Tabangi ang Uban sa “Pagsunod sa mga Butang nga Nahisulat”
1 Dili pa igo ang “pagpaminaw” sa mga pulong sa mga tagna diha sa Pinadayag. Aron bug-os nga makabenepisyo, ang usa kinahanglang “mosunod” kon unsa ang nasulat. (Pin. 1:3) Ang pagpahilunag literatura maoy una lamang nga tikang sa paghimog mga tinun-an. Dihang makaplagan nato kadtong andam nga maminaw, kinahanglang mobalik kita dayon sa pagtabang kanila nga makakat-on ug dugang. Unsay atong isulti sa atong pagbalikduaw?
2 Kon ikaw naghisgot bahin sa simbolikong upat ka magkakabayo sa imong unang duaw, mahimong sugdan nimo ang inyong panaghisgot niining paagiha:
◼ “Sa miagi atong nahisgotan ang bahin sa pagsakay sa simbolikong upat ka magkakabayo nga moresulta sa sobrang kapintasan ug kapit-osan sa yuta. Atong nakita kini nga nagakahitabo sa atubangan gayod sa atong mga mata. Daghan ang nahibulong kon kanus-a kining kapit-osana matapos aron nga atong mapahimuslan ang kinabuhi diha sa malinawong kalibotan. Unsa ang imong opinyon? [Tugoting motubag.] Ang mga tinun-an ni Jesus interesado sa tubag niining pangutanaha.” Basahang Mateo 24:3, diin gipatungha ang pangutana, ug dayon ang bersikulo 34, diin gihatag ni Jesus ang tubag.
3 Kon imong nahisgotan ang Gingharian sa Diyos sa imong unang duaw, makapadayon ka pinaagig pagsukna sa pangutana:
◼ “Sa imong opinyon, unsang matanga sa kagamhanan ang gikinahanglan sa pagtagbaw sa tanang panginahanglan sa katawhan? [Tugoting motubag. Basahang Jeremias 10:23.] Ingon sa makita nimo, ang Diyos wala gayod magtuyo nga ang tawo angayng magtultol sa iyang kaugalingong mga kalihokan. Ang mga pagsulay sa paghimo niana nga walay panabang sa Diyos mao ang hinungdan sa kadaghanang mga suliran. Ang Gingharian sa Diyos mao lamang ang bugtong kagamhanan nga makatagana sa atong gikinahanglan.” Paklia ngadto sa panid 185 (p. 230 sa Ingles) sa librong Nangatarongan, ug hisgoti ang mga kasulatan ubos sa unang sub-ulohan. Hikayang mapadayon ang panaghisgot sa sunod semana.
4 Hayan gusto nimong sulayan kini sa pagsugod ug Kasulatanhong panaghisgot:
◼ Ipakita ang ilustrasyon sa panid 302 sa librong Pinadayag, ug isaysay: “Ang katawhan magapahimulos niining mga kahimtanga sa dihang matuman na ang kabubut-on sa Diyos sa yuta maingon man sa langit. Bisan pa niana, ang pipila nahadlok nga ang daotang mga kahimtang mobalik pag-usab. Kana imposible tungod kay ang tanang daotan mawala na.” Basahang Salmo 37:10, 11. Dapita ang tagbalay sa pagpahimulos sa atong programa sa pagtuon sa Bibliya aron makakat-og dugang.
5 Kon gikabilin nimo ang ‘tract’ nga “Kinabuhi sa Malinawong Bag-ong Kalibotan”:
◼ Mahimong ikapunting nimo ngadto sa ilustrasyon sa hapin ug dayon basahon ang parapo 1 ubos sa ulohang “Kinabuhi sa Bag-ong Kalibotan sa Diyos.” Unya moingon: Kon buot natong mabuhi sa usa ka kalibotan nga sama niana, adunay usa ka butang nga hinungdanon nga kinahanglan natong buhaton.” Basaha ang kataposang parapo, ug itanyag ang librong Pinadayag.
6 Sanglit kay ang atong tumong mao man ang pagsugod ug mga pagtuon sa Bibliya, ieskedyol ang panahon sa mga pagbalikduaw, ug pangandam pag-ayo. Niining paagiha matabangan gayod nato ang mga mabuot ug kasingkasing.—Pin. 22:6, 7.