Pagtanyag sa Maayong Balita—Uban sa Bag-ong Tanyag
1 Ang sinserong mga estudyante sa Bibliya sa kasiglohan nagtinguha sa pagsabot sa basahon sa Pinadayag. Sukad sa 1917, ang Sosyedad mipatik ug pipila ka libro sa pagtabang sa mahadlokon-Diyos nga mga tawo sa pagsabot niining basahona sa Bibliya. Ang Pinadayag—Hingpit nga Sangkoanan Niini Haduol Na! nagataganag labing tin-aw ug labing malangkobong pagpatin-aw sa pagkakaron sa maong dinasig Bibliyang basahong sa Pinadayag.
2 Usa ka dakong kalipay ug apresasyon kadto nga atong gidawat ang bag-ong basahong Pinadayag Sangkoanan didto sa “Balaang Hustisya” Distritong Kombensiyon. Imo bang ginabasa ang imong kopya? Sa bulan sa Hunyo, aduna kitay higayon nga itanyag kining bag-ong libro ngadto sa tanan nga atong mahibalag.
MGA BAHIN NGA GIAPRESYAR
3 Pinadayag—Hingpit nga Sangkoanan Niini Haduol Na! ilabinang giapresyar tungod kay gihimo niini ang bersikulo-por-bersikulo nga panaghisgot sa interong libro sa Pinadayag. Kini hinungdanon kaayo alang sa personal nga pagtuon ug sa pagtudlo sa uban.
4 Sa walay duhaduha ang imong pagtagad nabihag pinaagig makapasantik nga mga ilustrasyon sa maong libro. Dakong tabang kini sa paghanduraw sa mga simbolismo nga gihubit ni Juan. Gamita kining mga ilustrasyona nga epektibo sa dihang itanyag ang libro sa pag-alagad sa kanataran.
UNSAY IMONG ISULTI?
5 Human ikapaila ang imong kaugalingon, ikaw makaingon: “Daghan ang gusto nga ilang masabtan ang basahon sa Pinadayag. Ang dakong sangpotanan mao ‘ang takna sa paghukom’ nga gihisgotan sa Pinadayag 14:7. [Basaha.] Mahimong matingala ka ug dako sa pagkaplag kon kinsa kanang nakaagom sa grabeng paghukom sa Diyos. [Basaha ang Pinadayag 18:2a, 4.] Nakadungog ka na ba sukad sa ekspresyong ‘Bantogang Babilonya’? [Tugoting motubag ug unya ipakita ang Pinadayag Sangkoanan nga libro.] Ang impormasyon nga gibutyag diha sa mga kapitulo 33-38 nagpaila sa Bantogang Babilonya ug nagtug-an sa hapit nang kalaglagan niana. Ang nagpahimong makapainteres kaayo ug makatabang gayod niining libroha mao nga kini mitaganag matin-awong mga komento sa matag bersikulo diha sa basahong Pinadayag sa Bibliya. Kining impormasyona mahimong dakong bili sa pagbulig kanimo ug sa imong mga hinigugma sa paghimog mga tikang aron sa paghupot sa pabor sa Diyos, sa ingon makalikay sa dangatan sa Bantogang Babilonya. Akong gidasig ka nga kuhaa ang usa ka kopya niining libroha, sa ₱42.00 lang.”
6 Sa paghimog mubong presentasyon, ang uban hayan mopiling basahon ang Pinadayag 18:4 ug dayon paklion ngadto sa hulagway sa panid 241, nga mag-ingon nga ang maong libro mipatin-aw kon unsa ang gihulagwayan sa Bantogang Babilonya, kon unsa ang gihulagwayan sa mananap, ug kon nganong importante kaayo alang kanato sa pagsunod sa pasidaan sa Diyos bahin kanila.
7 Atong gihigugma si Jehova ug gihigugma ta ang atong silingan. Kini magpalihok kanato sa pagmantala sa mensaheng paghukom sa Diyos. Samtang ang Bantogang Babilonya kinahanglang dugang iyagyag, ang mabuot ug kasingkasing nga mga tawo kinahanglang mahatagan ug higayon sa ‘paggula gikan kaniya’ ug makahimog malig-ong pagbarog dapig sa kamatuoran. Nianang puntoha kita mopatugbaw sa atong mga tingog nga hiniusa, sa pag-ingong “Umari!” ngadto kanilang giuhaw alang sa “tubig sa kinabuhi.”—Pin. 22:17.