Unsay Akong Isulti Aron Mapukaw ang Dugang Interes?
1 Usa ka dakong bahin sa atong katuyoan sa pagsangyaw sa maayong balita mao ang paghimog tinun-an, dili lamang pagbilin ug basahon. Busa, human makaplagi ang interes, gikinahanglan tang ugmaron ang mga binhi nga natanom aron si Jehova makatabang sa indibiduwal nga motubo sa espirituwal. (1 Cor. 3:6) Unsa may imong ikasulti ingon nga pagpaloap sa unang mga presentasyon nga gilaraw sa ibabaw? Ania ang pipila ka sugyot.
2 Pag-ugmad sa Nakaplagang Interes: “Sa atong unang mubong panagsulti, puliki ka kaayo, apan migahin kag panahon sa pagpahayag sa imong kabalaka sa umaabot. Ingon sa imong mahinumdoman, nabasa nato sa Bibliya sa Pinadayag 1:3 nga ‘ang tinudlong panahon haduol na.’ Kana adunay diretsong pagtandog maylabot sa kaugmaon natong tanan. Matikdi kon giunsa ni Jesus pagtubag ang pangutana sa iyang mga tinun-an kon kanus-a moabot ang kataposan, dinhi sa Lucas 21:10, 11, 31. Interesado ka ba nga mokat-on pa ug dugang bahin sa mga tagna sa Bibliya nga natuman na? Ang magasing Bantayanang Torre nagabutyag sa natuman nang mga tagna sa Bibliya ug nagapanunot kanato maylabot sa kalibotanong mga hitabo.”
3 Paggamit ug Laing Basahon sa Pagsugod ug Pagtuon sa Bibliya: “Nalipay ko nga naabtan ka sa balay karon. Sa ulahi natong panaghisgot, gibasa nato ang saad sa Bibliya sa Pinadayag 1:3. [Usbag basa.] Matikdi nga ang gihisgotang kalipay dili moabot nga hinanali. Duha ka butang ang gikinahanglan: Kinahanglan tang basahon kon unsa ang giingon sa Bibliya ug dayon buhaton, kon unsay nasulat. Kining brosyur nga ‘Tan-awa! Ginabag-o Ko ang Tanang Butang’ makapahimo sa imong pagbasa sa basahon nga akong nabilin nimo nga mas makalilipay tungod kay kini nagasaysay sa yanong paagi kon unsa ang mga kinahanglanon sa Diyos. Sa panid 30 adunay han-ay sa 12 ka pangutana nga gisukna sa daghang tawo. Hain niini ang buot nimong matubag?” Human sa tubag sa tagbalay, mapakli mo ang dapit sa brosyur diin ang pangutana gitubag ug masugdan ang pagtuon sa Bibliya.
4 Gamitang mga Ilustrasyon Aron Mapukaw ang Interes: Ang magasing Bantayanang Torre adunay daghang buhing mga ilustrasyon. Mahimo kining mapatugbaw aron mapukaw ang interes. Una pa maghimog balikduaw, maayong mosusi sa kinabag-ohang mga magasin ug tan-awon kon haing mga ilustrasyon nga magamit aron mapukaw ang dugang interes sa pagtuon sa Bibliya. Kon modesider ka nga mopaila ug laing libro o brosyur, nan gamita ang mga ilustrasyon dinha nga makapukaw sa interes, nga nagapatunghag mga pangutana nga pagatubagon sa sunod panahon. Ang mga ilustrasyon sa hinaposang mga panid ikapakita, ingon man ang mga esenang naghulagway sa Paraisong yuta.
5 Sa mga pagbalikduaw, kinahanglang tukoron ta ang pundasyon nga napahiluna sa unang duaw. Ang paghatag maampingong pagtagad niining bahina sa atong ministeryo magpatunghag dagayang mga panalangin ni Jehova kanato ug kanilang nagapatalinghog kanato.—1 Tim. 4:16.