Nunot-Panahong Kingdom News Ipanghatag sa Tibuok Kalibotan
1 Sa Domingo, Abril 23, ang usa ka espesyal nga pahayag publiko igahatag diha sa makapaalinggat nga ulohang “Ang Kataposan sa Bakak nga Relihiyon Nagakahiduol Na.” Sa paniklop sa tigom nianang adlawa, ang upat-panid nga Kingdom News pagaluwatan. Ang nunot-panahong mensahe nga nasulod niana ipanghatag sa tibuok kalibotan sulod sa tulo-semanang hugna gikan sa Abril 24 hangtod sa Mayo 14.
2 Sa tanang bahin sa kalibotan, ang katawhan nalibog ug ginahampak sa mga suliran. Ang Kingdom News makapainteres gayod niadtong nabalaka bahin sa nagakahitabo, sanglit kay magatultol man kini kanila ngadto sa Pulong sa Diyos ingong dili masayop nga tinubdan sa paggiya sa tawo. (Sal. 119:105) Kitang tanan nagalantaw sa pagbaton ug kopya sa Kingdom News sa dihang luwatan kini sa Abril 23. Sa kasamtangan, adunay daghang buhatonon sa pagpangandam alang niining malukopong tulo-semanang kampanya.
3 Dasigang Tanan nga Masibotong Makig-ambit: Kinsa man ang makapakig-ambit sa buluhaton? Dayag nga ang matag usa nga magmamantala na maikagon gayod nga magabuhat niana! Kumosta na man ang mga ginatun-an sa Bibliya nga makanunayon nang nagatambong sa mga tigom sa kongregasyon? Ang pipila taudtaod nang nakig-uban kanato ug padayong nagauswag. Kon gipahiuyon na nila ang ilang mga kinabuhi sa Kasulatanhong mga prinsipyo, sila ba kuwalipikado na nga maihap ingong mga magmamantala sa Gingharian? Ang magmamantala nga nagadumala sa pagtuon sa Bibliya makahisgot niana uban sa ginatun-an, ug kon siya matinguhaong makig-ambit sa pag-alagad sa kanataran, ang duha ka ansiyano magrepaso kaniya sa materyal diha sa mga panid 98 ug 99 sa librong Organisado sa Pagtuman sa Atong Ministeryo. Kini kinahanglang himoon sa labing madali nga posible aron nga kadtong mahimong takos ingong di-bawtismadong mga magmamantala makabaton ug bug-os nga pakig-ambit sa kampanya. Ang mga ginatun-an sa Bibliya nga dili pa takos ingong di-bawtismadong mga magmamantala madasig gihapon sa paghatag sa tract sa mga kaila o mga membro sa pamilya.—Tan-awa usab Ang Bantayanang Torre, Nobyembre 15, 1988, panid 17, parapo 8.
4 Kining buluhatona dili malisod; ang matag usa makapakig-ambit. Sa ilang senemanang pagtuon sa pamilya, ang mga ginikanan makalakip sa mga sesyon sa pagbansaybansay uban sa tract aron nga ang tanang membro sa pamilya maandam sa pagpresentar sa Kingdom News sa balaybalay. Ang usa ka yanong presentasyon maoy sagad nga labing maayo. Human sa mubong pasiuna, itanyag ang Kingdom News sa tagbalay, ug dasigon siya nga basahon kana. Sa dihang ang mga tagbalay magpakitag interes, paghimog rekord aron nga imong mabalik aron pag-ugmad sa interes. (1 Cor. 3:6, 7) Ang yawi sa kalamposan mao ang pagbaton ug yano, maayong pagkaandam nga presentasyon.
5 Adunay “daghang buhaton” sa Abril ug Mayo. Sa sunod bulan nga gula sa Atong Ministeryo sa Gingharian, ang dugang impormasyon itagana diha sa suplemento nga nag-ulohan ug “Daghang Buhaton Diha sa Buluhaton sa Ginoo.”—1 Cor. 15:58.