Mahimong “Masiboton sa Maayong mga Buhat” sa Abril!
1 Sa Abril ug Mayo, 1995, ang usa ka wala-sukad-buhata nga pagpanaksi gihimo sa dihang minilyon ka kopya sa Kingdom News No. 34 gipanagtag sa tibuok kalibotan. Ang mga magmamantala sa kongregasyon ug mga payunir usab masibotong nakig-ambit niining makapadasig nga buluhaton. Ikaw ba duyog kanila? Kon ikaw nakaduyog, walay duhaduhang bug-os kang nalipay sa pagsalga sa maong talagsaong kampanya. Karon hayan mahibulong ka, Unsang ‘maayong buhat’ ang naandam alang kanato niining tuiga?—Tito 2:14.
2 Sa Abril ug sayo sa Mayo, atong mabatonan ang kalipay sa pagpanagtag sa usa ka espesyal nga edisyon sa Pagmata! nga magasin, ang Abril 22, 1996, isyu, nga nagapatugbaw sa “Sa Dihang ang mga Gubat Mawala Na.” Sanglit kining ulohana makapaikag man ngadto sa daghan gayong mga tagbalay, atong paningkamotan ang paghatag sa maong magasin ug labing kaylap nga pagpanagtag nga maarangan. Tungod sa importansiya sa impormasyon nga anaa niana, kining isyuha sa Pagmata! kinahanglang ipatugbaw sa Abril ug ngadto sa Mayo hangtod mahurot ang mga suplay.
3 Atong Tumong—Pakig-ambit sa Tanang Magmamantala: Makapadasig gayod kon ang matag magmamantala niining nasora magpakig-ambit sa buluhatong pagsangyaw sa Abril. Tungod kay nakasaulog na sa Memoryal sa kamatayon ni Kristo di pa dugay, buot gayod natong ipakita ang atong pagpabili alang sa pagkamaayo sa Diyos pinaagi sa pagtanyag sa usa ka diretsong “halad sa pagdayeg” diha sa ministeryo sa kanataran.—Heb. 13:15.
4 Ang usa ka makugihong panikaysikay kinahanglang himoon sa pag-ila sa mga panginahanglan sa matag membro sa kongregasyon aron ang tanan makabaton ug usa ka masibotong pakig-ambit diha sa ministeryo sa Abril. (Roma 15:1) Ang mga konduktor sa pagtuon sa libro kinahanglang bug-os masayod sa mga kahimtang kanilang anaa sa ilang mga grupo ug motanyag sa praktikal nga tabang sa dihang gikinahanglan. Aduna bay nanginahanglag sakyanan? Kinsa ang makatagana niana? Ang pipila ba maulawon o mapanagan-on-sa-kaugalingon? Mahimo bang ang mas batid nga mga magmamantala mosangyaw uban kanila? Unsa na man kadtong anaa ra sa ilang mga balay o silang may sakit? Sila ba makasangyaw pinaagig telepono, pagsulat, o diha sa pipila ubang mabungahong kalihokan?
5 Ang pipila kinsa nahimong di-aktibo nakadawat ug regular espirituwal nga pagdasig, ug sila tingali matukmod nga moambit na usab diha sa buluhatong pagsangyaw. Ang kampanya uban ang espesyal nga Pagmata! magatagana kanilag usa ka ekselenteng kahigayonan nga mahimong aktibo na usab.
6 Bansaya ang mga Batan-on nga Makig-ambit: Daghang kabataan sa mga Saksi ni Jehova nakaduyog na sa ilang mga ginikanan sa pamalaybalay sa katuigan, bisan tuod wala pa sila mag-alagad ingong di-bawtismadong mga magmamantala. Karon na ba ang panahon alang kanila sa pagsugod? Andam na ba sila nga makahimog makahuloganong pakig-ambit diha sa balaybalay nga buluhaton? Ang mga ulo sa pamilya kinahanglang mogamit ug panahon atol sa pagtuon sa Bibliya sa pamilya aron tabangan ang ilang takos nga mga bata sa pag-andam ug usa ka presentasyong gipahaom sa pangedaron ug katakos sa matag usa. Ang mga mas edaran makapilig usa ka makapukaw-hunahunang pangutana nga niana mahaling ang interes sa tagbalay ug unya ipunting ang tubag diha sa magasin. Ang mas batang mga anak makahatag ug usa ka epektibong pagpanaksi diha sa pipila lamang ka pulong. Pananglitan, mahimo nilang madasig ang tagbalay sa “pagbasa sa usa ka espesyal nga magasin nga ginatanyag karong bulana sa tibuok kalibotan.” Ingong bahin sa pagpangandam sa inyong pamilya, paneguroang iapil ang mga sugyot sa pagbuntog sa kasagarang mga pagsupak. Imong makaplagan ang pipila ka maayong mga ideya diha sa Nangatarongan nga libro. Sa mga panahon sa pagpangaon ug sa ubang tukmang mga okasyon, dasiga ang mga membro sa pamilya sa pag-asoy sa mga kasinatiang ilang nabatonan diha sa pag-alagad sa kanataran.
7 Takos nga mga Estudyante sa Bibliya Nagasagop sa Buluhatong Gihimo ni Jesus: Si Jesus wala magkuto sa iyang pagpanudlo sa paghatag ug instruksiyon sa doktrinal nga mga butang. Giduyogan niya ang iyang mga tinun-an diha sa ministeryo ug nagtudlo kanila kon unsaon sa pagsangyaw. (Luc. 8:1; 10:1-11) Unsa na man ang kahimtang karon? Kapin sa 95,000 ka pagtuon sa Bibliya ang ginadumala sa Pilipinas. Sa walay duhaduha, uban sa tukmang pagdasig daghan niining mga ginatun-an ang makahimo sa sunod nga lakang diha sa ilang pagbansay ug mahimong takos nga moalagad ingong di-bawtismadong mga magmamantala sa Abril.
8 Kon ikaw nagadumalag usa ka pagtuon sa Bibliya, tagda kining mga pangutanaha: Ang tinun-an ba nagauswag, nga angay sa iyang edad ug katakos? Siya ba nakasugod na sa pagpaambit sa iyang pagtuo sa di-pormal ngadto sa uban? Ginasul-ob ba niya “ang bag-o nga pagkatawo”? (Col. 3:10) Nakab-ot ba niya ang mga kinahanglanon alang sa di-bawtismadong mga magmamantala, nga gilaraw sa mga panid 98 ug 99 sa Atong Ministeryo nga libro? Kon ikaw nagatuo nga siya takos, nganong dili hisgotan ang maong butang uban kaniya? Ang pipila ka tinun-an nagakinahanglan lamang ug diretsong pagdapit nga moambit sa buluhaton. Siyempre, kon mahinangop ang tinun-an, gikinahanglan una alang sa nagadumalang magtatan-aw sa paghikay sa naandang paagi para sa panaghisgot uban ang duha ka ansiyano. Sa laing bahin aduna tingali ing butang nga nagapugong sa estudyante. Hayan usa sa mga ansiyano makauban kanimo diha sa pagtuon sa Bibliya ug makapasulti sa tinun-an maylabot sa iyang mga pagbati sa kamatuoran. Human makapatalinghog kon unsa ang gikabungat sa estudyante, ang ansiyano mahimong makaarang na sa pagtaganag praktikal nga mga sugyot, uban sa Kasulatanhong tabang.
9 ‘Palita ang Panahon’ Aron Makaoksilyare Payunir: Matag tuig sa panahon sa Memoryal, ang pagpasalamat alang sa lukat nagapalihok sa tinaglibo sa ‘pagpalit’ sa panahon aron mahimong mga oksilyare payunir. (Efe. 5:15-17) Bisan tuod gikinahanglan ang pipila ka sakripisyo, ang mga ganti maoy dako. Usa ka dalayegong gidaghanon sa mga batan-on nagapahimulos sa usa ka bakasyon gikan sa tunghaan aron makaoksilyare payunir. Ang mga hamtong kinsa nagatrabaho sa bug-os panahon nagagamit sa mga gabii ug hinapos sa semana sa bug-os nga pagpahimulos diha sa samang kalihokan. Busa, ang tibuok nga mga pamilya nagpahimulos sa kahigayonan sa duyog nga pag-oksilyare payunir! Sa pipila ka kongregasyon kadaghanan sa mga ansiyano ug ministeryal nga mga alagad ug ilang mga asawa nagpatala ingong mga oksilyare payunir. Naaghat sa ilang mainitong pagpanguna, ang uban misundog sa ilang panig-ingnan, mao nga ang usa ka dakong porsiento sa kongregasyon nag-alagad ingong mga oksilyare payunir sa Abril.
10 Ikaw man makaarang sa pag-oksilyare payunir o dili, pangitag mga paagi sa pagpauswag sa imong pag-alagad sa kanataran sa Abril. Magpahilunag personal nga tumong alang sa imong kaugalingon, usa nga nagakinahanglag pipila ka paningkamot sa pagkab-ot apan kanang maarangan. Ang imong tinguha aron “magagasto ug bug-os pagagastohon” diha sa pag-alagad kang Jehova, sumala sa imong personal nga mga kahimtang, makabaton sa iyang panalangin.—2 Cor. 12:15.
11 Mga Tigom sa Dayon na nga Pagsangyaw: Ang mga tigom sa dayon na nga pagsangyaw kinahanglang pagahikayon sa matag adlaw sa Pagmata! nga kampanya, sa panahon nga magtugot alang sa usa ka sayo nga pagsugod sa ministeryo. Kinahanglang himoon usab ang pagtagana alang sa pagsangyaw sa magabii. Ang kadaghanang magmamantala makig-ambit sa pag-alagad sa kanataran sa hinapos sa semana, busa ang mga kongregasyon kinahanglang mag-eskedyul ug mga tigom sa dayon na nga pagsangyaw sa mga Sabado, buntag ug palis, alang sa gidugayon sa pagpanagtag sa espesyal nga Pagmata!.
12 Silang magadumala sa mga tigom sa dayon na nga pagsangyaw kinahanglang maneguro nga adunay daghang teritoryo nga andam. Ang teritoryong wala pa makobrehi di pa dugay kinahanglang maoy unang trabahoon. Kon ang inyong kongregasyon nakakobre na sa tanang teritoryo niini ug ang usa ka silingang kongregasyon nanginahanglan ug tabang, ang mga ansiyano mahimong makigsulti uban kanila ug motanyag sa pagtabang nila sa pagkobre sa ilang teritoryo sulod sa kampanya. Sa walay duhaduha ilang pabilhan ang maong tabang ug ang mga magmamantala ug mga payunir sa inyong kongregasyon malipay sa pagsangyaw sa laing teritoryo. Siyempre kini pagahimoon lamang uban ang pagtugot sa kongregasyong nagahupot sa teritoryo.
13 Pila ka Magasin ang Imong Ipahimutang? Kanang pangutanaha maoy alang sa matag indibiduwal sa pagtubag. Sa pagtino kon pila ka magasin ang imong ipahimutang sa panahon sa kampanya, tagda ang matang sa teritoryo nga imong pagakobrehan, imong pangedaron, imong kahimsog, ang panahong imong arang madeboto sa buluhaton, ug ubang mga butang. Matikdi, hinuon, ang pahinumdom nga gihatag diha sa Enero 1, 1994 nga gula sa Ang Bantayanang Torre: “Ingong sugyot, ang mga magmamantala mahimong magbaton ug tumong, pananglitan, 10 ka magasin sa matag bulan, depende sa ilang mga kahimtang; ang mga payunir makapaningkamot ug 90.” Ang usa ka susamang tumong ba mapasibo sa imong kahimtang? Nakapedido ka na ba ug ekstra nga mga kopya sa Abril 22 nga Pagmata!? Susiha aron maseguro nga ang imong order maoy igo. Kon ang kongregasyon makakaplag nga ang espesyal nga order niini sa dugang mga magasin dili paigo, sila makapadalag ikaduhang order sa sangang opisina ug ang Sosyedad maningkamot nga mapun-an ang maong order basta aduna pa kami ing suplay.
14 Mga Ansiyano—Maampingong Pagplano Maoy Gikinahanglan: Ang lokal nga mga kahikayan alang sa Abril nga kampanya pagadumalahon pinaagi sa lawas sa mga ansiyano. Kinahanglang ilang paneguroon nga, kon maarangan, tanan nga teritoryo sa kongregasyon makobrehan uban sa espesyal nga isyu sa Pagmata! Kinahanglang hatagan ug maampingong pagtagad ang pagkobre sa bisan unsang teritoryong negosyohanan nga giasayn sa kongregasyon. Sila nga nagakobre niana kinahanglang andam pag-ayo ug nagsininang hapsay. Ang sobra nga presentasyon dili kinahanglan. Sa dihang moduol sa usa ka negosyante, ikaw makaingon nga dili nimo sagad makaplagan ang mga negosyante nga anaa sa balay, busa ikaw nagaduaw sa iyang dapit trabahoanan sa pagpresentar ug usa ka artikulo nga sa dayag makapainteres kaniya. Unya sa mubo ikapaambit mo kaniya ang usa ka espesipikong puntos diha sa magasin. Ang pagsangyaw sa kadalanan uban ang mga magasin kinahanglan usab nga hustong maorganisar sulod sa teritoryo sa kongregasyon. Ang labing maayong paagi sa paghimo sa pagsangyaw sa kadalanan mao ang paghimog unang tikang ug duolon ang mga lumalabay, inay kay maghulat kanila nga moduol kanimo. Sanglit ikaw mapanid-an man sa publiko, kinahanglang mahunahunaon ka sa pagbaton ug dungganong pamostura. Tingali aduna pay laing mga dapit sa inyong teritoryo nga mahimong makobrehan sa panahon sa kampanya, sama sa mga tugpahanan sa ayroplano, mga ospital, mga parkinganan, ug mga parke. Ang lawas sa mga ansiyano kinahanglang magatino kon unsa ang angayng mga kahikayan nga mahimo alang sa pagsangyaw nianang mga dapita sa teritoryo sa inyong kongregasyon.
15 Si Jehova maoy magbubuhat nga walay pagkaluya. (Juan 5:17) Iyang gilalang ang mga langit ug ang yuta maingon man sa mga tanom ug ang mga mananap; apan siya padayong nagbuhat hangtod iyang nalalang ang iyang kinatas-ang kabuhatan ibabaw sa yuta—ang tawo. Ang kamatuoran nga kita nagbatog kinabuhi maoy diretsong resulta sa pagkamahinangpon sa Diyos sa pagbuhat. Ingong “mga tigsundog sa Diyos,” kinahanglang kita palihokon sa atong gugma kaniya nga mahimong “masiboton alang sa maayong mga buhat.” (Efe. 5:1; Tito 2:14) Sanglit kay si Jehova maoy takos sa pagdawat sa ato gayong labing maayong panikaysikay, ug tungod kay ang tinguha sa pagbatog mga resulta maoy hiyas sa usa kinsa masiboton, kita kinahanglang interesado sa pagbuhat sa dekalidad nga binuhatan diha sa ministeryo. Siyempre, ginapabilhan ni Jehova ang bisan unsang sakripisyo nga atong ginahimo alang kaniya, ug ang atong binuhatan dili gayod makawang. (1 Cor. 15:58) Busa, uban ang mapasalamatong mga kasingkasing, hagoon ta ang atong mga kaugalingon sa masibotong kalihokan sa Abril, nga masaligon sa pag-uyon ni Jehova ug panalangin ug sa dagayang kalamposan!