Ang Labing Hinungdanong Hitabo sa Tawhanong Kasaysayan
1 Si Jesus mianhi sa yuta diha sa pagtultol sa iyang Amahan aron pagsaksi sa kamatuoran nga moagak kanato sa walay kataposang kinabuhi. (Juan 18:37) Ang iyang pagkamatinumanon hangtod sa kamatayon nagpasidungog kang Jehova, nagbalaan sa ngalan sa Diyos, ug nagtaganag usa ka lukat. (Juan 17:4, 6) Kini ang nakapahimo sa kamatayon ni Jesus nga ang labing hinungdanong hitabo sa tanang tawhanong kasaysayan.
2 Sukad sa paglalang kang Adan, dihay duha lamang ka hingpit nga lalaki nga nabuhi niining yutaa. Si Adan anaa sa kahimtang nga makapahinabog kahibulongang mga panalangin ngadto sa iyang wala pa matawong kaliwatan. Hinunoa, siya mahakogong nagrebelde, nga nagtunglo kanila ngadto sa usa ka alaot nga paglungtad nga matapos diha sa kamatayon. Sa dihang miabot si Jesus, iyang gipasundayag ang hingpit nga pagkamaunongon ug kamasinugtanon, nga nagbukas sa kahigayonan alang sa walay kataposang kinabuhi sa tanang nagatuo.—Juan 3:16; Roma 5:12.
3 Walay laing hitabo nga ikatanding sa haladnong kamatayon ni Jesus. Kini nag-usab sa kurso sa tawhanong kasaysayan. Kini nagtaganag pasukaranan sa pagkabanhaw sa mga binilyon nga katawhan gikan sa mga patay. Kini nagpahilunag pundasyon alang sa walay kataposang Gingharian nga magtapos sa pagkadaotan ug maghimo sa yuta nga usa ka paraiso. Kini sa kataposan magapagawas sa tanang katawhan gikan sa tanang dagway sa pagdaogdaog ug pagkaulipon.—Sal. 37:11; Buh. 24:15; Roma 8:21, 22.
4 Kining tanan nagatabang kanato sa pagpabili kon nganong si Jesus nagsugo sa iyang mga tinun-an sa paghinumdom sa iyang kamatayon uban ang pagsaulog sa Memoryal matag tuig. (Luc. 22:19) Sa pagpabili sa kahinungdanon niini, kita nagalantaw sa pagpakigtigom uban sa mga kongregasyon sa mga Saksi ni Jehova sa tibuok kalibotan human sa pagsalop sa adlaw sa Biyernes, Abril 14. Una pa nianang panahona, makaayo ang pagbasa sa tingob ingong pamilya sa mga asoy sa Bibliya sa kataposang mga adlaw ni Jesus sa yuta ug sa iyang maisogong pagbarog sa kamatuoran. (Ang girekomendar nga mga teksto nasulat diha sa atong 1995 Calendar, sa Abril 9-14.) Siya nagpahilunag usa ka sumbanan alang kanato sa pagkamahinalaron sa atong Maglalalang. (1 Ped. 2:21) Buhaton nato ang ato gayong maarangan sa pagdapit sa atong mga higala ug pamilya, maingon man sa mga gitun-an sa Bibliya ug ubang interesadong mga tawo, ngadto niining hinungdanong panagkatigom. Ipatin-aw nga una pa kon unsa ang pagahimoon ug ang kahulogan sa mga emblema.—1 Cor. 11:23-26.
5 Ang mga ansiyano kinahanglang magplanog maayo nga abante pa sa pagseguro nga ang Kingdom HalI limpiyo ug mahinlo. Ang mga kahikayan kinahanglang himoon alang sa usa nga mag-andam sa mga emblema. Ang pagpasa sa mga emblema kinahanglang organisado kaayo. Ang makatabang nga mga sugyot kon sa unsang paagi atong ikapakita ang pagtahod sa Panihapon sa Ginoo gihatag diha sa Ang Bantayanang Torre sa Agosto 15, 1985, panid 19 (Pebrero 15, 1985 sa Ingles). Maoy tukma alang sa kongregasyon sa paghikay ug malukopong kalihokan sa pagsangyaw sulod sa ubay-ubayng mga adlaw una pa ang pagsaulog maingon man sa pipila ka adlaw human niana.
6 Sa miaging tuig, ang total nga 12,288,917 ang mitambong sa tibuok kalibotan sa kasaulogan niining hinungdanong hitabo. Sanglit kay kini maoy labing hinungdanong adlaw sa atong kalendaryo, kitang tanan kinahanglang maanaa.