ang mga suliran sa katawhan.
5 Kon nakasaad ka sa pagbalik aron isaysay ang solusyon sa Diyos sa mga suliran karong mga adlawa, hayan masulayan nimo kining paagiha:
◼ “Naningkamot gayod ako sa pagbalik aron makapadayon kita sa atong panaghisgot sa tinuod nga solusyon sa mga suliran nga ginaatubang sa katawhan. Sa akong ulahing duaw, atong nasabtan nga ang Bibliya nagabutyag sa atong panahon ingong ang kataposan sa sistema sa mga butang. Unsa may kahulogan niini alang kanato? Nagakahulogan kini nga sa dili madugay ang Diyos magwagtang niining tibuok daotang sistema ug pulihan kini ug usa nga bag-o.” Basaha ug isaysay ang Pinadayag 21:1, 4. Pinaagig paggamit sa hulagway sa mga panid 4-5 sa Kahibalo nga libro, ipakita kon mahisama sa unsa ang mga kahimtang kon ania na ang bag-ong sistema. Itanyag ang pagtuon sa Bibliya ug sulayi ang pagsugod niana dihadiha.
6 Tungod sa daghang katawhan nga interesado sa palibot, makasulti ka ug ingon niini aron makabukas ug panaghisgot:
◼ “Among nakaplagan nga halos ang matag usa nabalaka bahin sa polusyon sa atong hangin, tubig, ug pagkaon. Sa pipila ka nasod ang kahimtang sa palibot nagahulga na sa kinabuhi. Sanglit ang Diyos mao ang Maglalalang sa yuta, sa imong hunahuna unsay iyang buhaton bahin niini? [Tugoting motubag.] Ang Bibliya nagaingon nga ang Diyos mohimog panudya bahin sa paagi nga atong gigamit ang planeta. [Basaha ang Pinadayag 11:18b.] Handurawa ang pagkinabuhi ibabaw sa yuta nga hilwas sa tanang polusyon!” Ipunting ang saad sa Diyos sa usa ka paraiso, ingon sa gipakita sa Pinadayag 21:3, 4. Ipakita ang hulagway sa panid 237 sa Creation nga libro. Itanyag ang libro ug hikaya nga mobalik.
7 Sa dihang mobalik sa usa kinsa nagpakitag interes sa Paraisong yuta, ikaw makaingon:
◼ “Sa akong ulahing duaw, nagkauyon ta nga aron masulbad ang suliran sa polusyon sa yuta, ang Diyos mangilabot gayod sa mga kalihokan sa tawo. Apan ang pangutana mao, Unsa may atong kinahanglang buhaton aron makalabang-buhi ngadto sa matarong bag-ong kalibotan nga himoon sa Diyos?” Basaha ang Juan 17:3. Dapita ang tagbalay nga pahimuslan ang atong libreng kurso sa pagtuon sa Bibliya aron makabaton niining linaing kahibalo.
8 Pagkadakong pribilehiyo nga magamit ingong modernong-adlaw nga mga mang-aani ug magabuhat sa nagaluwas-kinabuhing buluhaton sa pagsangyaw! Hinaot nga kitang tanan magmapuliki sa pagtanyag sa maayong balita uban ang pag-ila sa pagkadinalian, ‘nga nahibalo nga ang atong paghago dili makawang.’—1 Cor. 15:58.