Sundala ang Interes nga Imong Nakaplagan
1 Sa dihang nagapamalaybalay, limitado lamang ang atong panahon nga magugol uban sa usa ka interesadong tawo. Ang tinuod nga buluhatong pagtudlo mahimo sa dihang kita magahimog mga balikduaw ug modumalag mga pagtuon sa Bibliya. (Mat. 28:19, 20) Aron makatudlong epektibo sa dihang kita mobalik, kinahanglan natong repasohon ang atong nahisgotan sa unang duaw ug dayon padakoon kana.
2 Kon ikaw nakigsulti bahin sa pagkahuyang sa kahikayan sa pamilya, magamit nimo ang kapitulo 29 sa librong “Mabuhing Walay Kataposan.” Makaingon ka:
◼ “Sa miagi atong nahisgotan ang bahin sa kaalam sa pagsunod sa tambag sa Bibliya aron mabatonan ang usa ka malipayong pamilya. Unsay imong gibati nga mao ang yawi sa paghiusa sa mga pamilya karon?” Tugoting motubag. Ipunting sa parapo 27 sa panid 247, ug basahang Colosas 3:12-14. Isaysay kon sa unsang paagi ang makanunayong pagtuon sa librong Mabuhing Walay Kataposan makabulig sa pagsulbad sa mga suliran.
3 Kon imong nahisgotan ang nagakadaot nga mga kahimtang sa kalibotan sa imong unang duaw, makaingon ka:
◼ “Ang Bibliya nagapakita nga si Satanas mao ang pangunang hinungdan sa presenteng mga kahimtang sa kalibotan. Daghan ang nahibulong kon nganong gitugotan siya sa Diyos nga magpadayon sa dugay na kaayo. Unsay imong hunahuna?” Tugoting motubag. Paklia sa panid 20, mga parapo 14 ug 15, sa librong Mabuhing Walay Kataposan, ug isaysay kon nganong si Satanas wala pa laglaga. Unya basaha ang Roma 16:20.
4 Kon ikaw nakigsulti bahin sa mga panalangin ubos sa pagmando sa Gingharian, sa imong pagbalikduaw makaingon ka:
◼ “Ang kahibulongang mga panalangin nga ipahinabo sa Gingharian sa Diyos sa yuta ug katawhan giilustrar dinhi sa mga panid 12 ug 13. Unsay imong nakita nga makapadani kanimo? [Tugoting motubag.] Hunahunaa kon mahisama unya sa unsa ang pagpuyo sa usa ka kalibotan nga sama niini.” Basahang parapo 12. Kon adunay interes, isukna ang pangutana sa parapo 13, ug hisgoti ang tubag. Hikaya nga mapadayon ang panaghisgot sa imong sunod nga duaw.
5 Makaarang ka sa pagsugod ug usa ka pagtuon pinaagig pag-ingon:
◼ “Daghang tawo ang nakakaplag ug mga tubag sa ilang mga pangutana sa Bibliya pinaagig paggamit niining libroha.” Paklia ngadto sa listahan sa mga kaundan, ug pangutana: “Haing ulohana dinhi ang labing makapainteres kanimo?” Tugoting motubag, paklia ang kapitulo nga nakasikop sa iyang interes, ug basaha ang unang parapo. Isaysay ang pamaagi sa pagtuon ug iilustrar pinaagig paghisgot sa usa o duha ka parapo. Himoang mga kahikayan sa pagduaw pag-usab.
6 Ang pagsundal sa interes diha sa librong Mabuhing Walay Kataposan nagapasundayag sa atong tinguha sa bug-os nga pagtuman sa atong ministeryo. (2 Tim. 4:5) Pinaagig pagbuhat niana, matabangan nato ang atong mga mamiminaw sa pagpangab-ot sa walay kataposang kinabuhi.—Juan 17:3.